ନୂଆଦିଲ୍ଲୀ,୭ା୩: ଚଳିତ ମାସରେ ହେବାକୁଥିବା ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ଭାରତୀୟ ଦଳକୁ ସାହାଯ୍ୟ କରିବା ଲାଗି ଭାରତୀୟ ଫୁଟ୍ବଲ ଆଇକନ ସୁନୀଲ ଛେତ୍ରୀ ଅନ୍ତର୍ଜାତୀୟ ଅବସରରୁ ପ୍ରତ୍ୟାବର୍ତ୍ତନ କରିବାକୁ ନିଷ୍ପତ୍ତି ନେଇଛନ୍ତି। ଏ ନେଇ ସର୍ବଭାରତୀୟ ପୁଟ୍ବଲ ମହାସଂଘ(ଏଆଇଏଫ୍ଏଫ୍) ପକ୍ଷରୁ ଅବଗତ କରାଯାଇଛି। ୪୦ ବର୍ଷ ବୟସରେ ଛେତ୍ରୀ ଭାରତୀୟ ଦଳକୁ ଫେରିଛନ୍ତି।
ସୁନୀଲ ଫେରିଛନ୍ତି। ଅଧିନାୟକ, ଲିଡର, କିମ୍ବଦନ୍ତୀ ସୁନୀଲ ଚଳିତ ମାସରେ ହେବାକୁ ଥିବା ଫିଫା ଅନ୍ତର୍ଜାତୀୟ ମ୍ୟାଚ୍ରେ ଭାରତ ଲାଗି ଖେଳିବେ ବୋଲି ଏଆଇଏଫ୍ଏଫ୍ ସୋସିଆଲ ମିଡିଆ ଏକ୍ସ’ରେ ପୋଷ୍ଟ କରି ସୂଚନା ଦିଆଯାଇଛି।
୨୦୦୫ରେ ଅନ୍ତର୍ଜାତୀୟସ୍ତରରେ ପଦାର୍ପଣ କରିଥିବା ଛେତ୍ରୀ ଭାରତ ପାଇଁ ସର୍ବାଧିକ ମ୍ୟାଚ୍ ଖେଳିବା ଏବଂ ସର୍ବାଧିକ ସଂଖ୍ୟକ ଗୋଲସ୍କୋର କରିବା ରେକର୍ଡ ସହ ଗତବର୍ଷ ଅବସର ଘୋଷଣା କରିଥିଲେ। କିନ୍ତୁ ତାଙ୍କୁ ୨୬ ଜଣିଆ ଭାରତୀୟ ଦଳରେ ସାମିଲ କରାଯାଇଛି। ଫଳରେ ସେ ଅବସର ଘୋଷଣା କରିବାର ଏକବର୍ଷ ମଧ୍ୟରେ ପ୍ରତ୍ୟାବର୍ତ୍ତନ କରିଛନ୍ତି।
ସେ ଗତବର୍ଷ ଜୁନ୍ ୬ରେ କୁଏଟ୍ ବିପକ୍ଷରେ ଖେଳାଯାଇଥିବା ଫିଫା ବିଶ୍ୱକପ ୍କ୍ୱାଲିଫାୟର୍ସ ମ୍ୟାଚ୍ ପରେ ଅବସର ନେଇଥିଲେ। ଅବସର ପରଠାରୁ ସେ ଇଣ୍ଡିଆନ୍ ସୁପର ଲିଗ୍ରେ ବେଙ୍ଗାଲୁରୁ ଏଫ୍ସି ଲାଗି ଖେଳିବା ଜାରି ରଖିଥିଲେ। ସେ ଚଳିତ ସିଜନରେ ୨୩ ମ୍ୟାଚ୍ରେ ୧୨ ଗୋଲ କରିଥିଲେ, ଯାହାକି ଭାରତୀୟଙ୍କ ମଧ୍ୟରେ ସର୍ବାଧିକ।
ମାନୋଲୋ ମାର୍କ୍ୟୁଜ୍ଙ୍କ ମାର୍ଗଦର୍ଶନରେ ଭାରତୀୟ ଦଳ ଆସନ୍ତା ୧୯ ତାରିଖରେ ମାଳଦ୍ୱୀପ ସହ ଏକ ବନ୍ଧୁତ୍ୱପୂର୍ଣ୍ଣ ମ୍ୟାଚ୍ ଖେଳିବ। ଏହାପରେ ୨୫ ତାରିଖରେ ବାଂଲାଦେଶ ବିପକ୍ଷରେ ଭାରତ ଏଏଫ୍ସି ଏସିଆନ କପ୍ ୨୦୨୭ କ୍ୱାଲିଫାୟର୍ସ ଅନ୍ତିମ ରାଉଣ୍ଡର ପ୍ରଥମ ମ୍ୟାଚ୍ ଖେଳିବ।
ମାର୍କ୍ୟୁଜ୍ କହିଛନ୍ତି, ଏସିଆନ କପ୍ ଲାଗି ଯୋଗ୍ୟତା ହାସଲ କରିବା ଆମ ପାଇଁ ଖୁବ୍ ଗୁରୁତ୍ୱପୂର୍ଣ୍ଣ। ଟୁର୍ନାମେଣ୍ଟର ଗୁରୁତ୍ୱ ଏବଂ ଆଗକୁ ଆମେ ଖେଳିବାକୁ ଥିବା ମ୍ୟାଚ୍କୁ ଦୃଷ୍ଟିରେ ରଖି ଜାତୀୟ ଦଳକୁ ସୁଦୃଢ଼ କରିବା ଲାଗି ମୁଁ ଛେତ୍ରୀଙ୍କ ସହ ଆଲୋଚନା କରିଥିଲି। ସେ ରାଜି ହୋଇଥିଲେ। ଏଥିଯୋଗୁ ତାଙ୍କୁ ଦଳରେ ସାମିଲ କରାଯାଇଛି।
ଭାରତକୁ ଏସିଆନ କପ୍ ଲାଗି କ୍ୱାଲିଫାଇଙ୍ଗ ଗ୍ରୁପ୍ରେ ବାଂଲାଦେଶ, ହଂକଂ ଓ ସିଙ୍ଗାପୁର ସହ ସାମିଲ କରାଯାଇଛି। ଗତ ସଂସ୍କରଣରେ ଭାରତ ନୈରାଶ୍ୟଜନକ ପ୍ରଦର୍ଶନ କରିଥିଲା। ଭାରତ ତା’ର ସମସ୍ତ ଗ୍ରୁପ୍ ପର୍ଯ୍ୟାୟରେ ପରାଜିତ ହୋଇଥିଲା।
ଗୋଲକିପର: ଅମରିନ୍ଦର ସିଂ, ଗୁରମିତ ସିଂ, ବିଶାଲ କେଥ।
ଡିଫେଣ୍ଡର: ଆଶିଷ ରାଇ, ବୋରିସ ସିଂ ଥାଙ୍ଗଜାମ, ଚିଙ୍ଗଲେନସାନା ସିଂ କୋନଶାମ, ମିଙ୍ଗଥାନମାଓ୍ବଲା, ମେହତାବ ସିଂ, ରାହୁଲ ଭେକେ, ରୋହନ ସିଂ, ସନ୍ଦେଶ ଝିଙ୍ଗାନ, ସୁବାଶିଷ ବୋଷ।
ମିଡ୍ଫିଲ୍ଡର: ଆଶିକ କୁରୁନିୟାନ, ଆୟୁଷ ଦେବ ଛେତ୍ରୀ, ବ୍ରାଣ୍ଡନ ଫର୍ନାଣ୍ଡେସ, ଜ୍ୟାକ୍ସନ ସିଂ ଥୋଉନାଓଜାମ, ଲାଲେଙ୍ଗମାଓ୍ବିଆ, ଲିଷ୍ଟନ କୋଲାକୋ, ମହେଶ ସିଂ ନାଓରେମ, ସୁରେଶ ସିଂଓ୍ବାଙ୍ଗଜାମ।
ଫର୍ଓ୍ବାର୍ଡ: ସୁନୀଲ ଛେତ୍ରୀ, ଫାରୁଖ ଚୌଧାରୀ, ଇର୍ଫାନ ୟାଦ୍ୱାଦ, ଲଲିଆଞ୍ଜୁଆଲା ଚାଙ୍ଗଟେ ଓ ମନ୍ଭିର ସିଂ।
