ଥୁଆମୂଳ ରାମପୁର, ୨୨ା୪ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା କର୍ଲାପାଟ ଅଭୟାରଣ୍ୟ ସଂଲଗ୍ନ ତେନ୍ତୁଳିପଦର ଗ୍ରାମରେ ଜଣେ ପଟ୍ଟାଧାରୀ ଆଦିବାସୀଙ୍କୁ ବନ ବିଭାଗ କର୍ମଚାରୀଙ୍କ ଦ୍ୱାରା ଅମାନୁଷିକ ନିର୍ଯାତନା ଦିଆଯାଇଥିବା ଅଭିଯୋଗ ହୋଇଛି। ଏହି ଘଟଣା ସ୍ଥାନୀୟ ଅଞ୍ଚଳରେ ତୀବ୍ର ପ୍ରତିକ୍ରିୟା ସୃଷ୍ଟି କରିଥିବା ବେଳେ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଏବେ ଜାତୀୟ ମାନବାଧିକାର କମିଶନ (NHRC) ଏହି ମାମଲାରେ ହସ୍ତକ୍ଷେପ କରିଛନ୍ତି।
ଅଭିଯୋଗ ଅନୁଯାୟୀ, ଗତ ୧୦ ତାରିଖ ଦିନ ତେନ୍ତୁଳିପଦର ଗ୍ରାମର ବୁଦୁ ମାଝୀ, ସୁଶାନ୍ତ ମାଝୀ ଏବଂ ବାଡ଼ି ମାଝୀ ନିଜ ପୈତୃକ ଚାଷ ଜମି ସଫା କରୁଥିବା ବେଳେ କର୍ଲାପାଟ ରେଞ୍ଜର ବନ କର୍ମଚାରୀମାନେ ସେଠାରେ ପହଞ୍ଚିଥିଲେ। ଜଙ୍ଗଲରେ ନିଆଁ ଲଗାଇବା ଭଳି ମିଥ୍ୟା ଅଭିଯୋଗ ଆଣି ସେମାନଙ୍କୁ କାବୁ କରାଯାଇ ପ୍ରାୟ ୪୮ ଘଣ୍ଟା କାଳ ବେଆଇନ ଭାବେ ଅଟକ ରଖାଯାଇଥିଲା। ଏହି ସମୟ ମଧ୍ୟରେ ସେମାନଙ୍କୁ ଲାଠି ଓ ଅନ୍ୟାନ୍ୟ ଶକ୍ତ ବସ୍ତୁରେ ନିର୍ଧୁମ ମାଡ଼ ମରାଯାଇଥିବା ବେଳେ ଜାତିଗତ ଆକ୍ଷେପ ଏବଂ ଅତ୍ୟନ୍ତ ଅଶ୍ଳୀଳ ଭାଷାରେ ଗାଳିଗୁଲଜ କରାଯାଇଥିବା ପୀଡ଼ିତମାନେ ପ୍ରକାଶ କରିଛନ୍ତି। ଏହି ନିର୍ଯାତନାରେ ଫରେଷ୍ଟର ବିଜୟ କୁମାର ଗୋପାଳ ଏବଂ ଗାର୍ଡ ଶେଷଦେବ ନାଏକ ସିଧାସଳଖ ସାମିଲ ଥିବା ନେଇ ଥାନାରେ ଲିଖିତ ଅଭିଯୋଗ ହୋଇଛି।
ପୀଡ଼ିତ ଆଦିବାସୀମାନେ ଜେଲରୁ ଜାମିନରେ ମୁକୁଳିବା ପରେ ପ୍ରଥମେ କର୍ଲାପାଟ ଥାନାର ଦ୍ୱାରସ୍ଥ ହୋଇ ଏଫ୍ଆଇଆର୍ ପ୍ରଦାନ କରିଥିଲେ। ତେବେ ପୋଲିସର ପ୍ରାଥମିକ ପ୍ରକ୍ରିୟା ଜାରି ରହିଥିବା ବେଳେ ବିଭିନ୍ନ ଗଣମାଧ୍ୟମରେ ଏହି ସମ୍ବେଦନଶୀଳ ଖବର ଗୁରୁତ୍ୱର ସହ ପ୍ରକାଶ ପାଇଥିଲା। ପୀଡ଼ିତଙ୍କ ଶରୀରରେ ଥିବା କ୍ଷତ ଚିହ୍ନ ଏବଂ ବନ ବିଭାଗର ଏଭଳି ବେଆଇନ କାର୍ଯ୍ୟ ସମ୍ପର୍କିତ ରିପୋର୍ଟ ମାନବାଧିକାର କର୍ମୀଙ୍କ ଦୃଷ୍ଟି ଆକର୍ଷଣ କରିଥିଲା। ପରିଣାମସ୍ୱରୂପ, ମାନବାଧିକାର କର୍ମୀ ଦିଲ୍ଲୀପ କୁମାର ଦାସଙ୍କ ଜରିଆରେ ଏହି ମାମଲା ଜାତୀୟ ମାନବାଧିକାର କମିଶନଙ୍କ ନିକଟରେ ପହଞ୍ଚିଥିଲା। କମିଶନ ଏହି ଘଟଣାକୁ ଅତ୍ୟନ୍ତ ଗୁରୁତର ସହ ଗ୍ରହଣ କରି ଏକ ମାମଲା (Diary No- 266/IN/2026) ରୁଜୁ କରିଛନ୍ତି।
ଜଙ୍ଗଲ ଅଧିକାର ଆଇନ ଅନୁସାରେ ପଟ୍ଟା ପାଇଥିବା ସତ୍ତ୍ୱେ ଜଙ୍ଗଲ ବିଭାଗର ଏଭଳି ଦମନମୂଳକ କାର୍ଯ୍ୟାନୁଷ୍ଠାନକୁ ବିଭିନ୍ନ ମହଲରେ ନିନ୍ଦା କରାଯାଇଛି। ସରକାରୀ ନିୟମର ଉଲ୍ଲଂଘନ ସହ ମାନବିକ ଅଧିକାରକୁ କ୍ଷୁଣ୍ଣ କରାଯାଇଥିବାରୁ ଦୋଷୀ ବନ କର୍ମଚାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି। ବର୍ତ୍ତମାନ ମାନବାଧିକାର କମିଶନଙ୍କ ହସ୍ତକ୍ଷେପ ପରେ ପୀଡ଼ିତମାନେ ନ୍ୟାୟ ପାଇବେ ବୋଲି ଆଶା ବାନ୍ଧିଛନ୍ତି।
