ସ୍ପେଲବର୍ଗ (ଅଷ୍ଟ୍ରିଆ), ୫।୭- ରେଡ୍ବୁଲ୍ ଡ୍ରାଇଭର ମ୍ୟାକ୍ସ ଭର୍ଷ୍ଟାପେନ ଅଷ୍ଟ୍ରିଆନ ଗ୍ରାଁ ପ୍ରି ଫର୍ମୁଲାଓ୍ବାନ ମୋଟରରେସିଂ ଟାଇଟଲ ଜିତିଛନ୍ତି। ରବିବାର ଅନୁଷ୍ଠିତ ରେସ୍ରେ ସେ ୧:୨୩:୫୪.୫୪୩ ସେକେଣ୍ଡ ସମୟ ନେଇ ପ୍ରଥମସ୍ଥାନ ଅଧିକାର କରିଛନ୍ତି। ମର୍ସିଡିଜ୍ର ଭାଲଟେରୀ ବୋଟ୍ଟାସ ଏବଂ ମ୍ୟାକଲରେନର ଲାନ୍ଡୋ ନୋରିସ ଯଥାକ୍ରମେ ଦ୍ୱିତୀୟ ଓ ତୃତୀୟ ସ୍ଥାନ ଅଧିକାର କରିଛନ୍ତି। ଫଳରେ ଏହି ତିନି ଡ୍ରାଇଭରଙ୍କୁ ଯଥାକ୍ରମେ ୨୬, ୧୮ ଓ ୧୫ ପଏଣ୍ଟ ମିଳିଛି। ୪ର୍ଥରୁ ଯଥାକ୍ରମେ ୧୦ମ ସ୍ଥାନ ହାସଲ କରି ଟପ୍-୧୦ ଫିନିଶ୍ କରିଥିବା ଅନ୍ୟ ଡ୍ରାଇଭରମାନେ ହେଲେ ମ୍ୟାକ୍ଲରେନର ଲୁଇସ ହାମିଲଟନ, ଫେରାରୀର କାର୍ଲୋସ ସିଞ୍ଜ୍ ଜୁନିୟର, ରେଡ୍ବୁଲ୍ର ସର୍ଗିଓ ପେରେଜ, ମ୍ୟାକଲରେନର ଡାନିଏଲ ରିକାର୍ଡୋ, ଫେରାରୀର ଚାଲର୍ସ ଲେକ୍ରେକ୍, ଆଲ୍ଫା ଟୌରୀର ପିଏରେ ଗାସ୍ଲେ ଏବଂ ଆଲପାଇନ୍ର ଫର୍ନାଣ୍ଡୋ ଆଲୋଁସୋ। ଅନ୍ୟ ନାମୀ ଡ୍ରାଇଭରଙ୍କ ମଧ୍ୟରେ ଆଲ୍ଫା ରୋମିଓର କିମି ରାଇକୋନେନ ଏବଂ ଆଷ୍ଟନ ମାର୍ଟିନର ସେବାଷ୍ଟିଆନ ଭେଟେଲ ପ୍ରମୁଖ ଯଥାକ୍ରମେ ୧୬ ଓ ୧୭ତମ ସ୍ଥାନରେ ରହିଛନ୍ତି। ଅଷ୍ଟ୍ରିଆନ ଗ୍ରାଁ ପ୍ରି ପରେ ଭର୍ଷ୍ଟାପେନ ୧୮୨ ପଏଣ୍ଟ ସହିତ ଡ୍ରାଇଭର୍ସ ଷ୍ଟାଣ୍ଡିଂର ଶୀର୍ଷସ୍ଥାନରେ ରହିଛନ୍ତି। ସେ ଏହାକୁ ମିଶାଇ ୫ଟି ଗ୍ରାଁ ପ୍ରି ଜିତି ସାରିଛନ୍ତି। ୩ ଗ୍ରାଁ ପ୍ରି ଜିତିଥିବା ହାମିଲଟନ ୧୫୦ ପଏଣ୍ଟ ସହିତ ଦ୍ୱିତୀୟ ସ୍ଥାନ ଅଧିକାର କରିଛନ୍ତି। ୧୦୦ରୁ ଊର୍ଦ୍ଧ୍ୱ ପଏଣ୍ଟ ପାଇଥିବା ଅନ୍ୟ ୨ ଡ୍ରାଇଭର ହେଲେ ରେଡ୍ବୁଲ୍ର ସର୍ଗିଓ ପେରେଜ (୧୦୪) ଓ ମ୍ୟାକ୍ଲରେନର ଲାନ୍ଲୋ ନୋରିସ(୧୦୧)। କନ୍ଷ୍ଟ୍ରକ୍ଟର୍ସ ଷ୍ଟାଣ୍ଡିଂରେ ୨୮୬ ପଏଣ୍ଟ ସହିତ ରେଡ୍ବୁଲ୍ ଟିମ୍ ଶୀର୍ଷରେ ଅପରିବର୍ତ୍ତିତ ରହିଛି। ମର୍ସିଡିଜ୍ ୨୪୨ ଏବଂ ମ୍ୟାକଲରେନ ୧୪୧ ପଏଣ୍ଟ ପାଇ ଯଥାକ୍ରମେ ଦ୍ୱିତୀୟ ଓ ତୃତୀୟ ସ୍ଥାନରେ ରହିଛି।
