ସିଡ୍ନୀ,୨୧ା୮(ପି.ଟି.): ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡରେ ଅନୁଷ୍ଠିତ ମହିଳା ବିଶ୍ୱକପ ଶେଷ ହୋଇଛି। ପ୍ରଥମ ଥର ପାଇଁ ଫାଇନାଲରେ ପ୍ରବେଶ କରିଥିବା ସ୍ପେନ୍ ୟୁରୋ ଚାମ୍ପିୟନ ଇଂଲଣ୍ଡକୁ ୧-୦ରେ ପରାସ୍ତ କରି ଚାମ୍ପିୟନ ଆଖ୍ୟା ଅର୍ଜନ କରିଛି। ଉଭୟ ଦଳ ପ୍ରଥମ ଥର ଫାଇନାଲରେ ପ୍ରବେଶ କରିଥିବା ବେଳେ ଅଧିନାୟିକା ଓଲଗା କାରମୋନାଙ୍କ ଏକମାତ୍ର ଗୋଲ ବଳରେ ଇଂଲଣ୍ଡକୁ ୧-୦ରେ ପରାସ୍ତ କରିଛି ସ୍ପେନ୍। ଏହା ସହିତ ୟୁରୋ ୨୦୨୨ କ୍ୱାର୍ଟର ଫାଇନାଲ ପରାଜୟ ପ୍ରତିଶୋଧ ନେଇଛି ସ୍ପେନ୍। ୧୯୬୬ ପରଠାରୁ ଇଂଲଣ୍ଡ ପୁରୁଷ ଓ ମହିଳା ଦଳ ଟ୍ରଫି ହାସଲରେ ବିଫଳ ହୋଇଥିଲେ। ଚଳିତବର୍ଷ ଅପରାଜେୟ ଭାବରେ ଫାଇନାଲରେ ପ୍ରବେଶ କରିଥିଲେ ମଧ୍ୟ ସ୍ପେନ୍ର ରଣନୀତି ଆଗରେ ଦଳ ହାର୍ ମାନିଛି। କ୍ରମାଗତ ଦ୍ୱିତୀୟ ଥର ପାଇଁ ସରିନା ଓ୍ବିଗ୍ମ୍ୟାନଙ୍କ ଦଳ ରନର ଅପ୍ ରହିଛି। ୨୦୧୯ରେ ସରିନାଙ୍କ ଅଧୀନରେ ଖେଳି ନେଦରଲାଣ୍ଡ୍ସ ମଧ୍ୟ ରନର ଅପ୍ ହୋଇଥିଲା। ବିଶ୍ୱର ସପ୍ତମ ଖେଳାଳି ଭାବରେ ବିଶ୍ୱକପ୍ର ଉଭୟ ସେମି ଫାଇନାଲ ଓ ଫାଇନାଲରେ ସ୍କୋର କରିବାର ରେକର୍ଡ କରିଛନ୍ତି ସ୍ପାନିଶ ଅଧିନାୟିକା ଓଲଗା କାରମୋନା। ୨୩ ବର୍ଷ ୬୯ ଦିନରେ ଗୋଲ ସ୍କୋର କରିବା ସହିତ ଫାଇନାଲରେ ଚତୁର୍ଥ ସର୍ବକନିଷ୍ଠ ଖେଳାଳି ଭାବରେ ଏକ ଫାଇନାଲରେ ସ୍କୋର କରିବାର ରେକର୍ଡ କରିଛନ୍ତି।
ସ୍ପେନ୍ ଦଳ ଆରମ୍ଭରୁ ଛୋଟ ପାସ୍ରେ ଖେଳି ଇଂଲଣ୍ଡକୁ ଚାପରେ ରଖିଥିଲା। ମ୍ୟାଚ୍ର ପଞ୍ଚମ ମିନିଟରେ ଲରେନ୍ ହେମ୍ପଙ୍କ ଶଟ୍କୁ ସ୍ପେନ୍ ଗୋଲ କିପର ଅଟକାଇବାରେ ସମର୍ଥ ହୋଇଥିଲେ। ୧୮ ତମ ମିନିଟରେ ପାରାଉଲେଓ ଏକ ଗୋଲ ସ୍କୋର କରିବାର ନିକଟତର ହୋଇଥିବା ବେଳେ ଇଂଲଣ୍ଡ ଗୋଲି ମେରୀ ଅର୍ପସ୍ ଏହାକୁ ରୋକି ଦେଇଥିଲେ। ୨୯ତମ ମିନିଟରେ ଅଧିନାୟିକା ତଥା ଡିଫେଣ୍ଡର ଓଲଗା କାରମୋନା ସ୍କୋର କରିଥିଲେ। ମାରିଓନା କାଲଡାଣ୍ଟେଙ୍କ ପାସ୍କୁ ସେ ଗୋଲରେ ପରିଣତ କରିଥିଲେ। ୧-୦ରେ ଆଗୁଆ ରହିବା ପରେ ସ୍ପେନ୍ ପୁନର୍ବାର ରକ୍ଷଣାତ୍ମକ ଢଙ୍ଗରେ ଖେଳିବା ଆରମ୍ଭ କରିଥିଲା। ପ୍ରଥମାର୍ଦ୍ଧରେ ୧-୦ରେ ଆଗୁଆ ରହିବା ପରେ ଦ୍ୱିତୀୟାର୍ଦ୍ଧର ୫୫ତମ ମିନିଟରେ ଲରେନ୍ ହେମ୍ପଙ୍କୁ ୟେଲୋକାର୍ଡ ମିଳିଥିଲା। ୬୬ ତମ ମିନିଟରେ ସ୍ପେନ୍ ନିକଟରେ ୨-୦ରେ ଆଗୁଆ ହେବାର ସୁଯୋଗ ରହିଥିଲେ ମଧ୍ୟ ମେରୀ ଅର୍ପସ ଏହାକୁ ରୋକି ଦେଇଥିଲେ।
ରବିବାର ଫାଇନାଲରେ ସ୍ପେନ୍ ନିଜର ଚିରାଚରିତ ଟିକିଟାକା(ଶର୍ଟ ପାସ୍)ରେ ଖେଳି ଇଂଲଣ୍ଡକୁ ଚାପରେ ରଖିଥିଲା। ଦଳ ୫୮ ପ୍ରତିଶତ ସମୟ ବଲକୁ ନିୟନ୍ତ୍ରଣରେ ରଖିଥିଲା। ଦଳ ୧୩ ଶଟ୍ ମାରିଥିବା ବେଳେ ଏଥି ମଧ୍ୟରୁ ୫ଟି ଟାର୍ଗେଟରେ ରହିଥିଲା। ଅନ୍ୟପକ୍ଷରେ ରବିବାରର ଫାଇନାଲରେ ଇଂଲଣ୍ଡ ଉପରେ ଭାଗ୍ୟଦେବୀ ପ୍ରସନ୍ନ ନ ଥିଲେ। ଇଂଲଣ୍ଡ ଦଳ ୪ ଥର ସ୍କୋରିଂ ସୁଯୋଗ ପାଇଥିଲେ ମଧ୍ୟ ଏହା ଅଫ୍ସାଇଡ୍ ରହିଥିଲା। ଅନ୍ୟପକ୍ଷରେ ସ୍ପେନକୁ ୭ଟି କର୍ନର ମିଳିଥିବା ବେଳେ ଇଂଲଣ୍ଡକୁ ୩ କର୍ନର ମିଳିଥିଲା। ସ୍ପେନ୍ ଖେଳାଳି ବଲ୍କୁ ନିୟନ୍ତ୍ରଣରେ ରଖିବାରେ ସମର୍ଥ ହୋଇଥିବା ବେଳେ ଇଂଲଣ୍ଡ ଖେଳାଳି ଫାଉଲ୍ ମାରିଥିଲେ। ଇଂଲଣ୍ଡ ଦଳ ପକ୍ଷରୁ ୧୬ ଫାଉଲ୍ ମରାଯାଇଥିବା ବେଳେ ଲରେନ୍ ହେମ୍ପ ୟେଲୋ କାର୍ଡ ପାଇଥିଲେ।
