କେନ୍ଦୁଝର,୩୦ା୩(ସ୍ବ.ପ୍ର.): କେନ୍ଦୁଝର ସଦର ରେଞ୍ଜ ଅଧୀନ ନରଣପୁର ସେକ୍ସନ ବଡ଼ପଶି ସଂରକ୍ଷିତ ଜଙ୍ଗଲରେ ଗୁରୁବାର ଲାଗିଥିବା ନିଆଁ ଗାଁକୁ ମାଡ଼ିଯାଇଛି। ନିଆଁରେ ବ୍ୟାପକ ଗଛ ପୋଡ଼ିଯାଇଛି। ନିଆଁରେ ବନ୍ୟପ୍ରାଣୀ ପ୍ରଭାବିତ ହୋଇଛନ୍ତି। ପ୍ରବଳ ଖରା ଯୋଗୁ ଶୁଖି ପଡ଼ିଥିବା ଡାଳପତ୍ରରେ ନିଆଁ ଲାଗି ନୂଆସାହି ଆଡ଼କୁ ବ୍ୟାପିବାକୁ ଲାଗିଥିଲା। ଗ୍ରାମବାସୀଙ୍କଠାରୁ ଖବର ପାଇ ବନ ବିଭାଗ ପହଞ୍ଚି ଗ୍ରାମବାସୀଙ୍କ ସହାୟତାରେ ନିଆଁକୁ ଆୟତ କରିଥିଲା। ଧୂଆଁ ଚାରିଆଡ଼େ ବ୍ୟାପିବା ଫଳରେ ରାସ୍ତାରେ ଯାତାୟାତ କରୁଥିବା ଲୋକମାନେ ନାନା ସମସ୍ୟା ଭୋଗିଥିଲେ। ଜଙ୍ଗଲରେ ହାତୀ ଚଳପ୍ରଚଳ ରହିଥିବାରୁ ଏହି ନିଆଁ ଏବେ ବନ ବିଭାଗ ପାଇଁ ଚିନ୍ତାର କାରଣ ପାଲଟିଛି। ନରଣପୁର ସେକ୍ସନରେ ଏବେ ମଧ୍ୟ ୧୦ଟି ହାତୀ ଚଳପ୍ରଚଳ କରୁଛନ୍ତି। ଏନେଇ ସଦର ରେଞ୍ଜ ଅଧିକାରୀ ବିଜୟ ମହାନ୍ତ କହିଛନ୍ତି, ନିଆଁକୁ ତୁରନ୍ତ ନିୟନ୍ତ୍ରଣ କରି ଦିଆଯାଇଛି।
