ଥୁଆମୂଳ ରାମପୁର, ୬ା୫ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅନ୍ତର୍ଗତ କର୍ଲାପାଟ ପଞ୍ଚାୟତର ସେମେଳପଦର ଗ୍ରାମରେ ଜଙ୍ଗଲ ଅଧିକାର ଆଇନ କେବଳ ପ୍ରହସନ ପାଲଟିଛି। ଦଶକ ଦଶକ ଧରି ଜଳ, ଜଙ୍ଗଲ ଓ ଜମି ସହ ଯୋଡ଼ି ହୋଇ ରହିଥିବା ଆଦିବାସୀ ପରିବାରମାନେ ଆଜି ପର୍ଯ୍ୟନ୍ତ ନିଜର ଆଇନଗତ ଅଧିକାରରୁ ବଞ୍ଚିତ ଅଛନ୍ତି। ୨୦୦୬ ମସିହାରେ ପ୍ରଣୀତ ଐତିହାସିକ ଜଙ୍ଗଲ ଅଧିକାର ଆଇନର ଲକ୍ଷ୍ୟ ଥିଲା ବନବାସୀଙ୍କୁ ତାଙ୍କର ପାରମ୍ପରିକ ଅଧିକାର ଫେରାଇବା, କିନ୍ତୁ ପ୍ରଶାସନିକ ସ୍ଥାଣୁତା ଯୋଗୁ ଏହି ଗ୍ରାମର ୬୯ଟି ପରିବାର ଏବେ ବି ସରକାରୀ ସ୍ୱୀକୃତିକୁ ଚାହିଁ ବସିଛନ୍ତି।
ସୂଚନା ଅନୁସାରେ, ଗତ ୨୦୨୪ ନଭେମ୍ବର ୨୦ ତାରିଖରେ ଅନୁଷ୍ଠିତ ଗ୍ରାମସଭାରେ ସେମେଳପଦର ଗ୍ରାମର ୬୯ ଜଣ ବ୍ୟକ୍ତିଙ୍କ ବ୍ୟକ୍ତିଗତ ଜମି ଅଧିକାର (IFR) ସହିତ ୬୬୫.୫୬୨ ହେକ୍ଟର ଜଙ୍ଗଲ ଜମି ଉପରେ ଗୋଷ୍ଠୀଗତ ଜଙ୍ଗଲ ସମ୍ବଳ ଅଧିକାର (CFRR) କୁ ଅନୁମୋଦନ କରାଯାଇଥିଲା। ଏହି ଅନୁମୋଦିତ ଦାବିକୁ ଥୁଆମୂଳ ରାମପୁର ତହସିଲଦାର ପତ୍ର ସଂଖ୍ୟା ୨୨୭୧/FRA, ତା-୧୮.୧୨.୨୦୨୪ ମାଧ୍ୟମରେ ଭବାନୀପାଟଣା ଉପଜିଲାପାଳଙ୍କ ନିକଟକୁ ପରବର୍ତ୍ତୀ କାର୍ଯ୍ୟାନୁଷ୍ଠାନ ପାଇଁ ପ୍ରେରଣ କରିଥିଲେ। କିନ୍ତୁ ଦୁର୍ଭାଗ୍ୟର ବିଷୟ, ଦୀର୍ଘ ୧୭ ମାସ ବିତିଯାଇଥିଲେ ସୁଦ୍ଧା ଏହି ପ୍ରକ୍ରିୟା ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିପାରିନାହିଁ।
ସେମେଳପଦର ସମେତ ବ୍ଲକର ଅନ୍ୟ ଅଣସର୍ଭେ ଗ୍ରାମ ଯଥା ତେନ୍ତୁଳିପଦର ଓ ଗୁଳିକନାକୁ ‘ରାଜସ୍ୱ ଗ୍ରାମ’ ମାନ୍ୟତା ଦେବା ପ୍ରକ୍ରିୟା ମଧ୍ୟ ବର୍ଷ ବର୍ଷ ଧରି ଲାଲଫିତା ଶାସନରେ ଅଟକି ରହିଛି। ପୂର୍ବତନ ଜିଲାପାଳ ପରାଗ ହର୍ଷଦ ଗଭାଲୀଙ୍କ ସମୟରେ ଆରମ୍ଭ ହୋଇଥିବା ଏହି ପ୍ରକ୍ରିୟା ସରକାରୀ ବାବୁମାନଙ୍କ ଅବହେଳା ଯୋଗୁ ଆଗକୁ ବଢ଼ିପାରୁନାହିଁ। ରାଜସ୍ୱ ପରିଷଦରୁ ସଂଶୋଧନ ପାଇଁ ଫେରିଥିବା କାଗଜପତ୍ର ପୁନର୍ବାର ପଠାଯିବାରେ ଅହେତୁକ ବିଳମ୍ବ ହେଉଥିବାରୁ ଏହି ଗ୍ରାମଗୁଡିକରେ ମୌଳିକ ସୁବିଧା ଓ ସରକାରୀ ଯୋଜନାର ସୁଫଳ ପହଞ୍ଚିବାରେ ବାଧା ସୃଷ୍ଟି ହେଉଛି।
ଜଙ୍ଗଲ ଅଧିକାର କମିଟି ଓ ଗ୍ରାମବାସୀ ଏନେଇ ଜିଲାପାଳଙ୍କ ଅଭିଯୋଗ ଶୁଣାଣିରେ ବାରମ୍ବାର ଗୁହାରି କରିଛନ୍ତି। ପ୍ରତିଥର ଶୀଘ୍ର ସମାଧାନର ଆଶ୍ୱାସନା ମିଳୁଥିଲେ ହେଁ କ୍ଷେତ୍ରସ୍ତରରେ କୌଣସି ପରିବର୍ତ୍ତନ ଦେଖାଯାଉ ନାହିଁ। ଜିଲାପାଳ ଓ ତହସିଲଦାର ବଦଳୁଛନ୍ତି, କିନ୍ତୁ ସେମେଳପଦର ବାସୀଙ୍କ ଭାଗ୍ୟ ବଦଳୁନି।
“ଆମେ ପାରମ୍ପରିକ ଭାବେ ଜଙ୍ଗଲ ଉପରେ ନିର୍ଭର କରି ଚଳୁଛୁ। ସବୁ କାଗଜପତ୍ର ଥାଇ ମଧ୍ୟ ସରକାର ଆମକୁ ପଟ୍ଟା ଦେବାରେ କାହିଁକି ବିଳମ୍ବ କରୁଛନ୍ତି, ତାହା ବୁଝିପାରୁନାହୁଁ,” ବୋଲି ଗ୍ରାମବାସୀ କ୍ଷୋଭର ସହ ପ୍ରକାଶ କରିଛନ୍ତି। ତୁରନ୍ତ ସେମେଳପଦର, ତେନ୍ତୁଳିପଦର ଓ ଗୁଳିକନା ଗ୍ରାମକୁ ରାଜସ୍ୱ ଗ୍ରାମର ମାନ୍ୟତା ପ୍ରଦାନ ସହ ଯୋଗ୍ୟ ପରିବାରଙ୍କୁ ଜଙ୍ଗଲ ଅଧିକାର ପଟ୍ଟା ବଣ୍ଟନ କରିବାକୁ ସାଧାରଣରେ ଦାବି ହେଉଛି।
