ସମ୍ବଲପୁର,୫ା୪(ବ୍ୟୁରୋ): ସମ୍ବଲପୁର ଗଙ୍ଗାଧର ମେହେର ବିଶ୍ୱବିଦ୍ୟାଳୟରେ ଅନୁଷ୍ଠିତ କାର୍ଯ୍ୟକ୍ରମରେ ଯୋଗଦେବା ପରେ ଉଚ୍ଚଶିକ୍ଷା ମନ୍ତ୍ରୀ ଇଂ. ରୋହିତ ପୂଜାରୀ ଛାତ୍ରୀଛାତ୍ରଙ୍କ ସହ କ୍ଲାସରୁମରେ ଆଲୋଚନା କରିଥିଲେ। କଲେଜରେ ଥିବା ସମସ୍ୟା, ହଷ୍ଟେଲ ପାଇଁ କରାଯାଇଥିବା କଡା ନିୟମ ଗୁଡିକ ସମ୍ପର୍କରେ ଛାତ୍ରମାନେ ମନ୍ତ୍ରୀଙ୍କୁ କହିଥିଲେ। ମନ୍ତ୍ରୀ କହିଥିଲେ, ମାଆବାପା କଲେଜକୁ ପାଠ ପଢିବା ପାଇଁ ବହୁ ଆଶାରେ ପଠାଉଛନ୍ତି। ତାଙ୍କର ସ୍ବପ୍ନ ପୂରଣ ହେବା ସହ ନିଜର ଲକ୍ଷ୍ୟ ମଧ୍ୟ ହାସଲ ହେବ। ପ୍ରତିଦିନ ଆମେ ଅନେକ ବ୍ୟକ୍ତିଙ୍କ ସଂସ୍ପର୍ଶରେ ଆସିଥାଉ। ଆମର ବ୍ୟବହାର ଆମର ପରିଚୟ ହୋଇଥାଏ। ସମସ୍ଥଙ୍କୁ ଉତ୍ତମ ବ୍ୟବହାର ଦେବା ଉଚିତ। ବ୍ୟବହାରିକ ଜ୍ଞାନ ସଂଗ୍ରହ ସହ ବିଶ୍ୱବିଦ୍ୟାଳୟକୁ ରାଗିଂ ମୁକ୍ତ କର। ଜୁନିୟର କିମ୍ବା ସହପାଠୀଙ୍କ ସହିତ ଭଲ ସମ୍ପର୍କ ରଖି ପାଠ ପଢାରେ ସହଯୋଗ କର। ଏବେ ଅନେକ କଲେଜରେ ଛାତ୍ରୀଛାତ୍ର କୌଣସି କାରଣରୁ ଆତ୍ମହତ୍ୟା କରୁଥିବା ଘଟଣା ଦେଖିବାକୁ ମିଳୁଛି। ଏହାକୁ ରୋକିବା ପାଇଁ ରାଜ୍ୟ ସରକାର କଲେଜ ଓ ହଷ୍ଟେଲରେ କିଛି ନିୟମରେ ପରିବର୍ତ୍ତନ କରିଛନ୍ତି, ଯାହା ସମସ୍ତଙ୍କ ପାଇଁ ଲାଭଦାୟକ ହେବ ବୋଲି ମନ୍ତ୍ରୀ ପୂଜାରୀ କହିଥିଲେ। ପରେ ଆଞ୍ଚଳିକ ଉଚ୍ଚଶିକ୍ଷା କାର୍ଯ୍ୟାଳୟ ପରିସରରେ ଜିଲାର ବିଭିନ୍ନ କଲେଜ ଅଧ୍ୟକ୍ଷ ତଥା ମୋ କଲେଜ ସଂଯୋଜକଙ୍କୁ ନେଇ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। କଲେଜରେ ଭିତ୍ତିଭୂମି ଓ ଆନୁଷଙ୍ଗିକ ସମସ୍ୟା ଥିବା ଉପସ୍ଥିତ ଅଧ୍ୟକ୍ଷ ମାନେ ଅଭିଯୋଗ କରିଥିଲେ। ଏହାସହ କେତେକ କଲେଜରେ ଖାଲି ପଡିଥିବା ଅଧ୍ୟକ୍ଷ ପଦ ପୂରଣ କରିବାକୁ ଦାବି କରିଥିଲେ। ପର୍ଯ୍ୟାକ୍ରମେ ସମସ୍ତ ସମସ୍ୟାର ସମାଧାନ ହେବ ବୋଲି ମନ୍ତ୍ରୀ ପୂଜାରୀ ପ୍ରତିଶ୍ରୁତି ଦେଇଥିଲେ। ବୈଠକରେ ଆଞ୍ଚଳିକ ନିର୍ଦ୍ଦେଶକ ପ୍ରଭାବତି ଗୁରୁ ଉପସ୍ଥିତ ଥିଲେ।
