ମୁମ୍ବାଇ,୧।୪: ଚେନ୍ନାଇ ସୁପର କିଙ୍ଗ୍ସ ୨୧୧ ରନ୍ର ଟାର୍ଗେଟ ଛିଡ଼ା କରିବା ପରେ ମଧ୍ୟ ଲକ୍ଷ୍ନୌ ସୁପର ଜ୍ୟାଣ୍ଟ୍ସଠାରୁ ୬ ଉଇକେଟରେ ପରାସ୍ତ ହୋଇଛି। ଡିଫେଣ୍ଡିଂ ଚାମ୍ପିୟନ ଦଳର ପରାଜୟ ପରେ ଅଲରାଉଣ୍ଡର ଶିବମ ଦୁବେଙ୍କୁ ସମାଲୋଚନା କରିଛନ୍ତି ପୂର୍ବତନ ଭାରତୀୟ ଅଧିନାୟକ ସୁନୀଲ ଗାଭାସ୍କର।
ଅନ୍ତିମ ଦୁଇ ଓଭରରେ ଏଲ୍ଏସ୍ଜିକୁ ୩୪ ରନ୍ ଦରକାର ଥିଲା। ୧୯ତମ ଓଭରରେ ଶିଭମ ଦୁବେ ୨୫ ରନ୍ ଖର୍ଚ୍ଚ କରିଥିଲେ। ଏଣୁ ଅନ୍ତିମ ଓଭରରେ ବିଜୟ କେବଳ ଔପଚାରିକ ହୋଇଯାଇଥିଲା। ପୂରା ଓଭରରେ ସେ ଲେନ୍ଥ ବଲ ହିଁ ପକାଇଥିଲେ। ଫଳରେ ଇଭିନ ଲୁଇସ ଏବଂ ଯୁବ ଖେଳାଳି ଆୟୁଷ ବଦୋନି ବଡ଼ ବଡ଼ ଶଟ୍ ଖେଳି ମ୍ୟାଚ୍ ଛଡ଼ାଇ ନେଇଥିଲେ।
“ସେ ଆବଶ୍ୟକ ପରିମାଣର ସୀମିତ ଓଭର ମ୍ୟାଚ୍ ଖେଳିସାରିଲେଣି। ତା’ ପରେ ବି ସେ ବାରମ୍ଭାର ଲେନ୍ଥ ବଲ ପକାଉଛନ୍ତି। ହଁ, ମ୍ୟାଚ୍ରେ ବିଲକୁଲ ବୋଲିଂ କରି ନ ଥିବା ବୋଲରଙ୍କୁ ୧୯ତମ ଓଭର ଦେବା ଉଚିତ ନୁହେଁ। କାରଣ ବ୍ୟାଟର ବଡ଼ ଶଟ୍ ଖେଳିବେ। କିନ୍ତୁ ସେ ଲେନ୍ଥ ବଲ ପକାଇଥିଲେ। ସେ ଧିମା ବଲର ବ୍ୟବହାର କରୁଛନ୍ତି, ଯାହାକି ଟର୍ନିଂ ଏବଂ ଡ୍ରାଏ ପିଚ୍ରେ ଉପଯୋଗୀ। ହେଲେ ଯେଉଁ ପିଚ୍ରେ ବଲ ବ୍ୟାଟକୁ ଭଲ ଗତିରେ ଆସୁଛି, ଏହା କାମ ଦେବ ନାହିଁ। ସିଏସ୍କେର ବୋଲିଂ କାଲକ୍ୟୁଲେଶନ ଭୁଲ ସାବ୍ୟସ୍ତ ହୋଇଛି। ଏହା ସ୍ବୀକାର କରିବାକୁ ପଡ଼ିବ। ଲେନ୍ଥ ବଲକୁ ଏଭଳି ପିଚ୍ରେ ଉଠାଇ ମାରିବା ସହଜ। ଏହା ସ୍ପଷ୍ଟ ଯେ, ସେ କିଛି ବି ଶିକ୍ଷା କରି ନାହାନ୍ତି” ବୋଲି ଗାଭାସ୍କର କମେଣ୍ଟ୍ରି ବେଳେ କହିଛନ୍ତି।
