ମୋରବି,୩୧ ।୧୦: ଗୁଜରାଟର ମୋରବିରେ ରବିବାର ସନ୍ଧ୍ୟାରେ ଏକ ବଡ ଦୁର୍ଘଟଣା ଘଟିଯାଇଛି । ଏଠାରେ ଥିବା କେବଳ ବ୍ରିଜ ହଠାତ୍ ଭାଙ୍ଗିଯିବା ଫଳରେ ଲୋକେ ନଦୀ ମଧ୍ୟରେ ପଡି ଯାଇଥିଲେ । ପୋଲ ଉପରେ କ୍ଷମତାଠାରୁ ଅଧିକ ଲୋକେ ଜମା ହୋଇଯିବାରୁ ଏହି ଦୁର୍ଘଟଣା ଘଟିଥିବା କୁହାଯାଉଛି । ଏହି ଘଟଣାରେ ଏବେ ପର୍ଯ୍ୟନ୍ତ ମୃତକଙ୍କ ସଂଖ୍ୟା ୧୦୦ ଟପିଥିବା ହସ୍ପିଟାଲ ପକ୍ଷରୁ ସୂଚନା ଦିଆଯାଇଛି । ତେବେ ଏହି ଦୁର୍ଘଟଣା ପରେ ଗୁଜରାଟ ମୁଖ୍ୟମନ୍ତ୍ରୀ ଘଟଣା ସ୍ଥଳରେ ପହଞ୍ଚିଥିଲେ ।
ସୂଚନାଯୋଗ୍ୟ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବେ ଗୁଜରାଟ ଗସ୍ତରେ ଅଛନ୍ତି । ରବିବାର ସେ ତାଙ୍କ ୩ ଦିନିଆ ଗୁଜରାଟ ଗସ୍ତ ଆରମ୍ଭ କରିଥିଲେ । ତେବେ ସୋମବାର ଅହମଦାବାଦରେ ହେବାକୁ ଥିବା ମୋଦିଙ୍କ ସାର୍ବଜନିକ ରୋଡ ଶୋ’କୁ ରଦ୍ଦ କରି ଦିଆଯାଇଛି । ଏହି ଘଟଣା ପରେ ମୋଦିଙ୍କ କାର୍ଯ୍ୟକ୍ରମରେ ପରିବର୍ତ୍ତନ କରାଯାଇଛି । ଏହାସହ ପ୍ରଧାନମନ୍ତ୍ରୀଙ୍କ ଗାନ୍ଧିନଗରରେ ଥିବା ପେଜ ସମିତି କାର୍ଯ୍ୟକ୍ରମକୁ ବି ସ୍ଥଗିତ କରିଦିଆଯାଇଛି । ଏହା ୧ ନଭେମ୍ବରରେ ହେବାର ଥିଲା । ଏହି କାର୍ଯ୍ୟକ୍ରମରେ ମୋଦି ୧୮୨ ନିର୍ବାଚନ ମଣ୍ଡଳୀର କର୍ମୀଙ୍କୁ ସମ୍ବୋଧନ ଦେବାର ଥିଲା । ମୋଦିଙ୍କ ଏହି ସମ୍ପୂର୍ଣ୍ଣ କାର୍ଯ୍ୟକ୍ରମ ଗାନ୍ଧିନଗରରେ ଆୟୋଜିତ ହେବାର ଥିଲା । ସୂଚନାଯୋଗ୍ୟ, ଏହି ପୋଲଟି କିଛିଦନ ପୂର୍ବରୁ ରିନୋଭେଶନ ପରେ ଖୋଲି ଦିଆଯାଇଥିଲା ।
