ଭୁବନେଶ୍ୱର, ୧୭।୧୨ (ବ୍ୟୁରୋ):ଚଳିତ ଖରିଫ୍ ଧାନ ସଂଗ୍ରହକୁ ଅଧିକ ସୁବ୍ୟବସ୍ଥିତ କରାଯିବ। ଏକ୍ଷେତ୍ରରେ ଚାଷୀମାନେ ସମ୍ମୁଖୀନ ହେଉଥିବା ସମସ୍ୟାର ସମାଧାନ ହେବ। ଏଥିପାଇଁ ଚାଷୀମାନେ ଫେସ୍ବୁକ୍ ଓ ଟୁଇଟର ଜରିଆରେ ମନ୍ତ୍ରୀଙ୍କୁ ସିଧାସଳଖ ଅବଗତ କରାଇବାକୁ ସ୍ବତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଛି। ଧାନ ସଂଗ୍ରହଜନିତ ସମସ୍ୟା ନେଇ ଚାଷୀଙ୍କ ପ୍ରଶ୍ନର ଲାଇଭ୍ ଉତ୍ତର ରଖିବେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ। ଆସନ୍ତା ୧୯ ତାରିଖ ସୁଦ୍ଧା ଚାଷୀ/ପ୍ୟାକ୍ସ/ଲ୍ୟାମ୍ପସ/ମହିଳା ସ୍ବୟଂ ସହାୟକ ଗୋଷ୍ଠୀ ଏବଂ ଏଥିରେ ସମ୍ପୃକ୍ତ ସଂସ୍ଥାଗୁଡ଼ିକ ଧାନ ସଂଗ୍ରହ ସମ୍ପର୍କରେ ସେମାନଙ୍କ ପ୍ରଶ୍ନ ମନ୍ତ୍ରୀଙ୍କୁ ପଚାରି ପାରିବେ। ମନ୍ତ୍ରୀଙ୍କ ଟୁଇଟର #AskOdishaFoodMinister ଏବଂ ଫେସ୍ବୁକ୍ ପେଜ୍ https://www.facebook.com/Ranedra Pratap Swain ବ୍ୟବହାର କରି ଏହି ପ୍ରଶ୍ନ ପଚାରିପାରିବେ ା ମନ୍ତ୍ରୀଙ୍କ ପ୍ରଶ୍ନୋତ୍ତର ଅଧିବେଶନ ୨୨ ତାରିଖ ଅପରାହ୍ନ ୩ଟାରୁ ୪ଟା ମଧ୍ୟରେ ଫେସ୍ବୁକ୍ ଓ ୟୁଟ୍ୟୁବ୍ରେ ସିଧା ପ୍ରସାରଣ ହେବ। ଜନସାଧାରଣ ୟୁଟ୍ୟୁବ୍ ଲିଙ୍କ୍ (http://www.youtube.com/c/rajaswain) ଜରିଆରେ ଏହି କାର୍ଯ୍ୟକ୍ରମର ସିଧାପ୍ରସାରଣ ଦେଖିପାରିବେ। ଧାନ ସଂଗ୍ରହ କାର୍ଯ୍ୟକୁ ଅଧିକ ପାରଦର୍ଶୀ ଓ ସ୍ବଚ୍ଛ କରିବା ଦିଗରେ ମୁଖ୍ୟମନ୍ତ୍ରୀଙ୍କ ଦ୍ୱାରା ପ୍ରବର୍ତ୍ତିତ ‘ମୋ ସରକାର’ ଓ ୫-‘ଟି’ ଆଧାରରେ ଏହି କାର୍ଯ୍ୟକ୍ରମର ଆୟୋଜନ କରାଯାଇଛି। ସୂଚନାଯୋଗ୍ୟ, ମନ୍ତ୍ରୀ ନିୟମିତ ତାଙ୍କର ଫେସ୍ବୁକ୍ ଏବଂ ଟୁଇଟର ଜରିଆରେ ବିଭିନ୍ନ ଅଞ୍ଚଳର ଚାଷୀ ଓ ଖାଉଟିଙ୍କ ସମସ୍ୟା ସମ୍ପର୍କରେ ଅବଗତ ହେବା ସହିତ ଏହାର ଆଶୁ ସମାଧାନ ନିମନ୍ତେ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି। ଏହି ପ୍ରଶ୍ନୋତ୍ତର ଅଧିବେଶନରେ ଚାଷୀଭାଇମାନେ ଯୋଗଦାନ କରି ଚଳିତ ଖରିଫ ଧାନକିଣା ସମ୍ବନ୍ଧୀୟ ପ୍ରଶ୍ନର ଉତ୍ତର ପାଇବା ନିମନ୍ତେ ମନ୍ତ୍ରୀ ଅନୁରୋଧ କରିଛନ୍ତି।
