ନୂଆଦିଲ୍ଲୀ,୧୯ା୯: ରାଜଧାନୀ ନୂଆଦିଲ୍ଲୀରେ ପୁଣି ଏକ ଭୟଙ୍କର ଓ ନୃଶଂସ ଅପରାଧ ସାମ୍ନାକୁ ଆସିଛି। ଜଣେ ୧୭ ବର୍ଷୀୟା ନାବାଳିକାଙ୍କୁ ଗଣବଳାତ୍କାର ପରେ ଛୁରିରେ ଭୁସି ହତ୍ୟା କରାଯାଇଛି। ଏହାପରେ ମୃତଦେହକୁ ଏକ ଖୋଲା ପଡ଼ିଆରେ ଫିଙ୍ଗି ଦିଆଯାଇଛି। ଏହି ସମ୍ବେଦନଶୀଳ ମାମଲାରେ ପୋଲିସ ୩ ଜଣ ନାବାଳକଙ୍କ ସମେତ ମୋଟ ୪ ଜଣଙ୍କୁ ଧରିଛି। ପୋଲିସ ଦେଇଥିବା ସୂଚନା ଅନୁଯାୟୀ, ମୃତଦେହଟି ଏତେ ପରିମାଣରେ ପଚିଯାଇଥିଲା ଯେ ପ୍ରଥମେ ଏହାର ଲିଙ୍ଗ ସ୍ପଷ୍ଟ ଜଣାପଡ଼ୁ ନ ଥିଲା। ପୋଲିସ ପକ୍ଷରୁ ଗୁରୁବାର ଏହି ଘଟଣାର ପର୍ଦ୍ଦାଫାଶ କରାଯାଇଛି।
ସେପ୍ଟେମ୍ବର ୧୩ରେ କୁଶକ ରୋଡ୍ସ୍ଥିତ ଜୟପାଲ ରାଣାଙ୍କ ଜମି ନିକଟରୁ ନାବାଳିକାଙ୍କ ପଚାଶଢ଼ା ମୃତଦେହ ମିଳିଥିଲା। ମୃତଦେହର କିଛି ଅଂଶକୁ ବୁଲା କୁକୁରମାନେ ଖାଇଦେଇଥିବା ବେଳେ ଗୋଟିଏ ହାତ ଶରୀରରୁ ଅଲଗା ହୋଇପଡ଼ିଥିଲା। ଗିରଫ ହୋଇଥିବା ସାବାଳକ ଅଭିଯୁକ୍ତଜଣକ ଖଡ୍ଡା କଲୋନିର ଶିବମ୍ ଓରଫ୍ ସୁଦାମା ଓରଫ୍ ଚୁଚୁ ବୋଲି ଚିହ୍ନଟ ହୋଇଛନ୍ତି। ଅନ୍ୟ ୩ ଜଣ ଅଭିଯୁକ୍ତ ନାବାଳକ (ବୟସ ୧୬ ଓ ୧୭ ବର୍ଷ)। ପୋଲିସ ତଦନ୍ତ ଅନୁଯାୟୀ, ନାବାଳିକା ଜଣକ ଅଭିଯୁକ୍ତମାନଙ୍କୁ ପୂର୍ବରୁ ଜାଣିଥିଲେ। ଅଭିଯୁକ୍ତମାନେ ମିଶି ଏକ ଅଟୋରିକ୍ସା ଭିତରେ ମଦ୍ୟପାନ କରିବା ପରେ ନାବାଳିକାଙ୍କୁ ଗଣବଳାତ୍କାର କରାଯାଇଥିଲା ଏବଂ ପରେ ହତ୍ୟା କରାଯାଇ ମୃତଦେହ ଫିଙ୍ଗି ଦିଆଯାଇଥିଲା। ପରିବାର ଲୋକଙ୍କ କହିବା ଅନୁଯାୟୀ, ଝିଅଟି ପ୍ରାୟତଃ ଘରୁ ବାହାରକୁ ଯାଇ କିଛି ଦିନ ପରେ ଫେରୁଥିବାରୁ ସେମାନେ ପୋଲିସରେ କୌଣସି ନିଖୋଜ ଅଭିଯୋଗ କରି ନ ଥିଲେ। ଘଟଣାସ୍ଥଳରେ କୌଣସି ପ୍ରତ୍ୟକ୍ଷଦର୍ଶୀ ନ ଥିବାରୁ ପୋଲିସ ସମ୍ପୃକ୍ତ ଅଞ୍ଚଳ ଓ ଆଖପାଖ ରାସ୍ତାର ୫୦ରୁ ଅଧିକ ସିସିଟିଭି କ୍ୟାମେରା ଫୁଟେଜ୍ ସମୀକ୍ଷା କରିଥିଲା। ସିସିଟିଭିରେ ଗୋଟିଏ ସନ୍ଦିଗ୍ଧ ଅଟୋରିକ୍ସାର ଗତିବିଧି ନଜରକୁ ଆସିଥିଲା। ଅନ୍ଧାର ଯୋଗୁ ଗାଡ଼ି ନମ୍ବର ସ୍ପଷ୍ଟ ଦିଶୁ ନ ଥିବାରୁ ପୋଲିସ ବିଭିନ୍ନ ସ୍ଥାନର କ୍ୟାମେରା ଯାଞ୍ଚ କରି ଏହାର ପିଛା କରିଥିଲା। ସେପ୍ଟେମ୍ବର ୧୫ ଏବଂ ୧୬ ତାରିଖ ରାତିରେ ଏକ ବ୍ୟାପକ ସର୍ଚ୍ଚ ଅପରେଶନ କରାଯାଇ ସ୍ବରୂପ ନଗରର ଖଡ୍ଡା କଲୋନିରୁ ଅଟୋରିକ୍ସାକୁ ଠାବ କରାଯାଇ ଚାଳକଙ୍କୁ ଜେରା କରାଯାଇଥିଲା। ଜେରା ଆଧାରରେ ୪ ଜଣ ଅଭିଯୁକ୍ତଙ୍କୁ ଅଟକ ରଖାଯିବା ସହ ହତ୍ୟାରେ ବ୍ୟବହୃତ ୨ଟି ଛୁରି, ଅଭିଯୁକ୍ତଙ୍କ ରକ୍ତଭିଜା ପୋଷାକ ଏବଂ ଅଟୋରିକ୍ସା ଜବତ କରାଯାଇଛି। ପୋଲିସ ବିଏନ୍ଏସ୍ ଏବଂ ପୋକ୍ସୋ ଆକ୍ଟର ବିଭିନ୍ନ ଦଫାରେ ମାମଲା ରୁଜୁ କରି ଫୋରେନ୍ସିକ୍ ତଥ୍ୟ ସଂଗ୍ରହ ସହ ଅଧିକ ତଦନ୍ତ ଜାରି ରଖିଛି।
