ବରଗଡ଼,୧୬।୭(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ଖରିଫ ଚାଷକାର୍ଯ୍ୟ ଜୋର୍ ଧରିଛି। ଏହି ସମୟରେ ଜିଲାରେ ସାର କଳାବଜାର ଚାଷୀଙ୍କୁ ଚିନ୍ତାରେ ପକାଇ ଦେଇଛି। ଗ୍ରୋମୋର ଏବଂ ଡିଏପି ସାର ଠିକ୍ଭାବେ ଉପଲବ୍ଧ ହେଉ ନଥିବାବେଳେ ତାହା କଳାବଜାରରେ ବିକ୍ରି ହେଉଥିବା ଅଭିଯୋଗ ହୋଇଛି। ଏଭଳି ଅଭିଯୋଗ ନେଇ ମଙ୍ଗଳବାର ସଂଯୁକ୍ତ କୃଷକ ସଂଗଠନ ମୁଖ୍ୟ ଜିଲା କୃଷି ଅଧିକାରୀ(ସିଡିଏଓ) ଲୋଚନ ଚନ୍ଦ୍ର ମାଝିଙ୍କୁ ଫେରାଦ ହୋଇ ଏକ ଦାବିପତ୍ର ପ୍ରଦାନ କରିଛି। ଦାବିପତ୍ରରେ ଉଲ୍ଲେଖ ରହିଛି, ଜିଲାରେ ଖରିଫ୍ରେ ୨ଲକ୍ଷ ୩୦ହଜାର ହେକ୍ଟର ଧାନ ଏବଂ ୧ଲକ୍ଷ ୨୦ହେକ୍ଟର ଅନ୍ୟ ଅଣଧାନ ଚାଷ ହୋଇଥାଏ। ଏହି ଦୃଷ୍ଟିରୁ ଜିଲାରେ ସାରର ଯଥେଷ୍ଟ ଆବଶ୍ୟକତା ରହିଥାଏ। କିନ୍ତୁ ଖରିଫ ଚାଷକାର୍ଯ୍ୟ ଆରମ୍ଭରୁ ଜିଲାରେ ଗ୍ରୋମୋର ଏବଂ ଡିଏପି ସାର ସଙ୍କଟ ଦେଖାଯାଇଛି। ପ୍ରାଥମିକ କୃଷି ସମବାୟ ସମିତି(ପାକ୍ସ) ଗୁଡ଼ିକରେ ବିଭାଗୀୟ କର୍ମଚାରୀ ଡିଏପି ସାର ନଥିବା କହୁଥିବା ବେଳେ ବାହାରେ କଳାବଜାରରେ ବିକ୍ରି ହେଉଥିବା ଅଭିଯୋଗ ହୋଇଛି। ଡିଏପି ସାରର ଦର ପକେଟ୍ ପ୍ରତି ୧୩୫୦ ଟଙ୍କା ରହିଥିବା ବେଳେ ତାକୁ ୧୬୦୦ ଟଙ୍କାରୁ ୧୭୦୦ ଟଙ୍କା ଯାଏ ଦରରେ ବିକ୍ରି କରାଯାଉଛି ବୋଲି ଅଭିଯୋଗ ହୋଇଛି। ଏହା ସହିତ ଡିଏପି ସାର କିଣିଲେ ନାନୋ ସାରକୁ ଅତିରିକ୍ତ ଭାବେ ଦିଆଯାଉଛି ଏବଂ ଚାଷୀ ଉପରେ ଅଧିକ ଆର୍ଥିକ ବୋଝ ପଡୁଥିବା ଚାଷୀମାନେ ଅଭିଯୋଗ କରିଛନ୍ତି। ଫଳରେ ସାର କଳାବଜାର କରୁଥିବା ବ୍ୟବସାୟୀଙ୍କ ବିରୋଧରେ କାର୍ଯ୍ୟାନୁଷ୍ଠାନ, ଡିଲରଙ୍କ ଦୋକାନ ସମ୍ମୁଖରେ ଷ୍ଟକ୍ ଏବଂ ସାରଦର ତାଳିକା ସାର୍ବଜନୀନ କରିବାପାଇଁ ଦାବି କରାଯାଇଛି। ସଂଯୁକ୍ତ କୃଷକ ସଂଗଠନର ଉପଦେଷ୍ଟା ରମେଶ ମହାପାତ୍ର, ସୁରେଶ ନେକାଣ୍ଟି ପ୍ରମୁଖ ଦାବିପତ୍ର ପ୍ରଦାନ ବେଳେ ଉପସ୍ଥିତ ଥିଲେ।
