ଭୋଗରାଇ,୨୦।୯(ଡି.ଏନ.ଏ.)-ସୁବର୍ଣ୍ଣରେଖା ଉପରମୁଣ୍ଡରେ ଘନ ଘନ ଲଘୁଚାପ ଜନିତ ବର୍ଷା ଯୋଗୁ ନିମ୍ନ ଅବବାହିକାରେ ବନ୍ୟା ଦେଖାଦେଇଛି। ସୁବର୍ଣ୍ଣରେଖା ଜଳସ୍ତର ସତର୍କ ସୂଚନା ୯.୪୫ମିଟର ତଳେ ପ୍ରବାହିତ ହେଉଥିବା ବେଳେ ଭୋଗରାଇ ଧୋୟା ଅଞ୍ଚଳର ୧୮ ପଞ୍ଚାୟତର ଶତାଧିକ ଗାଁ ଅଦ୍ୟାବଧି ପାଣିଘେରରେ ରହି ନାନା ଅସୁବିଧାର ସମ୍ମୁଖୀନ ହେଉଛନ୍ତି। ବନ୍ୟା ପ୍ଳାବିତ ଅଞ୍ଚଳରେ ପାନୀୟ ଜଳ ସଙ୍କଟ ଦେଖାଦେବାରୁ ବିଭିନ୍ନ ସଂକ୍ରାମକ ରୋଗ ପ୍ରାଦୁର୍ଭାବ ଦେଖାଦେଇଛି। ୫୦ହଜାରରୁ ଊର୍ଦ୍ଧ୍ୱ ଲୋକ ଜଳବନ୍ଦୀ ହୋଇ ରହିଥିବାରୁ ଜୀବନଜୀବିକା ଦୁର୍ବିଷହ ହୋଇପଡ଼ିଛି। ଗୋଟିଏ ଗାଁରୁ ଅନ୍ୟ ଗାଁକୁ ଯିବାକୁ ଡଙ୍ଗା ଏକମାତ୍ର ସାହାରା ହୋଇଛି। ଭୋଗରାଇ ପଞ୍ଚାୟତର କୋଷ୍ଟ କେନାଲ ଆଡ଼ିରେ ୬୦ରୁ ଊର୍ଦ୍ଧ୍ୱ ପରିବାର ଜଳବନ୍ଦୀ ହୋଇରହିଥିବାରୁ ଉଚ୍ଚସ୍ଥାନକୁ ଉଠିଯାଇ ପଲିଥିନ ତଳେ ଆଶ୍ରୟ ନେଇଛନ୍ତି। ରବିବାର କଂଗ୍ରେସ ପକ୍ଷରୁ ସତ୍ୟଶିବ ଦାସଙ୍କ ନେତୃତ୍ୱରେ ଏକ ଟିମ୍ ବନ୍ୟାଞ୍ଚଳ ପରିଦର୍ଶନ କରି ଯୁଦ୍ଧକାଳୀନ ଭିତ୍ତିରେ ଦୁର୍ଗତଙ୍କ ପାଇଁ ରିଲିଫ୍ ସାମଗ୍ରୀ ଯୋଗାଇଦେବାକୁ ସରକାରଙ୍କଠାରେ ଦାବି କରିଛନ୍ତି। ଭୋଗରାଇ ସରପଞ୍ଚ ପ୍ରବୀର କୁମାର ଗିରି ବିପନ୍ନଙ୍କଠାରେ ପହଞ୍ଚତ୍ ଶୁଖିଲା ଖାଦ୍ୟ ବଣ୍ଟନ କରିବା ସହିତ ପାନୀୟଜଳ ଯୋଗାଇଦେବାର ବ୍ୟବସ୍ଥା କରିଥିବା ସୂଚନା ମିଳିଛି।
ସୁବର୍ଣ୍ଣରେଖା ଉପରମୁଣ୍ଡରେ ଚାନ୍ଦିଲି ଡ୍ୟାମ୍ ସହ ଗାଲୁଡିହି, ଖଡ଼ଖାଇ, ବାଙ୍କିବଲ ଆଦି ଜଳାଧାର ରହିଛି। ଏହି ଡ୍ୟାମ୍ ଓ ଜଳାଧାରରୁ ପର୍ଯ୍ୟାୟକ୍ରମେ ସୁବର୍ଣ୍ଣରେଖାକୁ ପାଣି ନିଷ୍କାସନ କରାଯାଉଛି। ଚଳିତବନ୍ୟାରେ ଏ ସମସ୍ତ ଜଳାଧାରରୁ ସେକେଣ୍ଡକୁ ୨ଲକ୍ଷ କ୍ୟୁସେକ ଘନଫୁଟ୍ ପାଣି ପର୍ଯ୍ୟାୟକ୍ରମେ ଛଡ଼ାଯାଇଥିବାରୁ ବଡ଼ବନ୍ୟାକୁ ଟଳାଇ ଦିଆଯାଇଥିବା ସେଚ ବିଭାଗ ପ୍ରକାଶ କରିଛନ୍ତି। ଅବିଶ୍ରାନ୍ତ ବର୍ଷାରେ ଭୋଗରାଇରେ ଦେଢ଼ଲକ୍ଷ ଘନଫୁଟ୍ ଉତ୍ତରଭୋଗରାଇରେ ଜମି ରହିଥିବା ବେଳେ ସୁବର୍ଣ୍ଣରେଖା ନଦୀରେ ଅନ୍ୟୁନ ଦେଢ଼ଲକ୍ଷ ଘନଫୁଟ୍ ଓ ବିଭିନ୍ନ ଜଳାଧାରରୁ ନଦୀକୁ ପାଣି ନିଷ୍କାସନ ଏକ ସଙ୍ଗେ କରାଯାଇଥିଲା। ଚଳିତବନ୍ୟା ୨୦୦୭ ରେକର୍ଡ଼କୁ ଭଙ୍ଗ କରିଥାନ୍ତା ବୋଲି ସେଚ ବିଭାଗ ପକ୍ଷରୁ କୁହାଯାଇଛି।
