ସମ୍ବଲପୁର,୨୦ା୮(ପ୍ରମୋଦ ବହିଦାର):ସାର କଳାବଜାର ଅଭିଯୋଗରେ କୃଷି ବିଭାଗ ପକ୍ଷରୁ ସମ୍ବଲପୁର ବରେଇପାଲିସ୍ଥିତ ଇଣ୍ଡିଆନ ଏଣ୍ଟରପ୍ରାଇଜେସ୍ର ରିଟେଲ୍କାଉଣ୍ଟରକୁ ଗତ ୧୪ତାରିଖ ସିଲ୍ କରାଯାଇଥିଲା। ହେଲେ ଏଣ୍ଟରପ୍ରାଇଜେସ୍ର ରିଟେଲ୍ କାଉଣ୍ଟର ଅନ୍ୟପାର୍ଶ୍ୱରେ ଥିବା ହୋଲସେଲ୍ କାଉଣ୍ଟର ଯଥାରୀତି ଖୋଲା ରହିଥିଲା। ଫଳରେ ଉକ୍ତ ବ୍ୟବସାୟୀ ସେଠାରେ ଅଧିକ ଦରରେ ସାର ବିକ୍ରି କରି ଚାଲିଥିଲେ। ହୋଲସେଲକୁ ଖୋଲା ଛାଡ଼ି ଦେଇ ପରୋକ୍ଷରେ ସାର କଳାବଜାରକୁ ପ୍ରୋତ୍ସାହିତ କରାଯାଇଥିଲା ବୋଲି ସମ୍ବଲପୁର ଜିଲା କୃଷକ ସଙ୍ଗଠନ ଅଭିଯୋଗ କରିଛି। ଏହାକୁ ନେଇ ମଙ୍ଗଳବାର ସଙ୍ଗଠନର କର୍ମକର୍ତ୍ତାମାନେ ସଭାପତି ଉମେଶ ମିଶ୍ରଙ୍କ ନେତୃତ୍ୱରେ ସମ୍ବଲପୁର ଉପଜିଲାପାଳ ଡା. ପୁଷ୍ପାଞ୍ଜଳି ପଣ୍ଡା ଓ ଜିଲା ମୁଖ୍ୟ କୃଷି ଅଧିକାରୀ ହେମନ୍ତ କୁମାର ଜେନାଙ୍କୁ ସାକ୍ଷାତ କରି ଉକ୍ତ ବିଷୟରେ ଅବଗତ କରିଥିଲେ। ତୁରନ୍ତ ଉକ୍ତ ଦୋକାନୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ସ୍ବରୂପ ଲାଇସେନ୍ସ ବାତିଲ କରି ଦୋକାନକୁ ସମ୍ପୂର୍ଣ୍ଣ ସିଲ୍ କରିବାକୁ ଦାବି କରିଥିଲେ। କୃଷକ ସଙ୍ଗଠନର ଅଭିଯୋଗ ପରେ କୃଷି ଅଧିକାରୀ ଜେନା ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରତିଶ୍ରୁତି ଦେଇଛନ୍ତି। ଖାଲି ସେତିକି ନୁହେଁ ଜିଲାର ବିଭିନ୍ନ ହୋଲସେଲ୍ ଓ ରିଟେଲ୍ ଦୋକାନରେ ମଧ୍ୟ ସାରର ଷ୍ଟକ ଯାଞ୍ଚ କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି। ଅପରପକ୍ଷରେ ପଶ୍ଚିମ ଓଡ଼ିଶା କୃଷକ ସଙ୍ଗଠନ ସମନ୍ବୟ ସମିତି ଆବାହକ ଅଶୋକ ପ୍ରଧାନ କହିଛନ୍ତି, ସମ୍ବଲପୁର ଜିଲା ଉପାନ୍ତ ଅଞ୍ଚଳ ଓ ଗ୍ରାମାଞ୍ଚଳରେ ସାର କଳାବଜାର ହେବା ନଜିର ରହିଛି। ମାତ୍ର ସମ୍ବଲପୁର ସଦର ମହକୁମାରେ ଏପରି ହେବାର ନଜିର ନାହିଁ। ବିଭିନ୍ନ ପିଏସିଏସ୍ ମାନଙ୍କରେ ବର୍ତ୍ତମାନ ସାର ଅଭାବ ଏପରିକି ଆଦୌ ନ ଥିବା ବେଳେ ଘରୋଇ ଦୋକାନୀମାନେ ସାର କଳାବଜାର କରୁଛନ୍ତି। ସେହିପରି ସମ୍ବଲପୁର ଜିଲା କୃଷକ ସୁରକ୍ଷା ସଙ୍ଗଠନ ସଭାପତି ଉମେଶ ଚନ୍ଦ୍ର ମିଶ୍ର ଜିଲାର ଚାଷୀମାନଙ୍କୁ ଜିଲା କୃଷି ବିଭାଗର ସହଯୋଗ ମିଳୁନାହିଁ ବୋଲି ଅଭିଯୋଗ କରିଥିଲେ। ସେ କହିଛନ୍ତି, ପିଏସିଏସ୍ ଓ ଏଲ୍ଏଏମ୍ପିଏସ୍ ମାନଙ୍କରେ ଚାଷୀଙ୍କୁ ସାର ମିଳୁନାହିଁ। ଅଥଚ ଖୋଲା ବଜାରରେ ସାର କଳାବଜାର ହେଉଛି। ତେବେ ସାର କଳାବଜାର କରୁଥିବା ବରେଇପାଲିସ୍ଥିତ ଇଣ୍ଡିଆନ ଏଣ୍ଟରପ୍ରାଇଜେସ୍ର ସିଲ୍ ପ୍ରକ୍ରିୟାର ତଦନ୍ତ କରିବା ସହ ଏଭଳି ଅସାଧୁ କାରବାରରେ ଲିପ୍ତ ଅଧିକାରୀ ଏବଂ ଦୋକାନୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଥିଲେ।
