କେନ୍ଦୁଝର,୧୪ା୧୦(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ମୁଖ୍ୟାଳୟରେ ଏସ୍ସି/ଏସ୍ଟି ବିଭାଗ ଅଧୀନରେ ପରିଚାଳିତ ଅନ୍ବେଷା ହଷ୍ଟେଲରେ ରହୁଥିବା ୨୮ ଛାତ୍ରୀଛାତ୍ର ଭୂତାଣୁ ଜନିତ ଜ୍ୱରରେ ଆକ୍ରାନ୍ତ ହୋଇ ଧରଣୀଧର ମେଡିକାଲ କଲେଜ ହସ୍ପିଟାଲର ଶିଶୁ ଓ୍ବାର୍ଡରେ ଚିକିତ୍ସିତ ହେଉଛନ୍ତି। ଶନିବାର ହଷ୍ଟେଲରେ ଅନ୍ୟ ଛାତ୍ରୀଛାତ୍ରଙ୍କ ସ୍ବାସ୍ଥ୍ୟ ଅବସ୍ଥା ଏବଂ ହଷ୍ଟେଲର ସ୍ବାସ୍ଥ୍ୟ ଓ ପରିବେଶ ଅବସ୍ଥା ନିରୀକ୍ଷଣ କରିବାକୁ ସିଡିଏମ୍ଓ କେନ୍ଦୁଝରଙ୍କ ନେତୃତ୍ୱରେ ଏକ ସ୍ବାସ୍ଥ୍ୟ ଦଳ ଉକ୍ତ ହଷ୍ଟେଲକୁ ଯାଇଥିଲେ।
ପ୍ରକାଶ ଯେ, ଉକ୍ତ ହଷ୍ଟେଲରେ ସମୁଦାୟ ୪୬୦ ଛାତ୍ରୀଛାତ୍ର ମାଗଣାରେ ରହୁଥିବା ବେଳେ ବିଭିନ୍ନ ପବ୍ଲିକ ସ୍କୁଲରେ ଅଧ୍ୟୟନ କରୁଛନ୍ତି। ସେମାନଙ୍କୁ ସ୍କୁଲ ନେବା ଆଣିବା କରିବା ପାଇଁ ମାଗଣାରେ ବସ୍ ବ୍ୟବସ୍ଥା କରାଯାଇଛି।
ସବୁଦିନ ଭଳି ବ୍ରେଡ୍ ଓ ଜାମ୍ ଖାଇ ୧୯୦ ଜଣ ପିଲା ପଳାଶପଙ୍ଗାସ୍ଥିତ ଗ୍ରୀନ୍ ଫିଲ୍ଡ ସ୍କୁଲକୁ ପାଠ ପଢ଼ିବାକୁ ଯାଇଥିଲେ। ପ୍ରାର୍ଥନା ସମୟରେ ହଠାତ ୧୮ ଜଣ ପିଲା ଅସୁସ୍ଥ ହୋଇପଡ଼ିବାରୁ ତାଙ୍କୁ କେନ୍ଦୁଝର ଆଣି ମେଡିକାଲରେ ଭର୍ତ୍ତି କରାଯାଇଥିଲା। ପରେ ରାତିରେ ଆଉ ୧୦ ଜଣଙ୍କୁ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ମେଡିକାଲରେ ପରୀକ୍ଷା ବେଳେ ସେମାନେ ଭୂତାଣୁ ଜନିତ ଜ୍ୱରରେ ଆକ୍ରାନ୍ତ ହୋଇଥିବ ଜଣାପଡ଼ିଥିବା ମେଡିକାଲ ସୂତ୍ରରୁ ଜଣାପଡ଼ିଛି।
ଏନେଇ ହଷ୍ଟେଲ ପରିଚାଳକ ସନ୍ତୋଷ ସାହୁ କହିଛନ୍ତି, ସେମାନେ ସମସ୍ତେ ସକାଳେ ବ୍ରେଡ୍ ଓ ଜାମ୍ ଖାଇ ଯାଇଥିଲେ। ମଧ୍ୟାହ୍ନଭୋଜନ କରିବାକୁ ଭାତ ଓ ତରକାରୀ ପଠାଯାଇଥିଲା। ତେବେ ସେମାନଙ୍କ ମଧ୍ୟରୁ କିଛି ପିଲା ହଠାତ୍ ଅସୁସ୍ଥ ହୋଇପଡ଼ିଥିଲେ। ଆଜି ଡାକ୍ତରୀଦଳ ଆସି ପରିସ୍ଥିତି ଅନୁଧ୍ୟାନ କରିଯାଇଛନ୍ତି। ପିଇବା ପାଣି ବ୍ୟବସ୍ଥାକୁ ସୁଦୃଢ଼ କରାଯାଇଛି।
ଜିଲା ମୁଖ୍ୟ ଚିକିତ୍ସାଧିକାରୀ ଡାକ୍ତର କେ.ସି.ପୃଷ୍ଟି କହିଛନ୍ତି, ପିଲାମାନଙ୍କୁ ଜ୍ୱର ହୋଇଥିବା ବେଳେ କେତେକଙ୍କୁ ଝାଡ଼ା ହେଉଛି। ପିଲାମାନଙ୍କ ଚିକିତ୍ସା କରାଯାଉଛି ଏବଂ ଅବସ୍ଥା ଭଲ ରହିଛି। ଭୂତାଣୁ ଜନିତ ଜ୍ୱର ହୋଇଥିବା ଆଶଙ୍କା କରାଯାଉଛି। କାରଣ ଅନୁଧ୍ୟାନ କରିବାକୁ ଏକ ଟିମ୍ ସହିତ ହଷ୍ଟେଲକୁ ଯାଇଥିଲୁ। ଅନ୍ୟମାନଙ୍କ ଅବସ୍ଥା ଭଲ ଅଛି। ଜ୍ୱର ହେଲେ ମେଡିକାଲକୁ ପିଲାମାନଙ୍କୁ ଆଣିବା ପାଇଁ କୁହାଯାଇଛି।
