କୋରାପୁଟ,୨୫।୮(ଅମିତାଭ ବେହେରା): ସନ୍ଥ ଶିରୋମଣି ଗୁରୁ ରବିଦାସଜୀଙ୍କ ୬୫୦ତମ ଜୟନ୍ତୀ ଅବସରରେ ସାମାଜିକ ସମରସତା ଓ ଭାଇଚାରାର ବାର୍ତ୍ତା ନେଇ ଆୟୋଜିତ ‘ସମରସ ସଂକଳ୍ପ ଅଭିଯାନ’ର ପବିତ୍ର ଚନ୍ଦନ କଳସ ଯାତ୍ରା ମଙ୍ଗଳବାର କୋରାପୁଟରେ ପହଞ୍ଚିଥିଲା। ଏହି ଅବସରରେ ଚନ୍ଦନ କଳସ ଯାତ୍ରାକୁ ଭବ୍ୟ ସ୍ବାଗତ କରାଯାଇଥିଲା। ସ୍ଥାନୀୟ ସ୍ବତନ୍ତ୍ର ସର୍କିଟ ହାଉସ ଛକରେ ରାଜ୍ୟ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ, କୋରାପୁଟ ବିଧାୟକ ରଘୁରାମ ମାଛ ପବିତ୍ର ଚନ୍ଦନ କଳସର ପୂଜାର୍ଚ୍ଚନା କରିଥିଲେ।
ପରେ ବାଜା ବାଜଣା ସହ ଶୋଭାଯାତ୍ରାରେ କଳସକୁ ସହର ପରିକ୍ରମା କରାଯାଇ ଶେଷରେ କୋରାପୁଟ ଟାଉନହଲକୁ ନେଇଥିଲେ। ସେଠାରେ ଆୟୋଜିତ କାର୍ଯ୍ୟକ୍ରମରେ ଚନ୍ଦନ କଳସ ଯାତ୍ରାର ଉଦ୍ଦେଶ୍ୟ ସମ୍ପର୍କରେ ମନ୍ତ୍ରୀ ଗଣ୍ଡ ଆଲୋକପାତ କରିଥିଲେ। ଗୁରୁ ରବିଦାସଜୀଙ୍କ ଆଦର୍ଶ, ମାନବବାଦୀ ଚିନ୍ତାଧାରା ଓ ସମାନତାର ବାର୍ତ୍ତାକୁ ସମାଜର ସମସ୍ତ ବର୍ଗଙ୍କ ନିକଟରେ ପହଞ୍ଚାଇବା ଉପରେ ଗୁରୁତ୍ୱ ଦେଇଥିଲେ। ସମାଜରେ ଭାଇଚାରା, ଏକତା ଓ ସମରସତା ବଜାୟ ରଖିବାକୁ ଆହ୍ବାନ ଦିଆଯାଇଥିଲା।
ଏହି ଅବସରରେ ଭାଜପା ରାଜ୍ୟ ସମ୍ପାଦିକା ପୂର୍ଣ୍ଣିମା ନାୟକ, ଭାଜପା ଜିଲା ସଭାପତି ଶିବ ମୁଦୁଲି, ବିଲାପୁଟ ଶବରୀ ଜଗନ୍ନାଥ ମନ୍ଦିରର ସମ୍ପାଦକ ଲଳିତ ମୋହନ ପଟ୍ଟନାୟକଙ୍କ ସମେତ ଭାଜପାର ବହୁ କର୍ମକର୍ତ୍ତା, ଶ୍ରଦ୍ଧାଳୁ, ବୁଦ୍ଧିଜୀବୀ ପ୍ରମୁଖ ଉପସ୍ଥିତ ରହି ଏହି କଳସକୁ ସ୍ବାଗତ କରିଥିଲେ।
