ମାଞ୍ଚେଷ୍ଟର, ୧।୯: ଭ୍ରମଣକାରୀ ଅଷ୍ଟ୍ରେଲିଆ ବିପକ୍ଷ ଆଗାମୀ ୩ ମ୍ୟାଚବିଶିଷ୍ଟ ଟି୨୦ ଓ ଦିନିକିଆ ସିରିଜ ଲାଗି ଇଂଲଣ୍ଡ ଦଳ ଘୋଷଣା କରାଯାଇଛି। ଅଷ୍ଟ୍ରେଲିଆକୁ କଡ଼ା ଟକ୍କର ଦେବା ଲାଗି ଘରୋଇ ଇଂଲଣ୍ଡ ମଜଭୁତ ଦଳ ଘୋଷଣା କରିଛି। ଯେଉଁଥିରେ ଜୋଫ୍ରା ଆର୍ଚର, ମାର୍କ ଉଡ୍ ଓ ଉଇକେଟ୍କିପର ଜୋଶ୍ ବଟଲର୍ଙ୍କୁ ଉଭୟ ଟି୨୦ ଓ ଦିନିକିଆ ଦଳରେ ସାମିଲ କରାଯାଇଛି। ନିୟମିତ ଅଧିନାୟକ ଜୋ ରୁଟ୍ କିନ୍ତୁ ଟି୨୦ ଦଳରୁ ଦୂରେଇ ରହିଛନ୍ତି। ତେବେ ସେ ଦିନିକିଆ ସିରିଜ ଖେଳିବେ। ସେହିଭଳି ଷ୍ଟାର୍ ଅଲ୍ରାଉଣ୍ଡର ବେନ୍ ଷ୍ଟୋକ୍ସ ମଧ୍ୟ ଉଭୟ ସିରିଜରୁ ବାଦ୍ ପଡ଼ିଛନ୍ତି। କ୍ୟାନସରରେ ପୀଡ଼ିତ ଥିବା ବାପାଙ୍କୁ ଦେଖା କରିବା ଲାଗି ଷ୍ଟୋକ୍ସ ନ୍ୟୁଜିଲାଣ୍ଡ ଯାଇଛନ୍ତି। ଏହି କାରଣରୁ ସେ ପାକିସ୍ତାନ ବିପକ୍ଷ ଶେଷ ୨ଟି ଟେଷ୍ଟ ମ୍ୟାଚ୍ ଖେଳିପାରି ନ ଥିଲେ। ଏଠାରେ ପ୍ରକାଶଯୋଗ୍ୟ, ଇଂଲଣ୍ଡ ଓ ଅଷ୍ଟ୍ରେଲିଆ ମଧ୍ୟରେ ସେପ୍ଟେମ୍ବର ୪ରୁ ଟି୨୦ ସିରିଜ ଆରମ୍ଭ ହେବ। ଟି୨୦ର ସମସ୍ତ ୩ଟି ମ୍ୟାଚ୍ ସାଉଥାମ୍ପଟନରେ ଖେଳାଯିବ। ସେହିଭଳି ୩ଟି ଯାକ ଦିନିକିଆ ମ୍ୟାଚ୍ ଯଥାକ୍ରମେ ସେପ୍ଟେମ୍ବର ୧୧, ୧୩ ଓ ୧୬ରେ ମାଞ୍ଚେଷ୍ଟରରେ ଅନୁଷ୍ଠିତ ହେବ।
