ବସ୍ତି,୧୫।୭: ଉତ୍ତର ପ୍ରଦେଶର ବସ୍ତି ଜିଲା କଲୱାରୀ ଥାନା ଅଞ୍ଚଳରୁ ଏକ ଅତି ନିନ୍ଦନୀୟ ଘଟଣା ସାମ୍ନାକୁ ଆସିଛି। ଜଣେ ପିତା ନିଜର ଦୁଇ ନାବାଳିକା ଝିଅଙ୍କ ସହ ବଳାତ୍କାର କରିଥିବା ଅଭିଯୋଗ ହୋଇଛି। ଏନେଇ ପୀଡ଼ିତାଙ୍କ ମା’ କଲୱାରୀ ଥାନାରେ ପହଞ୍ଚି ନିଜ ସ୍ବାମୀ ବିରୋଧରେ ଏକ ଲିଖିତ ଅଭିଯୋଗ ଦାୟର କରିଛନ୍ତି। ପୋଲିସ ଅଭିଯୁକ୍ତ ବାପା ବିରୋଧରେ ମାମଲା ରୁଜୁ କରି ତା’ର ସନ୍ଧାନ ଜାରି ରଖିଛି।
ପୋଲିସ ଦୁଇ ପୀଡ଼ିତା ନାବାଳିକାଙ୍କ ଡାକ୍ତରୀ ମାଇନା କରାଇବା ସହ କୋର୍ଟରେ ସେମାନଙ୍କ ବୟାନ ରେକର୍ଡ କରାଇଛି। ମିଳିଥିବା ସୂଚନା ଅନୁଯାୟୀ, ଅଭିଯୁକ୍ତ ବାପା ଜଣକ ମୂଳତଃ ଆମ୍ବେଦକରନଗର ଜିଲାର ବାସିନ୍ଦା। ସେ କଲୱାରୀ ଥାନା ଅଞ୍ଚଳର ଏକ ଗ୍ରାମରେ ନିଜ ସ୍ତ୍ରୀ ଏବଂ ୧୫ ଓ ୧୬ ବର୍ଷର ଦୁଇ ନାବାଳିକା ଝିଅଙ୍କ ସହ କୁଡ଼ିଆ ଘର କରି ରହୁଥିଲେ।
ମହିଳାଙ୍କ ଅଭିଯୋଗ ଅନୁଯାୟୀ, ସେମାନେ ଦୁଇଟି ପୃଥକ କୁଡ଼ିଆ ଘରେ ରହୁଥିଲେ। ତାଙ୍କ ଅନୁପସ୍ଥିତିର ସୁଯୋଗ ନେଇ ସ୍ବାମୀ ଝିଅମାନେ ରହୁଥିବା ଘରକୁ ଯାଇ ସେମାନଙ୍କ ସହ ବଳାତ୍କାର କରୁଥିଲେ। ଏ ବିଷୟରେ କାହାରିକୁ କହିଲେ ଜୀବନରୁ ମାରିଦେବାକୁ ସେ ଝିଅମାନଙ୍କୁ ଧମକ ଦେଇଥିବାରୁ ସେମାନେ ଭୟରେ ଚୁପ୍ ରହିଥିଲେ। ଗତ ଜୁନ ୧୪ ତାରିଖରେ ଅଭିଯୁକ୍ତ ବାପା କୌଣସି କାରଣରୁ ଘରୁ ଫେରାର୍ ହୋଇଯାଇଥିଲେ। ସେ ଯିବାର କିଛି ଦିନ ପରେ ଝିଅମାନେ ସାହସ ସଞ୍ଚୟ କରି ନିଜ ମା’ଙ୍କୁ ଏହି ପୈଶାଚିକ କାଣ୍ଡ ବିଷୟରେ ଜଣାଇଥିଲେ।
ମହିଳା ଜଣକ ଏ ବିଷୟରେ ଆମ୍ବେଦକରନଗରରେ ରହୁଥିବା ତାଙ୍କ ଶାଶୁଘର ଲୋକଙ୍କୁ ଜଣାଇଥିଲେ। ଏହା ପରେ ତାଙ୍କୁ ବିଭିନ୍ନ ଅଜ୍ଞାତ ନମ୍ବରରୁ ଫୋନ କଲ ଆସିବା ସହ ମାମଲା ରୁଜୁ ନ କରିବାକୁ ଧମକ ଓ ଚାପ ପ୍ରୟୋଗ କରାଯାଇଥିଲା। କଲୱାରୀ ଥାନା ପ୍ରଭାରୀ ନିରୀକ୍ଷକ ସନ୍ତୋଷ କୁମାର କହିଛନ୍ତି ଯେ, ମହିଳାଙ୍କ ଏତଲା ଆଧାରରେ ପୋକ୍ସୋ (POCSO) ଆକ୍ଟ ସହ ବିଭିନ୍ନ ସଙ୍ଗୀନ ଦଫାରେ ମାମଲା ରୁଜୁ କରାଯାଇଛି। ଦଣ୍ଡ ପ୍ରକ୍ରିୟା ସଂହିତା (CrPC) ର ଧାରା ୧୬୪ ଅନୁଯାୟୀ ଝିଅମାନଙ୍କ ବୟାନ ରେକର୍ଡ କରାଯାଇଛି ଏବଂ ଅଭିଯୁକ୍ତକୁ ଧରିବା ପାଇଁ ପୋଲିସ ଚଢ଼ଉ ଜାରି ରଖିଛି।
