ଆନନ୍ଦପୁର,୨୩ା୧୧(ସ୍ବ.ପ୍ର.): ଦୁର୍ଘଟଣାକୁ କେନ୍ଦ୍ର କରି ଆନନ୍ଦପୁର ସହରରେ ଦୁଇ ଗୋଷ୍ଠୀ ମଧ୍ୟରେ ବିବାଦର ସୂତ୍ରପାତ ହୋଇଛି। ଉଭୟପକ୍ଷର ଆଭିଯୋଗକୁ ଆଧାର କରି ଆନନ୍ଦପୁର ପୋଲିସ ଦୁଇଟି ମାମଲା ରୁଜୁ କରିବା ସହିତ ଘଟଣାର ତଦନ୍ତ ଆରମ୍ଭ କରିଛି। ଘଟଣାକ୍ରମରେ ଆନନ୍ଦପୁର ପୌରପରିଷଦ ୪ ନଂ ଓାର୍ଡ଼ର ରବିନ୍ଦ୍ର କୁମାର ସାହୁଙ୍କ ଝିଅ ପାଠ ପଢୁଥିବା ସରକାରୀ ବାଳିକା ଉଚ୍ଚ ବିଦ୍ୟାଳୟ ଛୁଟି ହେବା ପରେ ୪ଟାରେ ଘରକୁ ଫେରିବା ସମୟରେ ସେକ୍ ଲାଲଟୁ ନାମକ ଜଣେ ବଙ୍ଗୀୟ ମିସ୍ତ୍ରୀଙ୍କ ବାଇକ୍ ଧକ୍କାରେ ଆହତ ହୋଇଥିଲେ। ସଂମ୍ପୃକ୍ତ ବଙ୍ଗୀୟ ମିସ୍ତ୍ରୀ ବାଇକ୍ ଛାଡ଼ି ଘଟଣାସ୍ଥଳରୁ ଫେରାର ହୋଇଯାଇଥିଲେ। ଆହତ ଅବସ୍ଥାରେ ନାବାଳିକାଙ୍କୁ ଆନନ୍ଦପୁର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ଏଭଳି ଘଟଣାକୁ ନେଇ ଆନନ୍ଦପୁରର ଦୁଇ ଗୋଷ୍ଠୀ ମଧ୍ୟରେ ବାକ୍ ଯୁଦ୍ଧ ସହିତ ବିବାଦର ସୂତ୍ରପାତ ହୋଇଥିଲା। ଦୁର୍ଘଟଣାର ଶିକାର ହୋଇଥିବା ନାବାଳିକାଙ୍କ ଘରକୁ ଯାଇ କିଛି ଯୁବକ ପରିବାରବର୍ଗଙ୍କୁ ଆକ୍ରମଣ କରିଥିବା ଅଭିଯୋଗ ଆଧାରରେ ଆନନ୍ଦପୁର ଥାନା କେସ୍ ନଂ ୨୮୮/୨୨ରେ ୬ ଜଣଙ୍କ ନାମରେ ମାମଲା ରୁଜୁ ହୋଇଛି। ସେହିଭଳି ବାଇକ୍ ଦୁର୍ଘଟଣା ଘଟାଇଥିବା ବଙ୍ଗୀୟ ଯୁବକ ଲାଲଟୁ ମଧ୍ୟ ଦୁର୍ଘଟଣାର ଶିକାର ହୋଇଥିବା ନାବାଳିକାଙ୍କ ପରିବାରବର୍ଗଙ୍କ ଆକ୍ରମଣର ଶିକାର ହୋଇଥିବା ନେଇ ପାଲଟା ଅଭିଯୋଗ ହୋଇଛି। କେସ୍ ନଂ ୨୮୯/୨୨ରେ ମାମଲା ରୁଜୁ ହୋଇଥିବା ବେଳେ ପୋଲିସ ଘଟଣାର ତଦନ୍ତ ଆରମ୍ଭ କରିଛି।
