କେନ୍ଦୁଝର,୧୪।୬ କେନ୍ଦୁଝରର ଗଣପର୍ବ ହେଉଛି ରଜ। ଏହାକୁ ଲୋକେ ଅତ୍ୟନ୍ତ ଆନନ୍ଦ ଉଲ୍ଲାସର ସହିତ ପାଳନ କରିଥାନ୍ତି। ଝିଅବୋହୂମାନେ ବିଭିନ୍ନ ପ୍ରକାର ରଙ୍ଗ ବେରଙ୍ଗର ବସ୍ତ୍ର ପରିଧାନ କରି ଉତ୍ସବକୁ ପାଳନ କରିଥାଆନ୍ତି। ବିଭିନ୍ନ ରଜ ଗୀତ ଗାଇ ଏହି ଉତ୍ସବକୁ କେନ୍ଦୁଝର ଜିଲାର ପୁରପଲ୍ଲୀରେ ପାଳିତ ହୋଇଥାଏ। ବହୁ ପୁରୁଣା ପାରମ୍ପାରିକ ଗୀତର ବାସ୍ତବତା ଧୀରେ ଲୋପ ପାଇବାକୁ ବସିଛି। ସେହିପରି ଆଧୁନିକତାର ଚାକଚକ୍ୟରେ ହଜିବାକୁ ବସିଛି ପାରମ୍ପାରିକ ରଜ। ନା ଘରେ ଘରେ ଦେଖିବାକୁ ମିଳୁଛି କାଠ ଦୋଳି ଓ ନା ଏହାର କଟ କଟ ଶବ୍ଦ। ଏହା ମଧ୍ୟରେ ରଜ ସମୟରେ କେତେକ ସ୍ଥାନରେ ଏହି ପରମ୍ପରାକୁ ବଜାଇ ରଖିବା ପାଇଁ ଭିନ୍ନ ଭାବେ ଆରମ୍ଭ କରାଯାଉଛି ରଜ ମହୋତ୍ସବ। ଦୋଳି ଖେଳ ସହିତ ଦୋଳି ଗୀତ ପ୍ରତିଯୋଗିତା, ଲଡୁ, ତାସ, ବାଗୁଡ଼ି ଖେଳ ପ୍ରତିଯୋଗିତା ମଧ୍ୟ କରଯାଉଛି।
୨ବର୍ଷ ହେଲା କୋଭିଡ୍ କଟକଣା ପାଇଁ ଏହି ଗଣପର୍ବ ଫିକା ପଡିଯାଇଥିବାବେଳେ ଚଳିତ ବର୍ଷ କଟକଣା ନ ଥିବାରୁ ଜାକଜମକରେ ପାଳନ ପାଇଁ ପ୍ରସ୍ତୁତି ଆରମ୍ଭ ହୋଇଛି। ଗାଁ ଠାରୁ ସହର ପର୍ଯ୍ୟନ୍ତ ରଜ ଦୋଳି ପ୍ରସ୍ତୁତ ସରିଯାଇଛି। ଏହି ପର୍ବକୁ ଧୁମଧାମରେ ପାଳନ କରିବା ପାଇଁ ଗ୍ରାମାଞ୍ଚଳର ଲୋକମାନେ ଘର ଲିପାପୋଛା, ପରିବାର ସମସ୍ତ ନୂଆ ପୋଷାକ କିଣା କିଣି, ପିଠା ପଣା ପ୍ରସ୍ତୁତି ଆଦି ସାରିଛନ୍ତି। ସୋମବାର ସଜବାଜ ଥିବାର ପ୍ରସ୍ତୁତି ସବୁ ସରିଗଲାଣି। ମଙ୍ଗଳବାରଠାରୁ ତିନିଦିନ ଧରି ରଜ ପର୍ବକୁ ପାଳନ କରିବା ପାଇଁ ଲୋକମାନଙ୍କ ମଧ୍ୟରେ ଉତ୍ସାହ ଦେଖାଦେଇଛି। ବିଭିନ୍ନ ପ୍ରକାରର ଦୋଳି, କାଠ ଦୋଳି, ଚକ୍ରି ଦୋଳି, ରାମ ଦୋଳି ଆଦି ନିର୍ମାଣ ସରିଛି। କେନ୍ଦୁଝର ସହର କାଳୀପଡିଆରେ ରଜ ଉତ୍ସବ ପାଳନ ହେଉଥିବା ବେଳେ ଜିଲାର ଅନ୍ୟାନ୍ୟ ସ୍ଥାନ ସିତାବିଞ୍ଜ, ବିଣାଝରି, ରାଇସୁଆଁ, ପଦ୍ମପୁର, ଆନନ୍ଦପୁର, ଆଦି ଅଞ୍ଚଳରେ ବିଭିନ୍ନ କମିଟି ପକ୍ଷରୁ ରଜ ଉତ୍ସବ ପାଇଁ ଜୋରଦାର ପ୍ରସ୍ତୁତି ଆରମ୍ଭ ହୋଇଛି। ପୁଟୁଳିଆରେ ବିରାଟକାୟ ରାମ ଦୋଳି ଅନେକଙ୍କ ଆକର୍ଷଣର କେନ୍ଦ୍ର ବିନ୍ଦୁ ପାଲଟିଛି। ଏଥିରେ ଏକାଥରେ ୧୬ ଜଣ ଦୋଳି ଖେଳିଥାନ୍ତି। ଚାଷୀ ଚାଷ କାର୍ଯ୍ୟରୁ ବିରତ ହୋଇ ପର୍ବ ପାଳନ କରିଥାଏ। ଆଦିବାସୀ ଅଞ୍ଚଳରେ ଦଳ ଦଳ ପୁଅ ଓ ଝିଅ ହାତକୁ ହାତ ଧରି ମାଦଳର ତାଳେ ତଳେ ରାତି ତମାମ ନାଚିଥାନ୍ତି। ଚଳିତ ବର୍ଷ କଟକଣା ନ ଥିବାରୁ ଦୋଳି ଖେଳିବାସହ ପିଠା ପଣା ଖାଇ ମଜା କରିବା ପାଇଁ ସମସ୍ତେ ପ୍ରସ୍ତୁତ ଅଛନ୍ତି। ଏଣୁ ଧୁମ୍ଧାମରେ ଏହା ପାଳନ ହେବ ବୋଲି ଅବସରପ୍ରାପ୍ତ ପ୍ରାଧ୍ୟାପକ ଡକ୍ଟର ବିମ୍ବାଧର ବେହେରା କହିଛନ୍ତି।
