ନୂଆଦିଲ୍ଲୀ,୧୩।୧୦: ଆଇପିଏଲରେ ସମ୍ପୂର୍ଣ୍ଣ ବିଫଳ ହୋଇଥିବା ହାର୍ଦ୍ଦିକ ପାଣ୍ଡ୍ୟାଙ୍କୁ ଟି୨୦ ବିଶ୍ୱକପ୍ ଦଳରେ ସ୍ଥାନ ମିଳିବା ଉଚିତ ନା ତାଙ୍କୁ ବାଦ୍ ଦିଆଯିବା ଦରକାର, ସେ ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ମୁମ୍ବାଇ ଇଣ୍ଡିଆନ୍ସ (ଏମ୍ଆଇ) ଅଲରାଉଣ୍ଡର ଆଇପିଏଲର ଦ୍ୱିତୀୟ ଫେଜରେ ବୋଲିଂ କରି ନ ଥିଲେ। ଏଥି ଯୋଗୁ ତାଙ୍କୁ ବିଶ୍ୱକପ୍ ଦଳରୁ ବାଦ୍ ଦିଆଯାଇପାରେ ବୋଲି ଚର୍ଚ୍ଚା ହେଉଛି। ଏହି ଚର୍ଚ୍ଚାରେ ସାମିଲ ହୋଇଛନ୍ତି ପୂର୍ବତନ ଭାରତୀୟ ଓପନର ତଥା ଭାଷ୍ୟକାର ଆକାଶ ଚୋପ୍ରା।
“ଯଦି ୨୮ ବର୍ଷୀୟ ହାର୍ଦ୍ଦିକ ବୋଲିଂ କରିପାରିବେ ନାହିଁ, ତେବେ ବିଶ୍ୱକପ୍ ଦଳରେ ତାଙ୍କୁ ସ୍ଥାନ ମିଳିବାର ସମ୍ବାବନା କ୍ଷୀଣ। କାରଣ ୟୁଏଇରେ ଟିମ୍ ଇଣ୍ଡିଆକୁ ଏକ ଅତିରିକ୍ତ ପେସର ଦରକାର। ମାତ୍ର ବୋଲିଂ କରିବା ପାଇଁ ହାର୍ଦ୍ଦିକ ଉପଲବ୍ଧ ନାହାନ୍ତି। ୧୫ ଜଣିଆ ଦଳରେ ତାଙ୍କୁ ସ୍ଥାନ ମିଳିବା ଉଚିତ୍ କି ନୁହେଁ ତାହା ଉପରେ ଚର୍ଚ୍ଚା ହେଉଛି। ଏହି ଗୁଜବ ଏବେ ଜୋରଦାର ଚାଲିଛି” ବୋଲି ଚୋପ୍ରା ତାଙ୍କ ୟୁଟ୍ୟୁବ ଚ୍ୟାନେଲରେ କହିଛନ୍ତି।
ହାର୍ଦ୍ଦିକ ବୋଲିଂ କରିବେ। ଏହା ଚିନ୍ତା କରି ଚୟନକର୍ତ୍ତାମାନେ ତାଙ୍କୁ ଦଳରେ ବାଛିଥିଲେ। ଏଣୁ ସେମାନେ ଦଳରେ ଯାଗା ଦେଇଥିଲେ ମାତ୍ର ୩ ପେସରଙ୍କୁ। ହାର୍ଦ୍ଦିକଙ୍କୁ ଚତୁର୍ଥ ପେସର ଭାବେ ବ୍ୟବହାର କରାଯିବାର ଯୋଜନା ଥିଲ। କିନ୍ତୁ ଏପର୍ଯ୍ୟନ୍ତ ହାର୍ଦ୍ଦିକ ଥରେ ହେଲେ ବୋଲିଂ କରି ନାହାନ୍ତି। ଏ କଥା ତାଙ୍କ ମୁମ୍ବାଇ ଇଣ୍ଡିଆନ୍ସ ଅଧିନାୟକ ରୋହିତ ଶର୍ମା ସୂଚନା ଦେଇଛନ୍ତି। ଏହା ଛଡ଼ା ତାଙ୍କ ବ୍ୟାଟିଂ ଫର୍ମ ମଧ୍ୟ ଭଲ ନୁହେଁ। ଏଣୁ ତାଙ୍କୁ ଦଳରୁ ବାଦ୍ ଦିଆଯାଇପାରେ। ବିଶ୍ୱକପ୍ ଦଳରେ ପରିବର୍ତ୍ତନ କରିବା ପାଇଁ ଲାଗି ୧୫ ତାରିଖ ପର୍ଯ୍ୟନ୍ତ ସମୟ ଅଛି। ଏହା ହାର୍ଦ୍ଦିକ ପାଇଁ ଦୁଃଖଦାୟକ। କିନ୍ତୁ ଏହା ଘଟିପାରେ ବୋଲି ଆକାଶ କହିଛନ୍ତି।
