ଗଞ୍ଜାମ, ୨୩।୬ (ବିଦ୍ୟାଧର ସାହୁ): ଗଞ୍ଜାମ ସହରରେ ଅବସ୍ଥିତ ପ୍ରତିଷ୍ଠିତ ଶିଳ୍ପ ସଂସ୍ଥା ଗ୍ରାସିମ୍ ଇଣ୍ଡଷ୍ଟ୍ରିଜ୍କୁ ସାମାଜିକ ଦାୟିତ୍ୱବୋଧ ଏବଂ ପରିବେଶ ପରିଚାଳନା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ସ୍ୱର୍ଣ୍ଣ ବର୍ଗରେ ମର୍ଯ୍ୟାଦାଜନକ ‘କଳିଙ୍ଗ ସିଏସଆର (କର୍ପୋରେଟ୍ ସାମାଜିକ ଦାୟିତ୍ୱ) ଏବଂ ଇଏସଜି (ପରିବେଶ, ସାମାଜିକ ଓ ସୁଶାସନ) ଉତ୍କର୍ଷ ଜାତୀୟ ପୁରସ୍କାର-୨୦୨୫’ ପ୍ରଦାନ କରାଯାଇଛି।
ଗତ ରବିବାର ଭୁବନେଶ୍ୱରସ୍ଥିତ ହୋଟେଲ ‘ଦି ପ୍ରାଚୀ’ରେ ଆୟୋଜିତ ୧୧ତମ ଜାତୀୟ ପରିବେଶ, ଶକ୍ତି ଏବଂ ଜଳବାୟୁ ପରିବର୍ତ୍ତନ ସମ୍ମିଳନୀ-୨୦୨୬ ଅବସରରେ ଏହି ପୁରସ୍କାର ପ୍ରଦାନ ଉତ୍ସବ ଅନୁଷ୍ଠିତ ହୋଇଥିଲା। ଏହି ସମ୍ମିଳନୀଟି ଆଇକ୍ୟୁଇଏମଏସ (IQEMS) ପକ୍ଷରୁ ଆୟୋଜିତ ହୋଇଥିଲା।
ଏହି ଭବ୍ୟ ଉତ୍ସବରେ ସିଏସଆଇଆର-ଆଇଏମଏମଟି (କାଉନସିଲ୍ ଅଫ୍ ସାଇଣ୍ଟିଫିକ୍ ଆଣ୍ଡ ଇଣ୍ଡଷ୍ଟ୍ରିଆଲ୍ ରିସର୍ଚ୍ଚ–ଇନଷ୍ଟିଚ୍ୟୁଟ୍ ଅଫ୍ ମିନେରାଲ୍ସ ଆଣ୍ଡ ମ୍ୟାଟେରିଆଲ୍ସ ଟେକ୍ନୋଲୋଜି)ର ନିର୍ଦ୍ଦେଶକ ଡ଼. ରାମାନୁଜ ନାରାୟଣ ଏବଂ ଆଇକ୍ୟୁଇଏମଏସର ସଂଯୋଜକ ଦେବବ୍ରତ ପାଣିଗ୍ରାହୀଙ୍କ ଠାରୁ ଗ୍ରାସିମ୍ ଇଣ୍ଡଷ୍ଟ୍ରିଜ୍ର ୟୁନିଟ୍ ମୁଖ୍ୟ ଜୟଦୀପ ମଣ୍ଡଳ, ବୈଷୟିକ ମୁଖ୍ୟ ରାକେଶ ସିଂ, ଲୋକସମ୍ପର୍କ, ଯୋଗାଯୋଗ ଓ ସାମାଜିକ ଉତ୍ତରଦାୟିତ୍ୱ ମୁଖ୍ୟ ସୁସ୍ମିତା ବେହେରା ଏବଂ ପରିବେଶ ବିଭାଗ ମୁଖ୍ୟ ସୁଚିସ୍ମିତା ପଟ୍ଟନାୟକ ପୁରସ୍କାର ଗ୍ରହଣ କରିଥିଲେ।
ଉତ୍ସବରେ ଅନ୍ୟ ବିଶିଷ୍ଟ ଅତିଥିମାନଙ୍କ ମଧ୍ୟରେ ପୂର୍ବତନ ବିଧାୟକ ପ୍ରିୟଦର୍ଶୀ ମିଶ୍ର, ଇଣ୍ଡୋ-ବ୍ରାଜିଲ୍ ଚାମ୍ବର ଅଫ୍ କମର୍ସର ମୁଖ୍ୟ ସୁଶ୍ରୀ ଡାନା ବ୍ଲାକମ୍ୟାନ୍ ଏବଂ ଟୋଗୋ ଗଣରାଜ୍ୟର ମହାମହିମ ଉଚ୍ଚାୟୁକ୍ତ ୟାଓ ଏଡେମ୍ ଏକପେମାଡୋ ପ୍ରମୁଖ ଉପସ୍ଥିତ ରହି ପୁରସ୍କାର ପ୍ରଦାନ କରିଥିଲେ।
ଗ୍ରାସିମ୍ ଇଣ୍ଡଷ୍ଟ୍ରିଜ୍କୁ ଏହି ଜାତୀୟ ସ୍ତରର ସମ୍ମାନ ମିଳିବା ଫଳରେ ଗଞ୍ଜାମ ଅଞ୍ଚଳ ସମେତ ସମଗ୍ର ରାଜ୍ୟ ପାଇଁ ଗୌରବର ବିଷୟ ପାଲଟିଛି। ସଂସ୍ଥା ପକ୍ଷରୁ ସାମାଜିକ କଲ୍ୟାଣ, ପରିବେଶ ସୁରକ୍ଷା ଏବଂ ସୁଶାସନ କ୍ଷେତ୍ରରେ ନିଆଯାଉଥିବା ବିଭିନ୍ନ ପଦକ୍ଷେପ ଏହି ସମ୍ମାନର ମୂଳ ଆଧାର ବୋଲି ମତ ପ୍ରକାଶ ପାଇଛି।
