ନୂଆଦିଲ୍ଲୀ,୨୮।୭: ଶ୍ରୀଲଙ୍କା ଗସ୍ତରେ ଅନେକ ଭାରତୀୟ ଖେଳାଳି ଚମତ୍କାର ପ୍ରଦର୍ଶନ କରିଛନ୍ତି। ଏହିପରି ଖେଳାଳି ହେଉଛନ୍ତି ସୂର୍ଯ୍ୟକୁମାର ଯାଦବ। ନିଜର ଏକଦିବସୀୟ ସିରିଜରେ ସୂର୍ଯ୍ୟକୁମାର ୩ ମ୍ୟାଚ୍ ଖେଳି ୧୨୪ ରନ୍ ସ୍କୋର କରିଥିଲେ। ତାଙ୍କୁ ‘ମ୍ୟାନ୍ ଅଫ୍ ଦ ସିରିଜ୍’ ଭାବେ ଚୟନ କରାଯାଇଥିଲା। ନିକଟରେ ଟି୨୦ ସିରିଜର ପ୍ରଥମ ମ୍ୟାଚ୍ରେ ସେ ଅର୍ଦ୍ଧଶତକ ହାସଲ କରିଥିଲେ। ବୁଧବାର ଦ୍ୱିତୀୟ ଟି୨୦ ଖେଳାଯିବ। ଏହାପୂର୍ବରୁ ଭାରତର କିମ୍ବଦନ୍ତୀ ସ୍ପିନର ହରଭଜନ ସିଂହ ସୂର୍ଯ୍ୟକୁମାରଙ୍କ ପ୍ରଶଂସାରେ ଶତମୁଖ ହୋଇଛନ୍ତି। ହରଭଜନ ସୂର୍ଯ୍ୟକୁମାରଙ୍କୁ ବିରାଟ କୋହଲି ଏବଂ ରୋହିତ ଶର୍ମାଙ୍କ ଭଳି ବ୍ୟାଟ୍ସମ୍ୟାନଙ୍କ ସହ ତୁଳନା କରିଛନ୍ତି। କୋହଲି ଓ ରୋହିତଙ୍କ ପରେ ସୂର୍ଯ୍ୟକୁମାର ଜଣେ ସମ୍ପୂର୍ଣ୍ଣ ବ୍ୟାଟ୍ସମ୍ୟାନ୍ ବୋଲି ସେ କହିଛନ୍ତି।
ସ୍ପୋଟ୍ସ ଟକ୍ ସହ ଏକ ସାକ୍ଷାତକାରରେ ହରଭଜନ କହିଛନ୍ତି, ମୁଁ ବହୁ ବର୍ଷ ଧରି ସୂର୍ଯ୍ୟକୁମାରଙ୍କୁ ଅନୁସରଣ କରିଛି। ଯେତେବେଳେ ମୁଁ ମୁମ୍ବାଇ ଇଣ୍ଡିଆନ୍ସର ଅଧିନାୟକ ଥିଲିସେ ଜଣେ ଯୁବ କ୍ରିକେଟର ଥିଲେ। କିନ୍ତୁ ଆଜିର ସମୟରେ ସେ ବିରାଟ ଓ ରୋହିତଙ୍କ ପରେ ବ୍ୟାଟିଂ କ୍ଷେତ୍ରରେ ସବୁଠାରୁ ସମ୍ପୂର୍ଣ୍ଣ ଖେଳାଳି। ବିଗତ ବର୍ଷରେ ସୂର୍ଯ୍ୟକୁମାରଙ୍କୁ ଜଣେ ଖେଳାଳି ଭାବେ ଉପରକୁ ଉଠିବା ଦେଖିଛି। ସେ ଜଣେ ଅସାଧାରଣ ବ୍ୟାଟ୍ସମ୍ୟାନ୍ ଯିଏ ଦ୍ରୁତ ବୋଲିଂକୁ ଖେଳିପାରନ୍ତି। ସ୍ପିନ ଖେଳିବାକୁ ତାଙ୍କ ପାଖରେ ବହୁତ ସମୟ ଅଛି। ସେ ବିଶ୍ୱକପ୍ ଟିମ୍ ହେଉ ଅଥବା ଦିନିକିଆ କିମ୍ବା ଟି-୨୦, ବର୍ତ୍ତମାନ ସମୟରେ ଭାରତୀୟ ଦଳରେ ସୂର୍ଯ୍ୟକୁମାରଙ୍କ ଭଳି କ୍ରିକେଟର ରହିବା ଆବଶ୍ୟକ ବୋଲି ହରଭଜନ କହିଛନ୍ତି।
