ହରାରେ, ୨୩।୫ : ମିଳୁନାହାନ୍ତି ସ୍ପନସର। ଏଥି ଯୋଗୁ ପ୍ରତ୍ୟେକ ସିରିଜ୍ ପୂର୍ବରୁ ବୁଟ୍ରେ ଅଠା ମାରି ଖେଳିବାକୁ ପଡ଼ୁଛି ବୋଲି ଟୁଇଟ୍ କରିଛନ୍ତି ଜିମ୍ବାଓ୍ବେ ବ୍ୟାଟ୍ସମ୍ୟାନ ରିଆନ ବୁର୍ଲ। ଏଥିସହ ଏକ ଫଟୋ ଶେୟାର କରିଛନ୍ତି, ଯେଉଁଥିରେ ଛିଣ୍ଡା ବୁଟ୍ରେ ଅଠା ଲଗାଯାଉଥିବା ଦେଖିବାକୁ ମିଳିଛି। ୨୭ ବର୍ଷୀୟ କ୍ରିକେଟରଙ୍କ ଟୁଇଟ୍ ପରେ ବହୁ ସଂଖ୍ୟାରେ ପ୍ରଶଂସକମାନେ ଜିମ୍ବାଓ୍ବେ କ୍ରିକେଟକୁ ସମର୍ଥନ କରିଛନ୍ତି।
ବିସିସିଆଇ, ଇସିବି ଓ ସିଏ ଭଳି କ୍ରିକେଟ ବୋର୍ଡକୁ ଜିମ୍ବାଓ୍ବେ ଗସ୍ତ ବାତିଲ ନ କରିବାକୁ ଅନୁରୋଧ କରିଛନ୍ତି ପ୍ରଶଂସକମାନେ। ଏହା ଦ୍ୱାରା ସେମାନଙ୍କୁ ଅଭିଜ୍ଞତା ଓ ଆବଶ୍ୟକ ଟଙ୍କା ମିଳୁଛି। ଦିନେ ଜିମ୍ବାଓ୍ବେ ନିକଟରେ ଭଲ ଦଳ ଥିଲା। ବର୍ତ୍ତମାନ ଦଳ ପାଖରେ ମଧ୍ୟ ଦକ୍ଷତା ରହିଛି। ସେମାନଙ୍କୁ ଅଣଦେଖା କର ନାହିଁ। ବହୁ ସଂଖ୍ୟାରେ ପ୍ରଶଂସକ ବିଶ୍ୱ କ୍ରିକେଟର ବଡ଼ ବଡ଼ ବୋର୍ଡ ଜିମ୍ବାଓ୍ବେର ସାହାଯ୍ୟ ପାଇଁ ଆଗେଇ ଆସିବାକୁ ଅନୁରୋଧ କରିଛନ୍ତି।
ନିକଟରେ ପାକିସ୍ତାନ ବିପକ୍ଷ ଟେଷ୍ଟ ସିରିଜ୍ରେ ଶୋଚନୀୟ ପରାଜୟ ବରଣ କରିଥିଲା ଜିମ୍ବାଓ୍ବେ। କିନ୍ତୁ ଟି୨୦ ସିରିଜ୍ରେ ଦୁର୍ବଳ ଜିମ୍ବାଓ୍ବେ ଭଲ ପ୍ରଦର୍ଶନ କରିଥିଲା। ପାକିସ୍ତାନକୁ ଦ୍ୱିତୀୟ ମ୍ୟାଚ୍ରେ ୯୯ ରନ୍ରେ ଅଲଆଉଟ୍ କରି ଦେଇଥିଲା।
