ଥୁଆମୂଳ ରାମପୁର, ୧୧।୭ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ୍ ଗୁଣୁପୁର ଗ୍ରାମପଞ୍ଚାୟତ ସ୍ଥିତ ସରକାରୀ ଉଚ୍ଚ ବିଦ୍ୟାଳୟରେ ଏକ ଅଭାବନୀୟ ଘଟଣା ଘଟିଯାଇଛି। ଶ୍ରେଣୀ ଗୃହର ବେଞ୍ଚରେ ବସିବା ଏବଂ ପୂର୍ବ ପ୍ରେମ ସମ୍ପର୍କକୁ କେନ୍ଦ୍ର କରି ଦଶମ ଶ୍ରେଣୀ ହଷ୍ଟେଲ ଛାତ୍ର ଓ ନବମ ଶ୍ରେଣୀ ଡେ-ସ୍କଲାର ଛାତ୍ରଙ୍କ ମଧ୍ୟରେ ଗତ ଗୁରୁବାର ଏକ ଉଗ୍ର ଗୋଷ୍ଠୀ ସଂଘର୍ଷ ଘଟିଛି। ଦଶମ ଶ୍ରେଣୀର ଚୈତନ୍ୟ ମାଝୀଙ୍କ ସହ ତାଙ୍କ ସାଙ୍ଗ ଚନ୍ଦୁ, ଅଭି, ନରେଶ ଓ ରାଜୁ ସଂଘବଦ୍ଧ ଭାବେ ନବମ ଶ୍ରେଣୀର ଗିରିଶ ବିଶି, କୁନ୍ମୁନ୍ ଦଳପତି ଓ ବିଶିକେଶନଙ୍କୁ ନିର୍ଦ୍ଧୁମ ମାଡ଼ ମାରିଥିଲେ। ଏହି ଆକ୍ରମଣରେ ୩ ଜଣ ଛାତ୍ର ଗୁରୁତର ଆହତ ହୋଇଛନ୍ତି। ପରେ ଗିରିଶ ତାଙ୍କ ମାମୁଁଙ୍କୁ ସ୍କୁଲକୁ ଡାକିବା ପରେ କ୍ୟାମ୍ପସରେ ପୁନଃବାର ଗଣ୍ଡଗୋଳ ହୋଇଥିଲା ଏବଂ ଦଶମ ଶ୍ରେଣୀ ଛାତ୍ରମାନେ ତାଙ୍କ ମାମୁଁଙ୍କୁ ମଧ୍ୟ ମାଡ଼ ମାରିଥିଲେ। ବର୍ତ୍ତମାନ ସେ ମଧ୍ୟ ମେଡିକାଲରେ ଚିକିତ୍ସିତ ହେଉଛନ୍ତି। ଏହା ପୂର୍ବରୁ ନବମ ଶ୍ରେଣୀର ଦୁଇ ଛାତ୍ରୀ ଖୁସି ଦୁରିଆ ଓ ଲବ୍ଲି ବାଗଙ୍କୁ ଅସଦାଚରଣ କରାଯାଇଥିବା ନେଇ ମଧ୍ୟ ଅଭିଯୋଗ ରହିଛି। ଶିକ୍ଷକଙ୍କ ଉପସ୍ଥିତିରେ ଏହି ମାରପିଟ୍ ହୋଇଥିଲେ ହେଁ ସେମାନେ କେବଳ ଦେଖଣାହାରୀ ସାଜିଥିଲେ ବୋଲି ନବମ ଶ୍ରେଣୀ ଛାତ୍ରମାନେ ଅଭିଯୋଗ ଆଣିଛନ୍ତି।
ଏହି ଘଟଣା ଏବଂ ବାହାର ଲୋକଙ୍କ ଅନୁପ୍ରବେଶ ଯୋଗୁ ବିଦ୍ୟାଳୟ ପରିସରରେ ଆତଙ୍କରାଜ ଖେଳିଯାଇଛି। ଗଣମାଧ୍ୟମ ଆଗରେ ପ୍ରତିକ୍ରିୟା ଦେଇ ପ୍ରଧାନ ଶିକ୍ଷକ ଭଗବାନ ସାହୁ କହିଛନ୍ତି ଯେ, ବାହାର ଲୋକ ଓ ଅଭିଭାବକ ସ୍କୁଲ ଭିତରକୁ ଧସେଇ ପଶୁଥିବାରୁ ଶିକ୍ଷକମାନେ ଭୟଭୀତ ଅଛନ୍ତି। ସେ ଅସନ୍ତୋଷ ପ୍ରକାଶ କରି କହିଛନ୍ତି, “ଆମେ ଚାକିରି କରୁଛୁ ମାନେ କଣ ମୁଣ୍ଡ ବିକ୍ରି କରିଛୁ କି?” ଏଥିସହ ସେ ଜିଲା ପ୍ରଶାସନକୁ ଅନୁରୋଧ କରି ବିଦ୍ୟାଳୟର ସମସ୍ତ ୯ ଜଣ ଶିକ୍ଷକ ଶିକ୍ଷୟତ୍ରୀ ଓ ୬ ଜଣ ପିଅନଙ୍କୁ ତୁରନ୍ତ ଏଠାରୁ ଗଣ-ବଦଳି କରିବାକୁ ଦାବି କରିଛନ୍ତି। ସ୍କୁଲର ପ୍ରଧାନ ଶିକ୍ଷକ ଏ ନେଇ କର୍ଲାପାଟ ଥାନାରେ ଲିଖିତ ଏତଲା ମଧ୍ୟ ଦେଇଛନ୍ତି।
ସୂଚନାଯୋଗ୍ୟ ଯେ, ସ୍କୁଲରେ ସମୁଦାୟ ୩୧୬ ଛାତ୍ରଛାତ୍ରୀଙ୍କ ମଧ୍ୟରୁ ୨ ୪୫ ଜଣ ପିଲା ହଷ୍ଟେଲରେ ରହୁଛନ୍ତି। ବର୍ତ୍ତମାନ ପରିସ୍ଥିତିର ସମାଧାନ ପାଇଁ ଜିଲା ମଙ୍ଗଳ ଅଧିକାରୀ ଜାନକୀ ବଲ୍ଲଭ ସାମନ୍ତରାୟ, ବ୍ଲକ୍ ମଙ୍ଗଳ ଅଧିକାରୀ ଶୁଭଜିତ ରଞ୍ଜନ ସ୍ୱାଇଁ ଏବଂ କର୍ଲାପାଟ ଥାନା ଅଧିକାରୀ ଶ୍ରୀକାନ୍ତ କୋଳକା ସ୍କୁଲରେ ପହଞ୍ଚିଥିଲେ। ସେଠାରେ ଛାତ୍ରଛାତ୍ରୀ, ଅଭିଭାବକ ଓ ଶିକ୍ଷକ ଶିକ୍ଷୟତ୍ରୀଙ୍କ ସହ ଆଲୋଚନା କରି ଏକ ଲିଖିତ ଆପୋଷ ବୁଝାମଣା ପତ୍ର ଜରିଆରେ ବର୍ତ୍ତମାନ ସ୍ଥିତିକୁ ଶାନ୍ତ କରାଯାଇଛି।
