ଢେଙ୍କିକୋଟ,୪।୮(ଡି.ଏନ.ଏ.): କେନ୍ଦୁଝର ଜିଲା ଘଟଗାଁ ଥାନା ଢେଙ୍କିକୋଟ ଫାଣ୍ଡି ଅଞ୍ଚଳରେ ଏକ ଚାଞ୍ଚଲ୍ୟକର ହତ୍ୟାକାଣ୍ଡ ଘଟିଛି। ବିଶ୍ୱାସରେ ବିଷ ଦେଇ ଜଣେ ବ୍ୟକ୍ତି ତାଙ୍କ ସାଙ୍ଗଙ୍କ ସ୍ତ୍ରୀଙ୍କୁ ବଳାତ୍କାର ପରେ ଜୀବନରୁ ମାରିଦେଇଥିବା ଅଭିଯୋଗ ହୋଇଛି। ନୃଶଂସ ବ୍ୟକ୍ତିଜଣକ ମୃତ ମହିଳାଙ୍କ ସହ ଶାରୀରିକ ସମ୍ପର୍କ ରଖିବା ପରେ ତାଙ୍କ ଯୌନାଙ୍ଗରେ ଶାଳ ବେଣ୍ଟ ପୂରାଇଦେଇଥିବା ଅଭିଯୋଗରେ ଦର୍ଶାଯାଇଛି। ଏନେଇ ପୋଲିସ ଏକ ହତ୍ୟା ମାମଲା (ନଂ.୧୫୨/୨୨) ରୁଜୁ କରି ଅଭିଯୁକ୍ତଙ୍କୁ ଗିରଫ କରିଛି। ଅଭିଯୁକ୍ତ ହେଲେ ଖାଳିଆବେଡ଼ା ଗ୍ରାମର ପୁରସ୍ତମ ନାୟକ।
ପୋଲିସ ସୂଚନା ଅନୁଯାୟୀ, ମୃତ ମହିଳାଙ୍କ ସ୍ବାମୀ ଓ ଖାଳିଆବେଡ଼ା ଗ୍ରାମର ପୁରସ୍ତମ ନାୟକଙ୍କ ମଧ୍ୟରେ ନିବିଡ଼ ବନ୍ଧୁତା ଥିଲା। ଦୁହେଁ ଦୁହିଁଙ୍କ ଘରକୁ ଯିବା ଆସିବା କରୁଥିଲେ। ଗତ ରବିବାର ରାତିରେ ପୁରସ୍ତମ ସାଙ୍ଗଙ୍କ ଘରକୁ ଯାଇଥିଲେ। ସେଠାରେ ମଦ ମାଂସ ଖାଇ ଦୁହେଁ ମଉଜ କରିଥିଲେ। ସାଙ୍ଗ ଶୋଇପଡ଼ିବା ପରେ ପୁରସ୍ତମ ତାଙ୍କ ସ୍ତ୍ରୀଙ୍କ ସହ ଶାରୀରିକ ସମ୍ପର୍କ ରଖିଥିଲେ। ପରେ କୌଣସି କାରଣରୁ ଉତ୍ତ୍ୟକ୍ତ ହୋଇ ସେ ମହିଳାଙ୍କ ଯୌନାଙ୍ଗରେ ଏକ ଶାଳ ବେଣ୍ଟ ପୂରାଇ ଦେଇଥିଲେ। ଫଳରେ ମହିଳାଙ୍କର ମାତ୍ରାଧିକ ରକ୍ତସ୍ରାବ ହୋଇଥିଲା। ସୋମବାର ସକାଳେ ସେ ଆଉ ଉଠିପାରି ନ ଥିଲେ।
ଅସୁସ୍ଥ ଥିବା ଭାବି ତାଙ୍କ ସ୍ବାମୀ ଗୁଣିଗାରେଡ଼ି ପୂଜାପାଠ କରିଥିଲେ। ମାତ୍ର ସେ ଭଲ ନ ହେବାରୁ ମଙ୍ଗଳବାର ତାଙ୍କୁ ଝାରବେଡ଼ା ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ନ ଥିବାରୁ ଆୟୁଷ ଡାକ୍ତର ପଣ୍ଡାପଡ଼ା ଡାକ୍ତରଖାନାକୁ ରେଫର କରିଦେଇଥିଲେ। ସେତେବେଳକୁ ମହିଳାଙ୍କର ମୃତ୍ୟୁ ହୋଇଯାଇଥିଲା। ମୃତଦେହକୁ ଘରକୁ ଫେରାଇ ଆଣି ସ୍ବାମୀ ପୋତି ଦେଇଥିଲେ। କିନ୍ତୁ ମୃତ୍ୟୁ ପୂର୍ବରୁ ମହିଳା ଜଣକ ତାଙ୍କ ସାନ ଝିଅଙ୍କୁ ସବୁ କଥା କହିଯାଇଥିଲେ। ମା’ଙ୍କ ମୃତ୍ୟୁ ପରେ ସାନ ଝିଅ ତାଙ୍କ ବଡ଼ ନାନୀଙ୍କୁ ଏ ବିଷୟରେ ଜଣାଇଥିଲେ। ବଡ଼ ନାନୀ ବୁଧବାର ଘଟଗାଁ ଥାନାରେ ଏନେଇ ଲିଖିତ ଅଭିଯୋଗ କରିଥିଲେ। ଆଇଆଇସି ପ୍ରତିଭା ସାହୁ ଓ ଢେଙ୍କିକୋଟ ପୋଲିସ ବିଟ୍ ହାଉସ ଅଧିକାରୀ ତରଣୀସେନ ବାଘ ଘଟଣାସ୍ଥଳରେ ପହଞ୍ଚି ଛାନଭିନ କରିଥିଲେ। ମାଜିଷ୍ଟ୍ରେଟ ଘଟଗାଁ ତହସିଲଦାର ଜନକ କୁମାର ନାୟକଙ୍କ ଉପସ୍ଥିତିରେ ପୋଲିସ ମାଟି ତଳୁ ମୃତଦେହ ବାହାର କରି ବ୍ୟବଚ୍ଛେଦ ପାଇଁ କେନ୍ଦୁଝର ପଠାଇଛି।
