ବରଗଡ଼,୧୭।୪(ପ୍ରେମାନନ୍ଦ ଖମାରୀ): ବରଗଡ଼ ଜିଲା ଅମ୍ବାଭୋନା ବ୍ଳକର ଜରିମୁଲିରୁ ଝାରସୁଗୁଡ଼ା ଜିଲା ଲଖନପୁର ବ୍ଳକ ଅନ୍ତର୍ଗତ ପୁଝାରୀପାଲିକୁ ମହାନଦୀ ଉପରେ ଦ୍ବିତୀୟ ସେତୁର ଶିଳାନ୍ୟାସ କାର୍ଯ୍ୟକ୍ରମ ଗୁରୁବାର ଅନୁଷ୍ଠିତ ହୋଇଯାଇଛି। ଆଭାସୀ ମାଧ୍ୟମରେ କେନ୍ଦ୍ର ସଡ଼କ ପରିବହନ ଓ ରାଜମାର୍ଗ ମନ୍ତ୍ରୀ ନୀତିନ ଜୟରାମ ଗଡକରୀ ଏହାର ଶିଳାନ୍ୟାସ କରିଥିଲେ। ମହାନଦୀ ଉପରେ ସୁଉଚ୍ଚ ୩କିଲୋମିଟର ଦୈର୍ଘ୍ୟ ବିଶିଷ୍ଟ ଏହି ସେତୁ ନିର୍ମାଣ ପାଇଁ ୨୭୪କୋଟି ଟଙ୍କା ବ୍ୟୟ ବରାଦ ହୋଇଛି। ବିଗତ ୨୦୨୦ ମସିହା ଡିସେମ୍ବର ୧୮ ତାରିଖ ତତ୍କାଳୀନ ବରଗଡ଼ ଲୋକ ସଭା ଏମପି ସୁରେଶ ପୂଜାରୀଙ୍କ ପ୍ରତ୍ୟକ୍ଷ ଉଦ୍ୟମରେ ଏହି ସେତୁର ମୁଲଦୁଆ ପଡ଼ିଥିଲା। ଉଭୟ ଝାରସୁଗୁଡ଼ା ଓ ବରଗଡ଼ ଜିଲା ମଧ୍ୟରେ ଏହା ସମ୍ପର୍କର ସେତୁ ହେବ । ଏଥିପାଇଁ ଅଞ୍ଚଳରେ ଆନନ୍ଦର ଲହରୀ ଖେଳିଯାଇଛି। ଏହି ସେତୁ ହେଲେ ଅମ୍ବାଭୋନଠାରୁ ଝାରସୁଗୁଡ଼ାକୁ ଦୁରତା କମିବା ସହିତ ଯୋଗାଯୋଗ ବଢିବ। ମହାନଦୀ କୂଳରେ ଥିବା ଉଭୟ ଜିଲାର ବିଛିନ୍ନାଞ୍ଚଳ ମଧ୍ୟରେ ପରିବହନ ଓ ଯୋଗାଯୋଗ ବୃଦ୍ଧି ପାଇବ ବୋଲି ସାଧାରଣରେ ଆଶାର ସଞ୍ଚାର ଖେଲି ଯାଇଛି। ଏହି ଶିଳାନ୍ୟାସ କାର୍ଯ୍ୟକ୍ରମରେ ଅମ୍ବାଭୋନା ବ୍ଳକର ଜରିମୁଲିଠାରେ ଭଟଲି ବିଧାୟକ ଇରାସିସ ଆଚାର୍ଯ୍ୟ ଯୋଗ ଦେଇ ଉଭୟ ଜିଲାର ପରିବହନ ଓ ଯୋଗାଯୋଗ ସହ ଗମନାଗମନ ଓ ଅର୍ଥନୈତିକ ବିକାଶ ଘଟିବ ବୋଲି ପ୍ରକାଶ କରିଥିଲେ।
