ଅହମ୍ମଦାବାଦ,୨୨।୮: ଗୁଜରାଟ ବିଧାନସଭା ନିର୍ବାଚନ ଯେତିକି ପାଖେଇ ଆସୁଛି ରାଜନୈତିକ ଉଷ୍ମତା ସେତିକି ସରଗରମ ହେବାରେ ଲାଗିଛି। ଏଭଳି ସ୍ଥିତିରେ ଆମ ଆଦମୀ ପାର୍ଟି(ଏଏପି) ରାଜ୍ୟରେ ସରକାର ଗଠନ କରିବା ପାଇଁ ଏବେଠୁ କସରତ କରୁଛି। ଇତିମଧ୍ୟରେ ସୋମବାର ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବଂ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ଗୁଜରାଟ ଗସ୍ତରେ ଅଛନ୍ତି। ଏକ ସଭାକୁ ମୁଖ୍ୟମନ୍ତ୍ରୀ କେଜ୍ରିଓ୍ବାଲ ସମ୍ବୋଧନ କରି ଗୁଜରାଟବାସୀଙ୍କୁ ୫ଟି ପ୍ରତିଶ୍ରୁତି ଦେଇଛନ୍ତି। ଗୁଜରାଟରେ ଏଏପି ସରକାର କ୍ଷମତାକୁ ଆସେ ତେବେ ଦିଲ୍ଲୀ ମଡେଲ ଗୁଜରାଟରେ ଲାଗୁ କରାଯିବ। ଏପରିକି ଲୋକଙ୍କୁ ମାଗଣା ସ୍ବାସ୍ଥ୍ୟ, ବିଦ୍ୟୁତ୍, ପରିବହନ, ଜଳ ଏବଂ ଶିକ୍ଷା ଯୋଗାଇଦିଆଯିବ ବୋଲି କେଜ୍ରିଓ୍ବାଲ କହିଛନ୍ତି। ଅନ୍ୟପଟେ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ କହିଛନ୍ତି, ଭାରତକୁ ଶକ୍ତିଶାଳୀ ତଥା ଏକ ନମ୍ବର କରିବା ପାଇଁ ଉତ୍ତମ ଶିକ୍ଷା ଆବଶ୍ୟକ। ଅରବିନ୍ଦ କେଜ୍ରିୱାଲଙ୍କ ନେତୃତ୍ୱରେ ଦିଲ୍ଲୀରେ ଭଲ ଶିକ୍ଷା ବ୍ୟବସ୍ଥା କରାଯାଇଛି। ବର୍ତ୍ତମାନ ପଞ୍ଜାବରେ ମଧ୍ୟ ଭଲ ଶିକ୍ଷା ବ୍ୟବସ୍ଥା ଆରମ୍ଭ ହୋଇଛି। ଗୁଜରାଟରେ ସମସ୍ତ ପିଲାଙ୍କର ଭଲ ଶିକ୍ଷା ପାଇବାର ଅଧିକାର ଅଛି ବୋଲି ସେ କହିଛନ୍ତି। ଅରବିନ୍ଦ କେଜ୍ରିଓ୍ବାଲଙ୍କୁ ଥରେ ସୁଯୋଗ ଦେବାକୁ ସିସୋଡିଆ ଜନସାଧାରଣଙ୍କୁ ଆହ୍ବାନ କରିଛନ୍ତି।
