ପାରଳାଖେମୁଣ୍ଡି,୧୬।୫(ଡି.ଏନ୍.ଏ.): କର୍ନାଟକର ବେଙ୍ଗଲୁରୁଠାରେ ଅନୁଷ୍ଠିତ ପ୍ରଥମ ଜାତୀୟ ପ୍ୟାନ ଇଣ୍ଡିଆ ମାଷ୍ଟର ଗେମ୍ସରେ ଗଜପତି ଜିଲା ଅବକାରୀ ବିଭାଗର ଏସ୍ଆଇ କିଶୋର ଚନ୍ଦ୍ର ରଥ ଭାଗ ନେଇ ୪ ପଦକ ହାସଲ କରିଛନ୍ତି। ସେ ସ୍ବର୍ଣ୍ଣ ପଦକ ସହ ଗୋଟିଏ ରୌପ୍ୟ ଏବଂ ୨ଟି କାଂସ୍ୟ ପଦକ ଏପରି ମୋଟ ୪ ପଦକ ହାସଲ କରିଛନ୍ତି। ୧୦୦ ମିଟର ରାଲି ରେସ୍ରେ ସ୍ବର୍ଣ୍ଣ ପଦକ ହାସଲ କରି ପ୍ରଥମ ସ୍ଥାନ ହାସଲ କରିଥିବା ବେଳେ ଟ୍ରିପଲ ଜମ୍ପ୍ରେ ରୌପ୍ୟ ପଦକ ପାଇ ଦ୍ୱିତୀୟ ସ୍ଥାନ ହାସଲ କରିଛନ୍ତି। ସେହିପରି ଲଙ୍ଗ୍ଜମ୍ପ୍ ଓ ହାଇଜମ୍ପ୍ରେ ପୃଥକ୍ ଭାବେ ୨ କାଂସ୍ୟ ପଦକ ହାସଲ କରି ତୃତୀୟ ସ୍ଥାନ ହାସଲ କରିଥିଲେ। ଏହି ମାଷ୍ଟର ଗେମ୍ସରେ ଦେଶର ୨ ହଜାରରୁ ଊର୍ଦ୍ଧ୍ୱ ଖେଳାଳି ଭାଗ ନେଇଥିବାବେଳେ ଓଡ଼ିଶାରୁ ୨୪ଜଣ ଭାଗ ନେଇଛନ୍ତି। ସୂଚନାଯୋଗ୍ୟ, ଏସ୍ଆଇ ରଥ ପିଲାଦିନରୁ ସମସ୍ତ ଖେଳ ଖେଳିବା ସହ ଦୌଡ଼ କୁଦରେ ବେଶ ସୁନାମ ଅର୍ଜନ କରିଥିଲେ। ସେହିପରି ନିଜ କର୍ମକ୍ଷେତ୍ରରେ ସୁଚାରୁ ରୂପେ ଦାୟିତ୍ୱ ତୁଲାଇବା ସହ ଖେଳକୁଦ ପାଇଁ ସମୟ ବାହାର କରିନିଅନ୍ତି ଏବଂ ବିଭିନ୍ନ ଜାତୀୟସ୍ତରର ପ୍ରତିଯୋଗିତାରେ ଭାଗ ନେଇ ଜିଲା ତଥା ରାଜ୍ୟ ପାଇଁ ଗୌରବ ଆଣିଛନ୍ତି। ସେ ବହୁ ଜାତୀୟସ୍ତରର ଖେଳକୁଦ ପ୍ରତିଯୋଗିତାରେ ଭାଗ ନେଇ ବହୁ ବାର ପୁରସ୍କୃତ ହୋଇଥିବା ନଜିର ରହିଛି।
