କେପ୍ଟାଉନ, ୮।୧୦: ଦକ୍ଷିଣ ଆଫ୍ରିକାର ପୂର୍ବତନ ଦ୍ରୁତ ବୋଲର ଭର୍ନନ ଫିଲାଣ୍ଡରଙ୍କ ଭାଇ ଟାଇରୋନଙ୍କୁ ଗୁଳି କରି ହତ୍ୟା କରାଯାଇଛି। ବୁଧବାର କେପ୍ଟାଉନରେ ଟାଇରୋନଙ୍କୁ ଗୁଳି କରି ହତ୍ୟା କରାଯାଇଥିବା ନିଜେ ଭର୍ନନ ଏହି ସୂଚନା ଟୁଇଟର୍ ଜରିଆରେ ପ୍ରଦାନ କରିଛନ୍ତି। ଗଣମାଧ୍ୟମ ରିପୋର୍ଟ ଅନୁଯାୟୀ, ଟାଇରନ୍ ରାଭେନ୍ସମେଡ୍ସ୍ଥିତ ବାସଭବନରେ ବୁଧବାର ନିଜ ପଡ଼ୋଶୀଙ୍କୁ ପାଣି ଦେବାକୁ ଯାଇଥିବାବେଳେ ସେହି ସମୟରେ ତାଙ୍କୁ ଗୁଳି କରି ହତ୍ୟା କରାଯାଇଛି। ତାଙ୍କ ମା’ ବୋନିଟା ଆଖି ସାମ୍ନାରେ ଏହି ଭୟଙ୍କର ଘଟଣା ଦେଖିଥିଲେ। ପୋଲିସ ଘଟଣାର ତଦନ୍ତ ଚଳାଇଥିବାବେଳେ ହତ୍ୟାକାରୀ ଏବେ ମଧ୍ୟ ଫେରାର୍ ଥିବା ଜଣାପଡ଼ିଛି।
ଫିଲାଣ୍ଡରଙ୍କ ପକ୍ଷରୁ ଜାରି କରାଯାଇଥିବା ଏକ ବିବୃତିରେ କୁହାଯାଇଛି, ଆମ ପରିବାର ରାଭେନ୍ସମେଡ୍ରେ ଘଟିଥିବା ନୃଶଂସ ହତ୍ୟାର ସାମ୍ନା କରିଛି। ମୁଁ କେବଳ ଏତିକି କହିବାକୁ ଚାହୁଁଛି ଏହି କଠିନ ସମୟରେ ଆମ ପରିବାରର ଗୋପନୀୟତାକୁ ସମ୍ମାନ ଦିଅନ୍ତୁ। ଏଠାରେ ଉଲ୍ଲେଖଯୋଗ୍ୟ, ଚଳିତ ବର୍ଷ ପ୍ରାରମ୍ଭରେ ଅନ୍ତର୍ଜାତୀୟ କ୍ରିକେଟ୍ରୁ ସନ୍ନ୍ୟାସ ଗ୍ରହଣ କରିଥିବା ଫିଲାଣ୍ଡର ଦକ୍ଷିଣ ଆଫ୍ରିକା ପକ୍ଷରୁ ୬୪ ଟେଷ୍ଟ, ୩୦ ଦିନିକିଆ ଓ ୭ ଟି୨୦ ମ୍ୟାଚ୍ ଖେଳି ଯଥାକ୍ରମେ ୨୨୪, ୪୧ ଓ ୪ ଉଇକେଟ୍ ନେଇଛନ୍ତି। ଟେଷ୍ଟରେ ମଧ୍ୟ ତାଙ୍କ ନାମରେ ୧,୭୭୯ ରନ୍ ଲିପିବଦ୍ଧ ରହିଛି।
