ନୂଆଦିଲ୍ଲୀ,୨୪।୯: ନିର୍ବାଚନ ଆୟୋଗକୁ ନେଇ ଚାଲିଥିବା ରାଜନୈତିକ ହଟ୍ଟଗୋଳ ମଧ୍ୟରେ, ଲୋକ ସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ସମେତ ପ୍ରଧାନମନ୍ତ୍ରୀ ମୋଦି ଓ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କୁ କଡ଼ା ସମାଲୋଚନା କରିଛନ୍ତି ଏବଂ ଏହି ଷଡ଼ଯନ୍ତ୍ରରେ ସେମାନଙ୍କର ସମ୍ପୃକ୍ତି ଥିବା ଅଭିଯୋଗ କରିଛନ୍ତି। ସେ କହିଛନ୍ତି ଯେ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ତୁରନ୍ତ ଇସ୍ତଫା ଦେବା ଉଚିତ।
ଗୁରୁବାର ସାରେ ଏକ ସାମ୍ବାଦିକ ସମ୍ମିଳନୀରେ ରାହୁଲ କହିଥିଲେ, ‘ଜ୍ଞାନେଶ କୁମାର ଇସ୍ତଫା ଦେବା ଉଚିତ। ଏହି ଭୋଟ ଚୋରିକୁ ପ୍ରମାଣିତ କରିବା ପାଇଁ ଆମ ପାଖରେ ଯଥେଷ୍ଟ ପ୍ରମାଣ ରହିଛି। ଜ୍ଞାନେଶ କୁମାର ନିଜ ପଦବୀ ସମ୍ପର୍କରେ ଗମ୍ଭୀରତାର ସହ ବିଚାର କରିବା ଆବଶ୍ୟକ। ପ୍ରଧାନମନ୍ତ୍ରୀ ଏବଂ ଅମିତ ଶାହା ଏହି ଷଡ଼ଯନ୍ତ୍ରରେ ସାମିଲ ଅଛନ୍ତି।’
ସେ କହିଲେ, ‘ଏହି ଲୋକମାନେ ଦେଶବିରୋଧୀ। ୨୦୨୩ ମସିହାରୁ ଆପଣମାନେ ଦେଖିଛନ୍ତି ଯେ ମୁଁ ପ୍ରମାଣ ସହ ମୋର ସ୍ବର ଉତ୍ତୋଳନ କରିଆସୁଛି। ପ୍ରଧାନମନ୍ତ୍ରୀ ଏବଂ ସ୍ବରାଷ୍ଟ୍ରମନ୍ତ୍ରୀ ଏହି ଦେଶର ଗଣତାନ୍ତ୍ରିକ ଭିତ୍ତିଭୂମିକୁ ଦୁର୍ବଳ କରିବାକୁ ଚେଷ୍ଟା କରିଛନ୍ତି। ଏପରି କୌଣସି ପ୍ରଧାନମନ୍ତ୍ରୀ ନଥିଲେ ଯାହାଙ୍କୁ ‘ଆଣ୍ଟି-ଇନକମ୍ବେନ୍ସି’ Anti-incumbency (ସରକାରଙ୍କ ବିରୋଧୀ ଜନମତ)ର ସାମ୍ନା କରିବାକୁ ପଡ଼ିନାହିଁ। ଲୋକ ସଭା ଏବଂ ବିଧାନସଭା ନିର୍ବାଚନରେ ହେରଫେର୍ କରାଯାଇଛି। ଭୋଟ ତାଲିକାରୁ ନାମ ବାଦ ଦିଆଯାଉଛି। ଦୁଇଜଣ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ନେଇ ପ୍ରଶ୍ନ ଉଠାଇଛନ୍ତି। ସମସ୍ତ ନିର୍ବାଚନରେ ଜାଲିଆତି ହୋଇଛି। ଭାଜପା କିପରି ସବୁବେଳେ ନିର୍ବାଚନ ଜିତୁଛି? କାହିଁକି ସରକାର ବିରୋଧୀ ଜନମତର କୌଣସି ପ୍ରଭାବ ପଡ଼ୁନାହିଁ? ଭାରତରେ ପ୍ରତ୍ୟେକ ସରକାରଙ୍କୁ ଏହାର ସାମ୍ନା କରିବାକୁ ପଡ଼ିଥାଏ; ବାଂଲାଦେଶ ଯୁଦ୍ଧ ଜିତିବା ପରେ ମଧ୍ୟ ଇନ୍ଦିରା ଗାନ୍ଧୀ ହାରିଯାଇଥିଲେ – ତେବେ ଭାଜପା କ୍ଷେତ୍ରରେ ଏପରି କାହିଁକି ଘଟୁନାହିଁ? ହଠାତ ସରକାର ବିରୋଧୀ ଜନମତର ଲହରୀ କୁଆଡ଼େ ଉଭେଇ ଯାଉଛି।’ ଏବେ ଏମିତି କହି ସରକାରଙ୍କ ସହ ନିର୍ବାଚନ ଆୟୋଗଙ୍କୁ କଡ଼ା ଟାର୍ଗେଟ କରିଛନ୍ତି ରାହୁଲ ଗାନ୍ଧୀ।
