କେନ୍ଦୁଝର,୨୫।୮(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସ୍ବତନ୍ତ୍ର ଭିଜିଲାନ୍ସ କୋର୍ଟ ବିଚାରପତି ରଞ୍ଜିତା ଦଳେଇ ଶୁକ୍ରବାର ଏକ ଲାଞ୍ଚ ମାମଲାର ଶୁଣାଣୀ କରି ଅବସରପ୍ରାପ୍ତ ତହସିଲଦାର ଏବଂ ପିଅନଙ୍କୁ ଜେଲ ଦଣ୍ଡାଦେଶ କରିଛନ୍ତି। ସେମାନେ ହେଲେ ପୂର୍ବତନ ତହସିଲଦାର ପ୍ରଦୀପ କୁମାର ନାୟକ ଏବଂ ପିଅନ ବିଶ୍ୱନାଥ ନାୟକ।
୨୦୦୯ ସେପ୍ଟେମ୍ବର ୮ ତାରିଖରେ ପାଟଣା ତହସିଲ ତୁରୁମୁଙ୍ଗା ଅଞ୍ଚଳର ସନାତନ ପୃଷ୍ଟିଙ୍କଠାରୁ ୫ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତରେ ପୂର୍ବତନ ତହସିଲଦାର ପ୍ରଦୀପ ଧରାପଡିଥିଲେ। ସନାତନ ପୃଷ୍ଟି ଏବଂ ତାଙ୍କ ୪ ଭାଇ ୫ଟି ପ୍ଲଟ କ୍ରୟ କରିଥିଲେ। ଉକ୍ତ ଜମିକୁ ସେମାନଙ୍କ ନାମରେ ପଟ୍ଟା କରିବା ପାଇଁ ପାଟଣା ତହସିଲରେ ଆବେଦନ କରିଥିଲେ। ପଟ୍ଟା କରିବା ପାଇଁ ୫ଟି ମ୍ୟୁଟେସନ କେସ କରାଯାଇଥିଲା। ଏନେଇ ତହସିଲଦାର ପ୍ରଦୀପ ଆବେଦନକାରୀଙ୍କୁ ୫ହଜାର ଟଙ୍କା ଲାଞ୍ଚ ମାଗିଥିବା ଅଭିଯୋଗ ହୋଇଥିଲା। ଏହି ଟଙ୍କା ପିଅନ ବିଶ୍ୱନାଥ ନାୟକଙ୍କୁ ଦେବା ପାଇଁ ସେ କହିଥିଲେ। ଏହାପରେ ସନାତନ ଭିଜିଲାନ୍ସ ବାଲେଶ୍ୱର ଏସ୍ପିଙ୍କ ନିକଟରେ ୭।୦୯।୨୦୦୯ରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ଭିଜିଲାନ୍ସ ବିଭାଗ ପକ୍ଷରୁ ଏକ ମାମଲା ରୁଜୁ କରାଯାଇଥିଲା।
ଏପରିକି ଭିଜିଲାନ୍ସ ଟିମ୍ ଟଙ୍କା ଲାଞ୍ଚ ନେବାବେଳେ ପିଅନ ବିଶ୍ୱନାଥ ନାୟକଙ୍କୁ ତହସିଲ କାର୍ଯ୍ୟାଳୟ ପରିସରରୁ ଧରିଥିଲା। ଉକ୍ତ ଟଙ୍କା ତହସିଲଦାରଙ୍କ କହିବା ଅନୁସାରେ ସେ ଗ୍ରହଣ କରିଥିବା ଭିଜିଲାନ୍ସକୁ କହିବା ପରେ ଭିଜିଲାନ୍ସ ତାଙ୍କ ସହିତ ତହସିଲଦାରଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଏନେଇ ଭିଜିଲାନ୍ସ କୋର୍ଟ ମାମଲା(ନଂ.୩୭/୨୦୦୯) ରୁଜୁ ହୋଇଥିଲା। ୧୬ଜଣ ସାକ୍ଷୀ ଏବଂ ପ୍ରମାଣକୁ ଭିତ୍ତି କରି ସ୍ବତନ୍ତ୍ର ଭିଜିଲାନ୍ସ ବିଚାରପତି ଶୁକ୍ରବାର ତତ୍କାଳୀନ ତହସିଲଦାର ପ୍ରଦୀପ କୁମାର ନାୟକଙ୍କୁ ୨ବର୍ଷ ଜେଲ ଏବଂ ୭ ହଜାର ଟଙ୍କା ଜରିମାନା ଆଦେଶ କରିଛନ୍ତି। ଜରିମାନା ଅନାଦେୟ ଅଧିକ ୯ ମାସ ଜେଲ ଦଣ୍ଡାଦେଶ ଶୁଣାଇଛନ୍ତି। ସେହିପରି ପିଅନ ବିଶ୍ୱନାଥ ନାୟକଙ୍କୁ ୧ ବର୍ଷ ଜେଲ ଦଣ୍ଡାଦେଶ ଏବଂ ୨୦୦୦ଟଙ୍କା ଜରିମାନା କରିଛନ୍ତି। ଜରିମାନା ଅନାଦେୟ ଆଉ ୨ ମାସ ଜେଲ ଦଣ୍ଡାଦେଶ ଶୁଣାଇଛନ୍ତି। ଭିଜିଲାନ୍ସ ପକ୍ଷରୁ ମାମଲାକୁ ସ୍ବତନ୍ତ୍ର ପିପି ଦେବଦତ୍ତ ବିଶ୍ୱାଳ ପରିଚାଳନା କରିଥିଲେ।
ଦଣ୍ଡିତ ଅବସରପ୍ରାପ୍ତ ତହସିଲଦାର ଯାଜପୁର ଜିଲା ଦଶରଥପୁର ବ୍ଲକ ମଙ୍ଗଳପୁର ଥାନା କଟିକଟା ଗ୍ରାମର ହୋଇଥିବା ବେଳେ ସେ ଏବେ ଯାଜପୁର ଟାଉନ କଲେଜରୋଡ ଲଲିତେଶ୍ୱର ନଗରରେ ରହୁଛନ୍ତି। ସେହିପରି ପିଅନ ବିଶ୍ୱନାଥଙ୍କ ଘର ପାଟଣା ବ୍ଲକ ତୁରମୁଙ୍ଗା ଥାନା ମହିଷାମୁଣ୍ଡି ଗ୍ରାମରେ ବୋଲି ଜଣାପଡିଛି। ଉଭୟ କର୍ମଚାରୀ ସରକାରୀ ଚାକିରୀରୁ ଅବସର ଗ୍ରହଣ କରିଛନ୍ତି।
