କେନ୍ଦୁଝର,୬।୫ (ନରେଶ ଚନ୍ଦ୍ର ପଟ୍ଟନାୟକ): ହାତୀକୁ ଆକ୍ରମଣ କରି ହଇରାଣ କରିବା ଏବଂ ଭିଡିଓ ଉତ୍ତୋଳନ କରି ସାମାଜିକ ମିଡିଆରେ ପ୍ରସାରଣ କରିବା ଘଟଣାରେ ବନ ବିଭାଗ ୪ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ସେମାନେ ସଂଗଠିତ ହୋଇ ମଲ୍ଲିପୋଷି ଜଙ୍ଗଲକୁ ଯାଇ ହାତୀମାନଙ୍କୁ ଘଉଡାଇବା ଓ ଭିଡିଓ ଉତ୍ତୋଳନ କରିବା ଫଳରେ ହାତୀପଲ ଉତ୍ତେଜିତ ଓ ବିଚଳିତ ହୋଇ ଏଣେ ତେଣେ ଧାଉଁ ଥିବା ଭିଡିଓକୁ ଉତ୍ତୋଳନ କରିଥିଲେ।
ଏହା ସେମାନଙ୍କ ନିଜ ଜୀବନ ପାଇଁ ମଧ୍ୟ ବିପଦପୂର୍ଣ୍ଣ ଥିବା ସହ ଅନ୍ୟମାନଙ୍କ ପାଇଁ ବିପଦ ସୃଷ୍ଟି କରିଥିଲେ। ଏପରି ଅବହେଳା ଏବଂ ଦାୟିତ୍ୱହୀନ ଆଚରଣ ଯୋଗୁ ପୂର୍ବରୁ ଅନେକ ଜୀବନହାନୀ ଘଟିଛି। ଗିରଫମାନେ ହେଲେ ଘଟଗାଁ ବ୍ଲକ ଅନ୍ତର୍ଗତ ଘୁଣ୍ଟୁଝରୀ ଗ୍ରାମର ଦୀପକ ମହାକୁଡ, ଚିନାମାଲିପୋସି ଗ୍ରାମର ଦୁଷ୍ମନ୍ତ ବେହେରା , ହରିଚନ୍ଦନ ପୁର ବ୍ଲକର ବଡ଼ସିଆଡିମାଳ ଗ୍ରାମର ଆକାଶ କୁମାର ମହାନ୍ତ, ପୋଡ଼ା ଡିହି ଗ୍ରାମ ଜଗନ କୁମାର ବାରିକ ବୋଲି ଜଣାପଡ଼ିଛି। ବନ ବିଭାଗ ସେମାନଙ୍କ ଠାରୁ
ଗୋଟିଏ ଡ୍ରୋନ, ଚାରିଟି ମୋବାଇଲ ଫୋନ ଏବଂ ଗୋଟିଏ ମୋଟରସାଇକେଲ ଜବତ କରିଛି। ସେମାନଙ୍କୁ ଆଜି ବନ୍ୟ ପ୍ରାଣୀ ନିର୍ଯାତନା ଆଇନରେ ଗିରଫ କରି କୋର୍ଟ ଚାଲାଣ କରାଯାଇଛି। ଏଭଳି ବନ୍ୟ ପ୍ରାଣୀଙ୍କୁ ଆକ୍ରମଣ ବା ହଇରାଣ କାର୍ଯ୍ୟରୁ ବିରତ ନ ରହିଲେ ଦୃଢ଼ ଆଇନଗତ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି ଡିଏଫଓ ଧନରାଜ ଏଚଡ଼ି ସୂଚନା ଦେଇଛନ୍ତି। ତେବେ ଏଥିରେ ସମ୍ପୃକ୍ତ ଅନ୍ୟମାନଙ୍କୁ ଗିରଫ କରିବାକୁ ବନ୍ୟପ୍ରାଣୀ ପ୍ରେମୀ ଦାବି କରିଛନ୍ତି।
