ସୋହେଲା,୮ା୮(ଅଶ୍ୱିନୀ କୁମାର ପାତ୍ର): ବରଗଡ଼ ଜିଲା ସୋହେଲାଠାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ସୋହେଲାର ରୋଶନ ଅଗ୍ରଓ୍ବାଲ (୪୮) ଏବଂ ତାଙ୍କ ପୁଅ ତରୁଣ(୧୨)ଙ୍କ ମୃତ୍ୟୁ ହୋଇଯାଇଛି। ଶୁକ୍ରବାର ସନ୍ଧ୍ୟାରେ ରୋଶନ ତାଙ୍କ ପୁଅ ସହ କୌଣସି କାମରେ ଥାନା ଛକ ପଟରୁ ମୁଖ୍ୟ ଛକକୁ ଏକ ସ୍କୁଟି ଯୋଗେ ଆସୁଥିବା ବେଳେ ଏକ ଦ୍ରୁତଗାମୀ ଟ୍ରକ୍ ଓଡି ୧୫ ଆର୍ ୭୩୦୧ ପଛରୁ ଧକ୍କା ଦେବାରୁ ତରୁଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ପିତା ରୋଶନଙ୍କ ବରଗଡ଼ର ଏକ ଘରୋଇ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା। ଦୁର୍ଘଟଣା ଏତେ ତୀବ୍ର ଥିଲା ଯେ ଟ୍ରକ୍ଟି ସ୍କୁଟିକୁ ଥାନା ଛକରୁ ଡାକବଙ୍ଗଳା ପର୍ଯ୍ୟନ୍ତ ଘୋଷାଡ଼ି ନେଇଥିଲା। ଆହତ ରୋଶନଙ୍କୁ ଉଦ୍ଧାର କରି ପ୍ରଥମେ ସୋହେଲା ଏବଂ ପରେ ବରଗଡ଼ ଏକ ଘରୋଇ ଡାକ୍ତରଖାନାକୁ ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କ ମୃତ୍ୟୁ ହୋଇଥିଲା। ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା ଏବଂ ରାତି ପ୍ରାୟ ୧୨ ଟା ପର୍ଯ୍ୟନ୍ତ ରାସ୍ତାରୋକୋ ହୋଇଥିଲା।
ଘଟଣାସ୍ଥଳରେ ସୋହେଲା ତହସିଲଦାର ଶୁଭରଞ୍ଜନ ନାୟକ, ବରଗଡ଼ ଅତିରିକ୍ତ ଏସ୍ପି ଡୋଳାମଣି ଭୋଇ, ପଦ୍ମପୁର ଏସ୍ଡିପିଓ ପାଣ୍ଡବ ଶବର ସୋହେଲା ଥାନା ଆଇଆଇସି ହରିଶଙ୍କର ଭୋଇ, ମେଳଛାମୁଣ୍ଡା ଥାନା ଆଇଆଇସି, ପଦ୍ମପୁର ଆଇଆଇସି ସମାରିଆ କ୍ରିସେନସିଆ ଉପସ୍ଥିତ ରହି ବୁଝାଶୁଝା କରିବା ପରେ ଏବଂ ସରକାରୀ ସହଯୋଗ ଦେବାକୁ ଲିଖିତ ପ୍ରତିଶ୍ରୁତି ଦେବାପରେ ରାସ୍ତାରୋକୋ ପ୍ରତ୍ୟାହାର ହୋଇଥିଲା। ଦୁର୍ଘଟଣାରେ ବାପା-ପୁଅଙ୍କ ମୃତ୍ୟୁରେ ଭଟଲି ବିଧାୟକ ଇରାଶିଷ ଆଚାର୍ଯ୍ୟ, ଏମ୍ପି ପ୍ରଦୀପ ପୁରୋହିତ ଗଭୀର ଶୋକ ଜଣାଇଛନ୍ତି। ଆଜି ସକାଳୁ ବିଧାୟକ ମୃତକଙ୍କ ଶେଷଯାତ୍ରାରେ ସାମିଲ ହୋଇ ପରିବାରବର୍ଗଙ୍କୁ ସାନ୍ତ୍ୱନା ଦେଇଥିଲେ। ସୋହେଲାରେ ଅସୁରକ୍ଷିତ ଜାତୀୟ ରାଜପଥରେ ବ୍ୟାପକ ସୁଧାର ନ କଲେ ଆଗାମୀ ଦିନରେ ବଡ଼ ଆନ୍ଦୋଳନ କରିବାକୁ ସୋହେଲା ଗ୍ରାମବାସୀ ଜଣାଇଛନ୍ତି।
