କେନ୍ଦୁଝର, ୨୫।୪(ସ୍ବ.ପ୍ର.): କେନ୍ଦୁଝର ଜିଲା ତେଲକୋଇ ରେଞ୍ଜ ଅନ୍ତର୍ଗତ କାଞ୍ଜିପାଣି ଘାଟି ଜଙ୍ଗଲର ବିଭିନ୍ନ ସ୍ଥାନରେ ନିଆଁ ଲାଗିଥିବାରୁ ବ୍ୟାପକ ଜଙ୍ଗଲ ପୋଡ଼ି ଯାଇଛି। କେନ୍ଦୁଝର ଜିଲାରେ ତାପମାତ୍ରା ୪୦ ଡିଗ୍ରୀରେ ପହଞ୍ଚିଥିବାବେଳେ ଏଭଳି ନିଆଁ ପରିବେଶକୁ ଅଧିକ ଉତ୍ତପ୍ତ କରିଦେଉଛି। ଫଳରେ ମୂଲ୍ୟବାନ ଗଛଲତା ନଷ୍ଟ ହେଉଛି। ପୋଡୁ ଚାଷ ତଥା ଅନ୍ୟାନ୍ୟ କାରଣ ଯୋଗୁ ନିଆଁ ଲାଗୁଥିଲେ ହେଁ ବନ ବିଭାଗ ବନବାସୀଙ୍କୁ ସଚେତନ କରିବାରେ କିମ୍ବା ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ବିଫଳ ହେଉଥିବା ଏଭଳି ହେକ୍ଟର ହେକ୍ଟର ପରିମିତ ଜଙ୍ଗଲ ନଷ୍ଟ ହେଉଥିବା ପରିବେଶବିତମାନେ ମତବ୍ୟକ୍ତ କରୁଛନ୍ତି। ଉକ୍ତ ଜଙ୍ଗଲ ଓ ପାହାଡ଼ରେ ବାଘ, ଭାଲୁ, ହାତୀ, ହରିଣ, ବାରହା ଆଦି ଜୀବଜନ୍ତୁ ରହିଥିଲେ ହେଁ ପ୍ରବଳ ଗରମ ସାଙ୍ଗକୁ ନିଆଁ ସେମାନଙ୍କ ଜୀବନକୁ ଦୁର୍ବିସହ କରି ଦେଉଛି। ଫଳରେ ପ୍ରାଣ ବଞ୍ଚାଇବା ପାଇଁ ଅନେକ ଗୋଟିଏ ଜଙ୍ଗଲରୁ ଅନ୍ୟ ଜଙ୍ଗଲକୁ ପଳାୟନ କରୁଛନ୍ତି ଅଥବା ଗ୍ରାମାଞ୍ଚଳମୁଖି ହୋଇ ମୃତ୍ୟୁମୁଖରେ ପଡିଛନ୍ତି। ସେହିପରି ଏହାର ସୁରକ୍ଷା ପାଇଁ ଥିବା ବନବିଭାଗ ଏହିସବୁ ଦେଖି ଆଖି ବୁଜି ଦେଇଥିବାବେଳେ ସେମାନଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ହେଉ ନ ଥିବାରୁ ଉଦ୍ବେଗ ପ୍ରକାଶ ପାଇଛି।
