ମୋରବି,୩୧ ।୧୦: ଗୁଜରାଟ ମୋରବିରେ ମଚ୍ଛୁ ନଦୀ ଉପରେ ନିର୍ମାଣ କରାଯାଇଥିବା କେବଳ ବ୍ରିଜ ରବିବାର ହଠାତ୍ ଭୁଷୁଡି ପଡିବା ଫଳରେ ଏବେ ପର୍ଯ୍ୟନ୍ତ ମୃତକଙ୍କ ସଂଖ୍ୟା ୧୦୦ ଟପିଲାଣି । ହସ୍ପିଟାଲ ପକ୍ଷରୁ ମଳିଥିବା ଏହି ସୂଚନା ଅନୁଯାୟୀ, ଏବେ ୭୦ ଆହତ ହୋଇଥିବା ବେଳେ ୫୦ରୁ ଅଧିକ ନିଖୋଜ ଅଛନ୍ତି । ଫସି ରହିଥିବା ଲୋକଙ୍କୁ ଉଦ୍ଧାର କରିବା ଲାଗି ରେସକ୍ୟୁ ଅପରେଶନ ଜାରି ରହିଛି ।
ଏହି ଦୁର୍ଘଟଣା ପରେ ଗୁଜରାଟ ମୁଖ୍ୟମନ୍ତ୍ରୀ ଭୁପେନ୍ଦ୍ର ପଟେଲ ହସ୍ପିଟାଲ ପହଞ୍ଚି ଆହତଙ୍କୁ ଭେଟିଛନ୍ତି । ବ୍ରିଜ ଭୁଷୁଡି ପଡିବା ପରେ ମୁଖ୍ୟମନ୍ତ୍ରୀ ଏକ ସମିକ୍ଷା ବୈଠକ ଡାକିଥିଲେ । ଯେଉଁଥିରେ ତାଙ୍କ କ୍ୟାବିନେଟର ମନ୍ତ୍ରୀ, ଏମପି, ବିଧାୟକ ଓ ସ୍ୱାସ୍ଥ୍ୟ ବିଭାଗ ସହ ଜଡିତ ଅଧିକାରୀ ସାମିଲ ହୋଇଥିଲେ । ଏହି ବୈଠକରେ ସ୍ଥିତିର ସମିକ୍ଷା କରାଯାଇଥିଲା । ଏହାସହ ଘଟଣାର ଯାଞ୍ଚ ପାଇଁ ଏସଆଇଟିର ୫ ସଦସ୍ୟ ବିଶିଷ୍ଟ ସମିତି ଗଠନ କରାଯାଇଛି । ଏହି ଘଟଣା ପରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଟୁଇଟ କରି ସମବେଦନା ଜଣାଇଛନ୍ତି । ସେ ଲେଖିଛନ୍ତି ଗୁଜରାଟର ମୋରବିରେ ହୋଇଥିବା ଏହି ଘଟଣା ପାଇଁ ମୁଁ ଚିନ୍ତିତ । ମୋର ସମ୍ବେଦନା ପ୍ରଭାବିତ ଲୋକଙ୍କ ପ୍ରତି ରହିଛି ।
ସୂଚନାଯୋଗ୍ୟ, ଆବଶ୍ୟକତାଠାରୁ ଅଧିକ ଲୋକ ପୋଲ ଉପରେ ଥିବାରୁ ଏହି ଦୁର୍ଘଟଣା ଘଟିଥିବା କୁହାଯାଉଛି । ପୋଲଟି ପ୍ରଥମେ ଦୋହଲିବା ସହ ଲଟକି ଯାଇ ମଡ ମଡ ହୋଇ ଭାଙ୍ଗି ପଡିଥିବା ପ୍ରତ୍ୟକ୍ଷଦର୍ଶୀ କହୁଛନ୍ତି । ଉଦ୍ଧାର କାର୍ଯ୍ୟରେ ସ୍ଥାନୀୟ ଲୋକେ ଖୁବ୍ ସହଯୋଗ କରିଛନ୍ତି ।
