କେନ୍ଦୁଝର,୧୯।୪(ସ୍ବ.ପ୍ର.): ସଦର ରେଞ୍ଜ ଅନ୍ତର୍ଗତ ପଳାଶପଙ୍ଗା ପଞ୍ଚାୟତ ସତେଇଭଞ୍ଜ ପାହାଡ ପାଶର୍ବ ନିକଟବର୍ତ୍ତୀ ଶ୍ରୀ ଜଗନ୍ନାଥ କାରଖାନା ରାସ୍ତା ସମ୍ମୁଖରେ ବୁଧବାର ଭାଲୁ ଆକ୍ରମଣରେ୨ ଜଣ ଆହତ ହୋଇଛନ୍ତି। ସେମାନେ ହେଲେ କାଉଁରୀକଳା ପଞ୍ଚାୟତ ଖୁଣ୍ଟାପଡା ଗ୍ରାମର ଦୁଲ୍ଲଭ ମୁଣ୍ତା(୪୫) ସାନପୁଅ ଜେମସ ମୁଣ୍ତା(୮)। ବଡପୁଅ ତୁଷାର ମୁଣ୍ତା(୧୨)ପ୍ରାଣ ବିକଳରେ ଦୌଡି ପଳାଇବାରୁ ଅଳ୍ପକେ ବର୍ତ୍ତି ଯାଇଛନ୍ତି।
ସୂଚନାଯୋଗ୍ୟ, ଝୁମ୍ପୁରା ସ୍ଥିତ ଅର୍ଶଳାରୁ ଜଙ୍ଗଲ ରାସ୍ତାଦେଇ ଚାଲିଚାଲି ଘରକୁ ଯାଉଥିଲେ। ସେହିସମୟରେ ଦୁଇଟି ଭାଲୁ ଜଙ୍ଗଲରୁ ବାହାରି ରାସ୍ତା ଅତିକ୍ରମ କରିଯାଉଥିବା ବେଳେ ପ୍ରଥମେ ଏକ ଭାଲୁ ଜେମସ ମୁଣ୍ତାଙ୍କୁ ଆକ୍ରମଣ କରିଥିଲା। ତେବେ ଜେମସକୁ ରକ୍ଷା କରିବାକୁ ଯାଇ ଏମାନେ ମଧ୍ୟ ଭାଲୁ ହାବୁଡରେ ପଡିଯାଇଥିଲେ। ସେହି ସମୟରେ ଏକ ବାଇକ୍ ଆରୋହୀ ଆସୁଥିବାରୁ ଦୁଇଭାଲୁ ଘଟଣାସ୍ଥଳରୁ ଚାଲିଯାଇଥିଲେ। ଆହତ ବାପା ପୁଅଙ୍କୁ ସ୍ଥାନୀୟ ଲୋକେ ଉଦ୍ଧାର କରି କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି। ଏହି ସମ୍ପର୍କରେ ପଳାସପଙ୍ଗା ଫରେଷ୍ଟର ଜୟକୃଷ୍ଣ ଦାସଙ୍କୁ ପଚାରିବାରୁ ଗୁରୁତରଙ୍କୁ ବନବିଭାଗ ପକ୍ଷରୁ ତୁରନ୍ତ ଉପଯୁକ୍ତ ସହାୟତା ଯୋଗାଇ ଦିଆଯିବ ବୋଲି କହିଛନ୍ତି।
