ଦେବଗଡ଼,୬ା୯(ଡ଼ି.ଏନ୍.ଏ.): ଦେବଗଡ଼ ଜିଲା ତିଲେଇବଣି ବ୍ଲକ ଲଇମୁରା ଫାଣ୍ଡି ଅନ୍ତର୍ଗତ ଚିଲାଣ୍ଟିଖୋଳ ଗ୍ରାମରେ ଶନିବାର ଜନ୍ତୁ ଶିକାର ପାଇଁ ବିସ୍ଫୋରକ ତିଆରି କରୁଥିବାବେଳେ ବିସ୍ଫୋରଣ ଘଟିଛି। ଏଥିରେ ଘଟଣାସ୍ଥଳରେ ୨ ଜଣଙ୍କ ମୃତ୍ୟୁ ଘଟିଛି । ମୃତକ ହେଲେ ରଞ୍ଜିତ ଭୋଇ ଓ ସନ୍ତୋଷ ପଟ୍ଟା।
ସୂଚନାଯୋଗ୍ୟ, ୨ ଦିନ ପୂର୍ବରୁ ଗ୍ରାମର ପବିତ୍ର ପଟ୍ଟାଙ୍କ ଘରକୁ ସମ୍ପର୍କୀୟ ମାମୁ ପୁଅ ଭାଇ ରଞ୍ଜିତ ଭୋଇ ଓ ମାଉସୀ ପୁଅ ଭାଇ ସନ୍ତୋଷ ପଟ୍ଟା ରିଆମାଳ ଥାନାଅଞ୍ଚଳ କଂସର ଗ୍ରାମରୁ ଆସିଥିଲେ। ଶନିବାର ପୂର୍ବାହ୍ନରେ ପବିତ୍ରଙ୍କ ଘରୁ ପ୍ରଚଣ୍ଡ ଶବ୍ଦ ହୋଇଥିଲା। ପରେ ପରିବାର ଲୋକେ ଓ ଗ୍ରାମବାସୀ ଯାଇ ଦେଖିବାରୁ ସେଠାରେ ରଞ୍ଜିତ ଓ ସନ୍ତୋଷଙ୍କର କ୍ଷତବିକ୍ଷତ ମୃତଦେହ ପଡିଥିଲା । ବେଆଇନ ଭାବେ ବିସ୍ଫୋରକ ତିଆରି ହେଉଥିବାରୁ ପୋଲିସର କଠୋର କାର୍ଯ୍ୟାନୁଷ୍ଠାନ ଭୟରେ ପରିବାର ଲୋକେ ଏକଥାକୁ ଚପାଇଦେବା ପାଇଁ ଉଦ୍ୟମ କରିଥିଲେ । ଏପରିକି କଥା ପ୍ରଗଠ ନ କରିବାପାଇଁ ପବିତ୍ର ଗାଁ ଲୋକଙ୍କୁ ମଧ୍ୟ ନିବେଦନ କରିଥିଲେ । ଫଳରେ ଏ ସମ୍ପର୍କରେ କେହି ହେଲେ ପୁଲିସକୁ ସୂଚନା ଦେଇ ନ ଥିଲେ । ତେବେ ଭବିଷ୍ୟତରେ ବିପଦ ସୃଷ୍ଟି ହେବାର ଅଶଙ୍କା କରି ଗାଁ ସଭାପତି ଦୁର୍ଯ୍ୟୋଧନ ଧରୁଆ ପୋଲିସକୁ ଖବର ଦେଇଥିଲେ। ସୂଚନାପାଇ ଦେବଗଡ ଥାନା ଅଧିକାରୀ ପ୍ରଶାନ୍ତ କୁମାର ପାତ୍ର ଓ ଲଇମୁରା ଫାଣ୍ଡି ଅଧିକାରୀ ଘଟଣାସ୍ଥଳକୁ ଯାଇ ତଦନଦତ ଆରମ୍ଭ କରିଥିଲେ। ତେବେ ଘଟଣାର ଗୁରୁତ୍ୱ ଦୃଷ୍ଟିରୁ ଅଧିକ ତଦନ୍ତ ଆଇଁ ରବିବାର ସକାଳେ ଦେବଗଡ ଏସ୍ଡିପିଓ ସୁଲେମାନ ଏକ୍କା ସଦଳବଳେ ଘଟଣାସ୍ଥଳରେ ପହଞ୍ଚି ତଦନ୍ତ ପ୍ରକ୍ରିୟା ତ୍ୱରାନ୍ବିତ କରିଛନ୍ତି।
