ଟିଟିଲାଗଡ଼, ୬ା୨ (ଶରତ ମିଶ୍ର): ବଲାଙ୍ଗୀର ଜିଲା ଟିଟିଲାଗଡ ବ୍ଲକରେ ଦୁଗ୍ଧଚାଷୀଙ୍କୁ ପ୍ରୋତ୍ସାହନ ଦେବା ପାଇଁ ୨୦୨୧ ଜାନୁଆରୀ ମାସରେ ୨୧୦ଚାଷୀଙ୍କୁ ଗାଈ ଗୁହାଳ ନିର୍ମାଣ କରିବାକୁ କାର୍ଯ୍ୟାଦେଶ ଦିଆଯାଇଥିଲା। ଜିଲାପାଳ ତଥା ଓମଫେଡ କେବିଏନ ମହାପ୍ରବନ୍ଧକଙ୍କ ସୁପାରିଶରେ ଚାଷୀଙ୍କୁ ଧାର୍ଯ୍ୟ ସମୟରେ ଗାଈଗୁହାଳ ନିର୍ମାଣ ପାଇଁ କୁହାଯାଇଥିଲା। ଧାରଉଧାର କରି ଚାଷୀମାନେ ଗୁହାଳ ନିର୍ମାଣ କଲେ। ହେଲେ ୩ ବର୍ଷ ବିତି ଯାଇଥିଲେ ବି ଅଦ୍ୟାବଧି ପ୍ରାପ୍ୟ ମିଳିନାହିଁ। ଏନେଇ ଅନେକ ଥର ଚାଷୀମାନେ ଟିଟିଲାଗଡ ବିଡିଓ, ଉପଜିଲାପାଳଙ୍କ ଦ୍ୱାରସ୍ଥ ହେଲେ ମଧ୍ୟ କୌଣସି ସୁଫଳ ମିଳିନାହିଁ। ସୋମବାର ବ୍ଲକ ଅନ୍ତର୍ଗତ କତରକେଲା ଗ୍ରାମର ଦୁଗ୍ଧଚାଷୀ ପୀତାମ୍ବର ବେହେରା, ସଞ୍ଜିବ ସିଂ ଚୌଧୁରୀ, ଆଶିଷ ବେହେରା, ଲୋକନାଥ ସାହୁ, ରାଜିନ୍ଦ୍ର ବାରିକ, ପୁଷ୍ପାଞ୍ଜଳି ସାହୁ, ଦିନେଶ ସାହୁ, ଲିଳାବତି ସାହୁ, କମଲିନି ସାହୁ, ଅଶୋକ କଟା, କଂସ କଟା ଉପଜିଲାପାଳ ରେହାନ କ୍ଷେତ୍ରୀଙ୍କ ଦ୍ୱାରସ୍ଥ ହୋଇଥିଲେ। ସେମାନେ ଅଭିଯୋଗ କରିଥିଲେ ଯେ, ଆମେ ଗୁହାଳ ମାଗି ଯାଇ ନ ଥିଲୁ। ଦୁଗ୍ଧଚାଷୀଙ୍କ ପାଇଁ ଯୋଜନା ଆସିଥିବା କହି ବ୍ଲକ ପ୍ରଶାସନ ଗୁହାଳ ନିର୍ମାଣ ପାଇଁ କାର୍ଯ୍ୟାଦେଶ ଦେଇଥିଲା। ଧାରଉଧାର କରି ସିମେଣ୍ଟ, ବାଲି, ଇଟା, ଆଜବେଷ୍ଟସ କ୍ରୟ କରିଥିଲୁ। ହେଲେ ଧାର୍ଯ୍ୟ ପ୍ରାପ୍ୟ ୬୨ହଜାର ଟଙ୍କା ଅଦ୍ୟାବଧି ମିଳି ନ ଥିବା ଚାଷୀମାନେ ଉପଜିଲାପାଳଙ୍କଠାରେ ଅଭିଯୋଗ କରିଛନ୍ତି।
ସୂଚନାଯୋଗ୍ୟ ଯେ, କତରକେଲାଠାରେ ଓମଫେଡ ପକ୍ଷରୁ ଦୁଗ୍ଧଚାଷୀଙ୍କ ପାଇଁ ୧୫୦୦ ଲିଟର କ୍ଷମତା ବିଶିଷ୍ଟ ଚିଲିଂ ପ୍ଲାଣ୍ଟ ବସାଯାଇଛି। ଅଞ୍ଚଳର ଚାଷୀ ସେଠାରେ ଦୁଗ୍ଧ ବିକ୍ରୟ କରିଥାନ୍ତି। ଦୁଗ୍ଧଚାଷୀଙ୍କୁ ପ୍ରୋତ୍ସାହନ ବଦଳରେ ସେମାନଙ୍କ ପ୍ରାପ୍ୟ ହରଣଚାଲ ହେବା ଆଲୋଚନାର ବିଷୟ ହୋଇଛି।
୨୦୨୧ ଜାନୁୟାରୀରୁ ଅଦ୍ୟାବଧି ଦୁଗ୍ଧଚାଷୀ ସେମାନଙ୍କ ଗୁହାଳର ପାଉଣା ପାଇଁ ଧାଇଁ ଚାଲିଛନ୍ତି। ତେବେ ଚିରାଚରିତ ଭାବରେ ବ୍ଲକ ପ୍ରଶାସନ ସେମାନଙ୍କ ପାଉଣା ଅନ୍ୟ କାହାରି ନାମରେ ପକାଇ ହରଣଚାଲ କରାଯାଇଥିବା ମଧ୍ୟ ଅଭିଯୋଗ ହୋଇଛି। ପାଉଣା ନ ମିଳିଲେ ଆଗାମୀ ସାଧାରଣ ନିର୍ବାଚନ ବର୍ଜନ ପାଇଁ ଆମେ ବାଧ୍ୟ ହେବୁ ବୋଲି ଏ ରାଜ୍ୟ ସରକାରଙ୍କ ପକ୍ଷରୁ ଏକଦା ଶେଷ୍ଠ ଚାଷୀ ଭାବେ ପୁରସ୍କାର ପାଇଥିବା ପୀତାମ୍ବର ବେହେରା ଦୁଃଖର ସହ କହିଛନ୍ତି। ଚାଷୀଙ୍କ କଥା ଶୁଣିଲା ପରେ ଖୁବ୍ଶୀଘ୍ର ଟିଟିଲାଗଡ ବିଡିଓ ଘଟଣାର ତଦନ୍ତ କରି ଆବଶ୍ୟକ ନେବେ ବୋଲି ଉପଜିଲାପାଳ କ୍ଷେତ୍ରୀ ପ୍ରତିଶ୍ରୁତି ଦେଇଥିବା ଚାଷୀମାନେ କହିଛନ୍ତି। ରାଜ୍ୟ ସରକାର ଧ୍ୟାନ ଦେବାକୁ ଚାଷୀ ମହଲରେ ଦାବି ହେଉଛି।
