ଟୋକିଓ,୫।୭(ଏପି): କୋଭିଡ୍-୧୯ ମହାମାରୀର ଭୟାବହତା ପାଇଁ ଅଲିମ୍ପିକ୍ସ ଆୟୋଜନ ନେଇ ପ୍ରଶ୍ନବାଚୀ ସୃଷ୍ଟି ହୋଇଥିଲେ ମଧ୍ୟ ଟୋକିଓରେ ଆସେମ୍ବ୍ଲି ନିର୍ବାଚନ ଅନୁଷ୍ଠିତ ହୋଇଛି। ଆଉ ପାଖାପାଖି ୩ ସପ୍ତାହ ପରେ ଅଲିମ୍ପିକ୍ସ ଆରମ୍ଭ ହେବାକୁ ଯାଉଥିବା ବେଳେ କରୋନ ସଂକ୍ରମଣ ବଢିବାରେ ଲାଗିଛି। ରବିବାର ଅନୁଷ୍ଠିତ ନିର୍ବାଚନରେ ୧୨୭ଟି ସିଟ୍ ପାଇଁ ୨୭୧ ଜଣ ପ୍ରାର୍ଥୀ ନିର୍ବାଚନରେ ଅବତୀର୍ଣ୍ଣ ହୋଇଥିଲେ। ଟୋକିଓର ୧୪ ମିଲିୟନ ଲୋକଙ୍କ ମଧ୍ୟରୁ ୯.୮ ମିଲିୟନ ଲୋକ ଭୋଟ ଦେବାକୁ ଯୋଗ୍ୟ ବିବେଚିତ ଥିଲେ।
ଏକ ପବ୍ଲିକ ଓପିନିୟନ ସର୍ଭେରେ ପାଖାପାଖି ୬୦ ପ୍ରତିଶତ ଲୋକ ଅଲିମ୍ପିକ୍ସ ବାତିଲ କରିବାକୁ କିମ୍ବା ଘୁଞ୍ଚାଇ ଦେବାକୁ ନିଜର ମତ ରଖିଛନ୍ତି। ଏ ପର୍ଯ୍ୟନ୍ତ ମାତ୍ର ୧୦ ପ୍ରତିଶତ ଲୋକଙ୍କର ସମ୍ପୂର୍ଣ୍ଣ ଟିକାକରଣ ହୋଇଛି। ୟୁରିକୋ କୋଇକେଙ୍କ ତୋମିନ ଫାର୍ଷ୍ଟ ପାର୍ଟି ଓ ପ୍ରଧାନମନ୍ତ୍ରୀ ୟୋଶିହାଇଡ ସୁଗାଙ୍କ ଲିବେରାଲ ଡେମୋକ୍ରାଟ୍ସ ପାର୍ଟି ମଧ୍ୟରେ କଡ଼ା ମୁକାବିଲା ହେବ ବୋଲି ଏକ୍ଜିଟ ପୋଲ୍ରୁ ଜଣାଯାଇଛି। ତୋମିନ ଫାର୍ଷ୍ଟ ୨୦ରୁ ୩୫ ଓ ଲିବେରାଲ ୨୫ରୁ ୪୩ ସିଟ୍ ଜିତିବ ବୋଲି ଅନୁମାନ କରାଯାଇଛି। ନିରାପତ୍ତାର ସହ ସୁରକ୍ଷିତ ଭାବେ ଲିବେରାଲ ଅଲିମ୍ପିକ୍ସ ଆୟୋଜନ କରିବାକୁ ପ୍ରତିଶ୍ରୁତି ଦେଇଛି ଓ ଦଳ ପାଖରେ ଏବେ ୨୫ଟି ସିଟ୍ ରହିଛି।
ଜୁଲାଇ ୨୩ରୁ ଆରମ୍ଭ ହେବାକୁ ଥିବା ଅଲିମ୍ପିକ୍ସରେ ୧୫,୦୦୦ ଆଥ୍ଲେଟଙ୍କ ସମେତ ୫୦,୦୦୦ ଅଫିସିଆଲ ଟୋକିଓ ଆସିବେ ଓ ୭୦,୦୦୦ ଭଲ୍ୟୁଣ୍ଟିୟର୍ସ ଦାୟିତ୍ୱରେ ରହିବେ। ଅଲିମ୍ପିକ୍ସ ଦ୍ୱାରା କରୋନା ସଂକ୍ରମଣରେ ବିସ୍ଫୋରଣ ହେବ ବୋଲି କେତେଜଣ ଚିକିତ୍ସା ବିଜ୍ଞାନୀ ମତ ଦେଇଛନ୍ତି।
