ଫୁଲବାଣୀ ଅଫିସ, ୯ା୫: କନ୍ଧମାଳ ଜିଲା ସାରଙ୍ଗଗଡ଼ ଥାନା ଅଞ୍ଚଳରେ ଗୁଣି ଗାରେଡ଼ି ସନ୍ଦେହ କରି ଏକ ବୃଦ୍ଧ ଦମ୍ପତିଙ୍କୁ ଲୋକେ ଅଖାଦ୍ୟ ଖୁଆଇଛନ୍ତି। ସେମାନେ ବୃଦ୍ଧଙ୍କୁ ମରଣାନ୍ତକ ଆକ୍ରମଣ କରିଛନ୍ତି। ଲୁହା ଛଡ଼ରେ ମାଡ଼ ମରାଯିବାରୁ ତାଙ୍କ ଡାହାଣ ଗୋଡ଼ ଭାଙ୍ଗିଯାଇଛି। ଗୁରୁତର ଅବସ୍ଥାରେ ବୃଦ୍ଧଙ୍କୁ ଫୁଲବାଣୀସ୍ଥିତ ଜିଲା ମୁଖ୍ୟ ଚିକିତ୍ସାଳୟରେ ଭର୍ର୍ତ୍ତି କରାଯାଇଛି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ପ୍ରକାଶ ପାଇଛି। ଦମ୍ପତିଙ୍କ ପୁଅଙ୍କ ଅଭିଯୋଗକ୍ରମେ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।
ମିଳିଥିବା ସୂଚନା ଅନୁଯାୟୀ, ଦୁଇଦିନ ତଳେ ସାରଙ୍ଗଗଡ଼ ଅଞ୍ଚଳର ବୃଦ୍ଧ ଜଣଙ୍କ କୌଣସି କାମରେ ନିକଟସ୍ଥ ବଜାରକୁ ଯାଇଥିଲେ। ରାତିରେ ସେ ଘରକୁ ଫେରିବା ବେଳେ ବିଦ୍ୟୁତ୍ ଚାଲିଯାଇଥିଲା। ଅନ୍ଧାରରେ ଜାଣି ନ ପାରି ବୃଦ୍ଧଜଣଙ୍କ ପଡ଼ୋଶୀଙ୍କ ଘର ବାରଣ୍ଡାକୁ ଚାଲି ଯାଇଥିଲେ। ଏହାଦେଖି ସମ୍ପୃକ୍ତ ଘରର ଲୋକେ କାହିଁକି ଏଠାକୁ ଆସିଛୁ, କାହାକୁ ଗୁଣି କରିବୁ କହି ହଠାତ୍ ଆକ୍ରମଣ କରିଥିଲେ। ସାହିର ଅନ୍ୟମାନେ ମଧ୍ୟ ବୃଦ୍ଧଙ୍କୁ ଘେରିଯିବା ସହ ଛଡ଼ରେ ବାଡ଼େଇବା ଆରମ୍ଭ କରି ଦେଇଥିଲେ। ଦାଣ୍ଡରେ ଥିବା ନାତୁଣୀ ଏହା ଦେଖି ଘରକୁ ଆସି ଜଣାଇବା ପରେ ବୃଦ୍ଧଙ୍କ ସ୍ତ୍ରୀ ସେଠାକୁ ଯାଇଥିଲେ। ଲୋକେ ତାଙ୍କୁ ମଧ୍ୟ ଅଟକାଇଥିଲେ। ଏହାପରେ ଏକ ପାତ୍ରରେ ପାଣି ଆଣି ସେଥିରେ ଅଖାଦ୍ୟ ମିଶାଇ ଦମ୍ପତିଙ୍କୁ ଜୋର ଜବରଦସ୍ତ ୨/୩ ଥର ପିଆଇଥିଲେ। ଏଭଳି ଅମାନବୀୟ କାର୍ଯ୍ୟ ଓ ଯନ୍ତ୍ରଣାରେ ଛଟପଟ ହେଉଥିବା ବୃଦ୍ଧଙ୍କୁ ଦେଖି କେହିଜଣେ ଆମ୍ବୁଲାନ୍ସକୁ ଖବର ଦେଇଥିଲେ। କିଛି ସମୟ ପରେ ଆମ୍ବୁଲାନ୍ସ ପହଞ୍ଚି ବୃଦ୍ଧ ଦମ୍ପତିଙ୍କୁ ଫୁଲବାଣୀ ମୁଖ୍ୟ ଚିକିତ୍ସାଳୟକୁ ଆଣିଥିଲା। ସେଠାରେ ବର୍ତ୍ତମାନ ସୁଦ୍ଧା ବୃଦ୍ଧଜଣଙ୍କ ଚିକିତ୍ସିତ ହେଉଛନ୍ତି। ତାଙ୍କ ଗୋଡ ଭାଙ୍ଗିଛି। ଦମ୍ପତି ଏବେ ବି ଭୟଭୀତ ଅବସ୍ଥାରେ ଅଛନ୍ତି। ଗାଁକୁ ଫେରିଲେ ମାରି ଦିଆଯିବ ବୋଲି ଧମକ ମିଳୁଥିବା ଦମ୍ପତି ଏବଂ ତାଙ୍କ ପୁଅ ପ୍ରକାଶ କରିଛନ୍ତି। ଏ ନେଇ ସାରଙ୍ଗଗଡ ଥାନାଧିକାରୀ ବଧୂଲିକା ବିଶ୍ୱାଳଙ୍କୁ ପଚରିବାରେ, ଏହି ଘଟଣା ନେଇ ଅଭିଯୋଗକ୍ରମେ ନଂ.୪୦/୨୨ରେ ମାମଲା ରୁଜୁ ହୋଇଛି। ଖୁବ୍ଶୀଘ୍ର ଅଭିଯୁକ୍ତମାନଙ୍କୁ ଗିରଫ କରାଯିବ ବୋଲି କହିଛନ୍ତି।
