ନୂଆଦିଲ୍ଲୀ,୨୪।୯: ଜାପାନର ନାଗୋୟାରେ ପୁରୁଷ ଡବଲ ସ୍କଲ୍ସ ରୋଇଂ ଫାଇନାଲ ଶେଷ ହେବା ପରେ ଯେତେବେଳେ ଆକାଶରେ ଭାରତର ତ୍ରିରଙ୍ଗା ଉଡିଥିଲା,ସେତେବେଳେ ୨୦୦୦ ମିଟର ଓ୍ବାଟର କୋର୍ସରେ ଠିଆ ହୋଇଥିବା ସଲମାନ ଖାନଙ୍କ ଆଖିରୁ ଲୁହ ଝରିପଡ଼ିଥିଲା। ଏହା କେବଳ ପଦକ ଜିତିବାର ଖୁସିର ଲୁହ ନଥିଲା, ବରଂ ଦିଲ୍ଲୀର ରାସ୍ତାରେ କ୍ୟାବ ଚଳାଇବା ସମୟରେ ଭୋଗିଥିବା ଯନ୍ତ୍ରଣା, ଅସହାୟତା ଓ କଠିନ ସଂଘର୍ଷର ସ୍ମୃତିର ଲୁହ ଥିଲା।
ସତନାମ ସିଂହଙ୍କ ସହ ମିଶି ୬:୧୩.୨୫ ସେକେଣ୍ଡ ସମୟରେ ଫିନିଶ କରି ଭାରତ ପାଇଁ ଐତିହାସିକ ପ୍ରଥମ ପଦକ ଜିତିଥିବା ସଲମାନ ଖାନଙ୍କ କାହାଣୀ ଏକ ପ୍ରେରଣାଦାୟକ ଯାତ୍ରାଠାରୁ କମ୍ ନୁହେଁ।
ଉତ୍ତରପ୍ରଦେଶର ଆମେଠି ଜିଲାର ପୁରେ ଧିଙ୍ଗଇ ଗାଁରେ ଜନ୍ମିତ ସଲମାନଙ୍କ ପିଲାଦିନ କେବେ ବି ସହଜ ନଥିଲା। ୬ ଭାଇଭଉଣୀଙ୍କ ମଧ୍ୟରେ ସବୁଠାରୁ ବଡ଼ ସଲମାନଙ୍କ ବାପା ମହମ୍ମଦ କାସିମ ଖାନ ହରିୟାଣାର ତାଉରୁରେ ଟ୍ରକ ବଡି ତିଆରି କାମ କରୁଥିଲେ। ପିଲାଦିନରୁ ହିଁ ସଲମାନଙ୍କ ସ୍ବପ୍ନ ଥିଲା ଭାରତୀୟ ସେନାରେ ଯୋଗଦେଇ ଦେଶ ସେବା କରିବା।
କିନ୍ତୁ ନିୟତିର ନିଷ୍ପତ୍ତି ଥିଲା ଭିନ୍ନ। ସଲମାନ ମାତ୍ର ୧୮ ବର୍ଷ ବୟସରେ ଥିବାବେଳେ ଡେଙ୍ଗୁରେ ତାଙ୍କ ବାପାଙ୍କ ଅଚାନକ ମୃତ୍ୟୁ ହୋଇଥିଲା। ରାତାରାତି ପରିବାରର ଭରଣପୋଷଣ ଓ ସାନ ଭାଇଭଉଣୀଙ୍କ ଦାୟିତ୍ୱ ୧୮ ବର୍ଷୀୟ ସଲମାନଙ୍କ କାନ୍ଧରେ ପଡ଼ିଥିଲା।
ପରିବାର ପୋଷିବା ପାଇଁ ସେ ନିଜ ସେନାରେ ଯୋଗଦେବା ସ୍ବପ୍ନକୁ ମନ ଭିତରେ ରଖି ଚାକିରି ଖୋଜି ଦିଲ୍ଲୀ ଆସିଥିଲେ। ତୀବ୍ର ଗରମ ହେଉ କିମ୍ବା ପ୍ରବଳ ଶୀତ, ସେ ଦିନରାତି ଦିଲ୍ଲୀର ରାସ୍ତାରେ କ୍ୟାବ ଚଳାଇ ପରିବାରର ପେଟ ପୋଷୁଥିଲେ।
ତେବେ ରାସ୍ତାରେ କ୍ୟାବ ଚଳାଇବା ସମୟରେ ମଧ୍ୟ ସଲମାନଙ୍କ ଆଖିରେ ସେନା ପୋଷାକ ପିନ୍ଧିବାର ସ୍ବପ୍ନ ମରିନଥିଲା। ଦିନେ ଜଣେ ବନ୍ଧୁ ତାଙ୍କ ଉଚ୍ଚତା ଓ ମଜବୁତ ଶାରୀରିକ ଗଠନ ଦେଖି ପୁଣିଥରେ ସେନା ନିଯୁକ୍ତି ପରୀକ୍ଷା ଦେବାକୁ ପରାମର୍ଶ ଦେଇଥିଲେ।
ଏହାପରେ ସଲମାନ କ୍ୟାବର ଚାବି ଅନ୍ୟ ଜଣେ ଡ୍ରାଇଭରଙ୍କୁ ଦେଇ ମାତ୍ର ୪ ମାସ ଧରି ଦିନରାତି କଠିନ ପରିଶ୍ରମ କରିଥିଲେ। ଶେଷରେ ୨୫ ସେପ୍ଟେମ୍ବର ୨୦୧୮ରେ ପୁଣେସ୍ଥିତ ବମ୍ବେ ଇଞ୍ଜିନିୟର ଗ୍ରୁପରେ ଭାରତୀୟ ସେନାରେ ଯୋଗ ଦେଇଥିଲେ। ସେନାରେ ଯୋଗଦେବା ପରେ ତାଙ୍କ ଉଚ୍ଚତା ଦେଖି କୋଚମାନେ ତାଙ୍କୁ ରୋଇଂ ଖେଳିବାକୁ ପରାମର୍ଶ ଦେଇଥିଲେ। ଯେଉଁ ଖେଳର ନାଁ ମଧ୍ୟ ସଲମାନ କେବେ ଶୁଣିନଥିଲେ, ସେହି ଖେଳରେ ଡଙ୍ଗା ସମ୍ଭାଳିବା ତାଙ୍କ ପାଇଁ ବେଶ କଷ୍ଟକର ଥିଲା।
ଦୁଇଥର ତାଙ୍କ ମନୋବଳ ଏତେ ଭାଙ୍ଗିଯାଇଥିଲା ଯେ ସେ ରୋଇଂ ଛାଡ଼ିଦେବାକୁ ଚାହିଁଥିଲେ। କିନ୍ତୁ ସେନାର ବରିଷ୍ଠ କୋଚମାନେ ତାଙ୍କୁ ସବୁବେଳେ ସମର୍ଥନ କରିଥିଲେ ଏବଂ ହାର୍ ନମାନିବାକୁ ପ୍ରେରଣା ଦେଇଥିଲେ। ଶେଷରେ ସଲମାନଙ୍କ କଠିନ ପରିଶ୍ରମ ରଙ୍ଗ ଆଣିଥିଲା। ନ୍ୟାଶନାଲ ଗେମ୍ସଠାରୁ ଆରମ୍ଭ କରି ଏସିଆନ ରୋଇଂ କପ ପର୍ଯ୍ୟନ୍ତ ସେ ସ୍ବର୍ଣ୍ଣ ପଦକ ଜିତି ଚାଲିଥିଲେ। ତାଙ୍କ ଏହି ଐତିହାସିକ ପ୍ରଦର୍ଶନ ପାଇଁ ଭାରତୀୟ ସେନା ତାଙ୍କୁ ‘ନାୟବ ସୁବେଦାର’ ପଦକୁ ପଦୋନ୍ନତି ଦେଇଥିଲା।
କ୍ୟାବ ଷ୍ଟିୟରିଂରୁ ରୋଇଂ ବୋଟ ପର୍ଯ୍ୟନ୍ତ ସଲମାନଙ୍କ ଏହି ଯାତ୍ରା ଆଜି ଅନେକ ଯୁବକଙ୍କ ପାଇଁ ସଂଘର୍ଷ, ଦୃଢ଼ ଇଚ୍ଛାଶକ୍ତି ଓ ସଫଳତାର ଏକ ପ୍ରେରଣାଦାୟକ ଉଦାହରଣ ପାଲଟିଛି।
