ଢାକା,୨୦।୭ : ଭାରତ ସହ ବିଶେଷ ସମ୍ପର୍କ ଥିବା ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଏକ ସ୍ବତନ୍ତ୍ର ଆମନ୍ତ୍ରଣ ପଠାଇଛନ୍ତି। ନିର୍ମାଣ ହୋଇଥିବା ନୂଆ ପଦ୍ମ ବ୍ରିଜ ଦେଖିବା ପାଇଁ ଶେଖ ହସିନା ମମତାଙ୍କୁ ଆମନ୍ତ୍ରଣ କରିଛନ୍ତି। ହସିନା ବ୍ରିଜ୍ କୂଟନୀତି ଆଧାରେ କହିଛନ୍ତି ଯେ, ପଶ୍ଚିମବଙ୍ଗ ସମେତ ବାଂଲାଦେଶ ଏବଂ ଭାରତ ମଧ୍ୟରେ ବାଣିଜି୍ୟକ ସମ୍ପର୍କ ବୃଦ୍ଧିରେ ପଦ୍ମ ବ୍ରିଜ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।
ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନାଙ୍କ ପକ୍ଷରୁ କୋଲକାତା ପଠାଯାଇଥିବା ନିମନ୍ତ୍ରଣ ପତ୍ରରେ ଲେଖା ହୋଇଛି ଯେ ମୁଁ ତୁମ ସୁବିଧା ଅନୁଯାୟୀ ବାଂଲାଦେଶ ଆସିବାକୁ ଆମନ୍ତ୍ରଣ କରୁଛି। ସେପ୍ଟେମ୍ବରରେ ମୋର ଭାରତ ଗସ୍ତ ସମୟରେ ଦିଲ୍ଲୀରେ ଆପଣଙ୍କ ସହ ସାକ୍ଷାତ କରିବାର ସୁଯୋଗ ପାଇବାକୁ ମୁଁ ଆଶା କରୁଛି। ଏହା ମଧ୍ୟ ଲେଖାଯାଇଛି ଯେ ଏହି ସେତୁ ବାଂଲାଦେଶ ଏବଂ ପଶ୍ଚିମବଙ୍ଗ ସମେତ ସମଗ୍ର ଭାରତ ମଧ୍ୟରେ ଦ୍ୱିପାକ୍ଷିକ ସମ୍ପର୍କକୁ ମଜବୁତ କରିବ।
ଶେଖ ହସିନା କହିଛନ୍ତି ଯେ ପଶ୍ଚିମବଙ୍ଗର ଲୋକଙ୍କ ସହ ବାଂଲାଦେଶର ଲୋକଙ୍କ ଭାବପ୍ରବଣତା ରହିଛି। ଭାଷା, ସଂସ୍କୃତି ଏବଂ ଆଦର୍ଶଗତ ସମାନତା ହେଉଛି ଏହାର ପ୍ରମୁଖ ଶକ୍ତି। ସେଥିପାଇଁ ତୁମେ ଆସି ପଦ୍ମ ନଦୀ ଉପରେ ନିର୍ମିତ ନୂତନ ସେତୁକୁ ଦେଖିବ ବୋଲି ଆଶା।
ଶେଖ ହସିନା ଏବଂ ମମତାଙ୍କର ମଧ୍ୟରେ ଭଲ ସମ୍ପର୍କ ଅଛି। ଏପରି ପରିସ୍ଥିତିରେ, ତାଙ୍କ ନିମନ୍ତ୍ରଣକୁ ଗ୍ରହଣ କରି ମମତା ଶୀଘ୍ର ବାଂଲାଦେଶ ଗସ୍ତ କରିବେ ବୋଲି କୁହାଯାଉଛି। ଏହାପୂର୍ବରୁ କୋଲକାତାର ଇଡେନ ଗାର୍ଡେନ ଷ୍ଟାଡିୟମରେ ଭାରତ ଏବଂ ବାଂଲାଦେଶ ମଧ୍ୟରେ ପିଙ୍କ୍ ବଲ ଟେଷ୍ଟ ସମୟରେ ଶେଖ ହସିନା ଏବଂ ମମତା ଏକାଠି ନଜର ଆସିଥିଲେ। ଶେଖ ହସିନା କିଛି ଦିନ ତଳେ ବାଂଲାଦେଶରୁ ଆମ୍ବ ମମତାଙ୍କ ପାଇଁ ପଠାଇଥିଲେ।
