ବଲାଙ୍ଗୀର ଅଫିସ,୨୦ା୮: ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସ୍ପିଟାଲ ପରିସରରେ ଗତ ୧୬ ତାରିଖ ସକାଳେ ଘଟିଥିବା ଅଜୁ ଦୋରା (୨୫) ହତ୍ୟା ଘଟଣାର ରହସ୍ୟ ଉନ୍ମୋଚନ କରିବାରେ ପୋଲିସ ସଫଳ ହୋଇଛି। ପାରିବାରିକ କଳହ ସାଂଘାତିକ ରୂପ ନେବା ପରେ ୧ ଲକ୍ଷ ଟଙ୍କା ସୁପାରି ଦେଇ ବଡବାପା ପୁଅ ଭାଇ ନିଜ କାକା ପୁଅ ଭାଇକୁ ହତ୍ୟା କରିଥିବା ଜଣାପଡିଛି। ଏହି ହତ୍ୟା ଘଟଣାରେ ମୁଖ୍ୟ ଷଡଯନ୍ତ୍ରକାରୀଙ୍କ ସମେତ ୪ ଅଭିଯୁକ୍ତଙ୍କୁ ପୋଲିସ ଗିରଫ କରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ସୁଦପଡାର ମୁନା ଦୋରା (୨୭), ଲଳିତ ନଗରର ରାହୁଲ ପାଣିଗ୍ରାହୀ (୨୭), ନୂଆପଡାର ସୋମ ପୁଞ୍ଜି (୨୪) ଓ ବ୍ରାହ୍ମଣପଡାର ଚନ୍ଦ୍ର ପଧାନ (୨୭)। ସେମାନଙ୍କ ମଧ୍ୟରୁ ଦୁଇଜଣ ଅଭିଯୁକ୍ତ ହସ୍ପିଟାଲ ପରିସରରେ ପୋଲିସକୁ ହତ୍ୟାକାଣ୍ଡର ଡେମୋ ଦେଖାଇଛନ୍ତି। ବଲାଙ୍ଗୀର ଏସ୍ପି ନୀତିନ କୁଶଲକର ଶୁକ୍ରବାର ଜିଲା ପୋଲିସ କାର୍ଯ୍ୟାଳୟରେ ଖବରଦାତା ସମ୍ମିଳନୀ କରି ଏହି ଚର୍ଚ୍ଚିତ ହତ୍ୟା ଘଟଣା ସମ୍ପର୍କରେ ସୂଚନା ଦେଇଛନ୍ତି। ବଲାଙ୍ଗୀର ସୁଦପଡା ନିବାସୀ ଅଜୁ ଦୋରାଙ୍କ ସହ ତାଙ୍କ ବଡବାପା ପୁଅ ମୁନା ଦୋରାଙ୍କର ପ୍ରାୟ ଦୁଇ ମାସ ପୂର୍ବରୁ ରାସ୍ତାକଡରେ ଫଳ ଦୋକାନ ଲଗାଇବାକୁ ନେଇ ପାଟିତୁଣ୍ଡ ହୋଇଥିଲା। ଘର ଭିତରେ ଅଜୁ କୁଆଡେ ମୁନା ଓ ତାଙ୍କର ବାପାଙ୍କୁ ଅଶ୍ଲୀଳ ଭାଷାରେ ଗାଳିଗୁଲଜ କରିଥିଲେ। ଏହି ଘଟଣା ପରେ ଅଭିଯୁକ୍ତ ମୁନା ନିଜ କାକାପୁଅ ଭାଇ ଅଜୁଙ୍କୁ ହତ୍ୟା କରିବା ପାଇଁ ଯୋଜନା କରିଥିଲେ। ସବୁଦିନ ପାଇଁ ରାସ୍ତାରୁ ହଟାଇବା ଷଡ଼ଯନ୍ତ୍ର କରି ସୁପାରି କିଲର ଯୋଗାଡ କରିଥିଲେ। ଏଥିସକାଶେ ସେ ୧ ଲକ୍ଷ ଟଙ୍କାର ସୁପାରି ମଧ୍ୟ ଦେଇଥିଲେ। ମୁଖ୍ୟ ଷଡ଼ଯନ୍ତ୍ରକାରୀ ଅଭିଯୁକ୍ତ ମୁନା ପ୍ରଥମେ ଲଳିତନଗରର ରାହୁଲଙ୍କୁ ସୁପାରି ଦେଇଥିଲେ। ସୁପାରି ପାଇବା ପରେ ରାହୁଲ ବ୍ରାହ୍ମଣପଡାର ଚନ୍ଦ୍ରଙ୍କୁ ସାଥୀ କରିଥିଲେ। ଉଭୟ ରାହୁଲ ଓ ଚନ୍ଦ୍ର ହତ୍ୟା ଉଦ୍ୟମ କରିଥିଲେ ମଧ୍ୟ ସଫଳ ହେଉ ନ ଥିଲେ। ଏହାପରେ ସେମାନେ ନୂଆପଡା ଜିଲାର ମୂଳ ନିବାସୀ ତଥା ବଲାଙ୍ଗୀର ଲଳିତ ନଗରରେ ରହୁଥିବା ସୋମଙ୍କୁ ହତ୍ୟା ଯୋଜନା ସମ୍ପର୍କରେ କହିଥିଲେ। ପରେ ତିନି ଜଣ ମିଳିତ ଭାବେ ଅଜୁଙ୍କୁ ହତ୍ୟା କରିବାକୁ ଯୋଜନା କରି ଏକାଧିକ ଥର ଉଦ୍ୟମ କରିଥିଲେ। ଏଥିସକାଶେ ସେମାନେ ମୁନାଙ୍କଠାରୁ ପ୍ରଥମେ ୩୦ ହଜାର ଟଙ୍କା ଆଡଭାନ୍ସ ଆକାରରେ ନେଇଥିଲେ। ଗତ ୧୬ ତାରିଖ ଦିନ ସୋମ ଓ ରାହୁଲ ଏକ ମୋଟର ସାଇକେଲରେ ହସ୍ପିଟାଲ ପରିସରସ୍ଥ ସିକ୍ୟୁରିଟି ଅଫିସ ସମ୍ମୁଖରେ ଛପି ରହିଥିଲେ। ସକାଳ ପ୍ରାୟ ୫ଟା ୨୦ ମିନିଟ ସମୟରେ ଅଜୁ ନିଜ ମାଆ ଜୟନ୍ତୀ ଦୋରାଙ୍କୁ ଏକ ସ୍କୁଟିରେ ବସାଇ ଆସୁଥିବା ବେଳେ ଅଭିଯୁକ୍ତ ସୋମ ଏକ ଖଣ୍ଡାରେ ଅଜୁଙ୍କ ମୁଣ୍ଡରେ ଦୁଇ ଚୋଟ ମାରିଥିଲେ। ଫଳରେ ଘଟଣାସ୍ଥଳରେ ଅଜୁଙ୍କର ମୃତ୍ୟୁ ଘଟିଥିଲା। ଏହାପରେ ସେମାନେ ଜୟନ୍ତୀଙ୍କୁ ଆକ୍ରମଣ କରି ସେଠାରୁ ଫେରାର ହୋଇଯାଇଥିଲେ। ରାହୁଲ ମୋଟର ସାଇକେଲ ଚଳାଉଥିଲେ। ଖଣ୍ଡାରେ ଆକ୍ରମଣ ପରେ ଦୁଇ ଅଭିଯୁକ୍ତ ସୁଦପଡା ଓଭରବ୍ରିଜ୍ ବାଟ ଦେଇ ସୋନପୁର ଆଡକୁ ଫେରାର ହୋଇଯାଇଥିଲେ। ବାଟରେ ସେମାନେ ଖଣ୍ଡା ଓ ଚାଇନା ଛୁରିକୁ ଲୁଚାଇ ଦେଇ ସୋନପୁର ମହାନଦୀ ବ୍ରିଜ୍ ତଳକୁ ଯାଇ ଗାଧୋଇଥିଲେ। ସେଠାରେ ସେମାନେ ନିଜର ରେନିକୋଟ୍ ଫିଙ୍ଗି ଦେଇ ବଲାଙ୍ଗୀର ଫେରି ଆସି କିଛି ନ ଜାଣିଲା ପରି ପୋଲିସର ଗତିବିଧି ଲକ୍ଷ୍ୟ କରୁଥିଲେ। ହତ୍ୟା କରିବା ପରେ ଅଭିଯୁକ୍ତମାନେ ମୁଖ୍ୟ ଷଡ଼ଯନ୍ତ୍ରକାରୀଙ୍କ ଠାରୁ ବାକି ଥିବା ସୁପାରି ଟଙ୍କା ନେଇଥିଲେ। ଏସ୍ପି କୁଶଲକର ଏହି ଘଟଣାର ତଦନ୍ତ ପାଇଁ ଏସଡିପିଓ ତୋଫାନ୍ ବାଗଙ୍କ ନେତୃତ୍ୱରେ ଟାଉନ୍ ଥାନା ଆଇଆଇସି ପ୍ରିୟଙ୍କା ରାଉତରାୟ, ସଦର ଥାନା ଆଇଆଇସି ଶ୍ରୀକାନ୍ତ ସାହୁ, ଇନ୍ସପେକ୍ଟର ରାଜେନ୍ଦ୍ର ବେହେରା, ସବ୍ଇନ୍ସପେକ୍ଟର ଅଭିନାଶ ନାୟକ, ପୂର୍ଣ୍ଣିମା ଓରାମ୍, ଏଏସଆଇ ବୈକୁଣ୍ଠ ଦେହୁରି, ମମତା ପ୍ରଧାନଙ୍କୁ ନେଇ ସ୍ବତନ୍ତ୍ର ଟିମ୍ ଗଠନ କରିଥିଲେ। ପୋଲିସ ଏହି ଘଟଣାରେ ଚାରି ଜଣ ଅଭିଯୁକ୍ତଙ୍କୁ ଗିରଫ କରି ଶୁକ୍ରବାର କୋର୍ଟଚାଲାଣ କରିଛି। ସେମାନଙ୍କଠାରୁ ହତ୍ୟାକାଣ୍ଡରେ ବ୍ୟବହୃତ ଖଣ୍ଡା, ଚାଇନା ଛୁରି, ୯୫୦୦ ଟଙ୍କା, ୫ଟି ମୋବାଇଲ, ଏକ ଗାମୁଛା ଏବଂ ପଲସର ବାଇକ୍ (ଓଡି୩୧ଏଚ୍ ୨୯୯୮) ପୋଲିସ ଜବତ କରିଛି।
