ସାଉଥାମ୍ପଟନ, ୧୩।୮: ଦୀର୍ଘ ଏକ ଦଶନ୍ଧିର ବ୍ୟବଧାନ ପରେ ପାକିସ୍ତାନ ଟେଷ୍ଟ ଦଳକୁ ଫେରିଛନ୍ତି ବ୍ୟାଟ୍ସମ୍ୟାନ ଫାଓ୍ବଦ ଆଲାମ୍। ଗୁରୁବାରଠାରୁ ସାଉଥାମ୍ପଟନରେ ଘରୋଇ ଇଂଲଣ୍ଡ ବିପକ୍ଷରେ ଆରମ୍ଭ ହୋଇଥିବା ଦ୍ୱିତୀୟ ଟେଷ୍ଟ ମ୍ୟାଚ୍ ଲାଗି ପାକିସ୍ତାନ ପକ୍ଷରୁ ଘୋଷିତ ଚୂଡ଼ାନ୍ତ ଏକାଦଶରେ ଆଲମ୍ଙ୍କୁ ସ୍ଥାନ ମିଳିଛି। ଫଳରେ ୩୪ ବର୍ଷୀୟ ଏହି ବାମହାତୀ ବ୍ୟାଟ୍ସମ୍ୟାନ ଦୀର୍ଘ ୧୦ ବର୍ଷ ୮ ମାସ ୧୬ ଦିନ ପରେ ପୁଣିଥରେ ପାକିସ୍ତାନ ଟେଷ୍ଟ ଦଳରେ ସାମିଲ ହୋଇଛନ୍ତି। ଶେଷଥର ପାଇଁ ସେ ନଭେମ୍ବର ୨୦୦୯ରେ ପାକିସ୍ତାନ ପକ୍ଷରୁ ଟେଷ୍ଟ ମ୍ୟାଚ୍ ଖେଳିଥିଲେ। ଏହି ସମୟ ମଧ୍ୟରେ ପାକିସ୍ତାନ ଦଳ ୮୮ ଟେଷ୍ଟ ମ୍ୟାଚ୍ ଖେଳିସାରିଛି। କିନ୍ତୁ ଆଲାମ୍ଙ୍କ କ୍ୟାରିୟରର ଏହା ୪ର୍ଥ ଟେଷ୍ଟ ମ୍ୟାଚ୍ ହୋଇଛି।
୨୫ତମ କ୍ରିକେଟର୍ ଭାବେ ଆଲାମ୍ ୧୦ ବର୍ଷର ଅପେକ୍ଷା ପରେ ଜାତୀୟ ଦଳ ପକ୍ଷରୁ ପୁନର୍ବାର ଟେଷ୍ଟ ମ୍ୟାଚ୍ ଖେଳିବାର ସୁଯୋଗ ପାଇଛନ୍ତି। ସେହିଭଳି ଦ୍ୱିତୀୟ ପାକିସ୍ତାନ କ୍ରିକେଟର୍ ଭାବେ ସେ ଏହି କ୍ଲବରେ ସାମିଲ ହୋଇଛନ୍ତି। ପୂର୍ବରୁ ୟୁନିସ୍ ଅହମ୍ମଦ ୧୭ ବର୍ଷର ବ୍ୟବଧାନ ପରେ ୧୯୮୭ରେ ପାକିସ୍ତାନ ପକ୍ଷରୁ ପୁଣିଥରେ ଟେଷ୍ଟ ମ୍ୟାଚ୍ ଖେଳିଥିଲେ। ମାତ୍ର ୧୯ ବର୍ଷ ବୟସରେ ପଦାର୍ପଣ କରିଥିବା ଫାଓ୍ବଦ ୩ଟି ଟେଷ୍ଟ ପରେ ୨୦୦୯ରେ ଦଳରୁ ବାଦ୍ ପଡ଼ିଥିଲେ। କିନ୍ତୁ ପୁନର୍ବାର ଦଳକୁ ପ୍ରତ୍ୟାବର୍ତ୍ତନ ଲାଗି କଠୋର ପରିଶ୍ରମ କରିଥିଲେ। ପାକିସ୍ତାନ ଘରୋଇ କ୍ରିକେଟ୍ରେ ସିନ୍ଧ ପକ୍ଷରୁ ଖେଳୁଥିବା ଫାଓ୍ବଦ ପ୍ରଥମଶ୍ରେଣୀ କ୍ରିକେଟ୍ରେ ବେଶ୍ ପ୍ରଭାବୀ ପ୍ରଦର୍ଶନ କରିଛନ୍ତି। ୬୫.୭୮ ଆଭରେଜରେ ସେ ୧୨,୨୬୫ ରନ୍ ସଂଗ୍ରହ କରିଛନ୍ତି। ଏହା ମଧ୍ୟରେ ୩୪ ଶତକ ସାମିଲ ରହିଛି। ୨୦୦୯ ପରେ ଯଦି ବିଶ୍ୱ କ୍ରିକେଟ୍ରେ ପ୍ରଥମ ଶ୍ରେଣୀ ମ୍ୟାଚ୍କୁ ନଜର ପକାଯାଏ ତେବେ ବିରାଟ କୋହଲି ଓ ଏବି ଡି ଭିଲର୍ସଙ୍କଠାରୁ ଆଲାମ୍ଙ୍କ ଆଭରେଜ ବହୁତ ଭଲ ରହିଛି।
