ନୂଆଦିଲ୍ଲୀ/ଗ୍ଲାଣ୍ଡ,୧୧।୨ : ସ୍ବିଜରଲାଣ୍ଡର ଗ୍ଲାଣ୍ଡରେ ଥିବା ଇଣ୍ଟରନ୍ୟାଶନାଲ ୟୁନିଅନ ଫର କଞ୍ଜରଭେଶନ ଅଫ ନେଚର (ଆଇୟୁସିଏନ) ର ବରିଷ୍ଠ ଅଧିକାରୀମାନେ କହିଛନ୍ତି ଯେ ବିପର୍ଯ୍ୟୟର ମୁକାବିଲା ପାଇଁ ଭାରତର ପ୍ରସ୍ତୁତି ପୂର୍ବ ଅପେକ୍ଷା ବହୁତ ଭଲ ହୋଇଛି, କିନ୍ତୁ ଅନେକ କାରଣ ରହିଛି ଯେଉଁଥିରେ ଭାରତରେ ବିପର୍ଯ୍ୟୟର ଆଶଙ୍କା ଅଧିକ ରହିଛି। ଆଇୟୁସିଏନରେ ଭାରତର ପ୍ରତିନିଧୀ ଯଶବୀର ଭଟ୍ଟନଗର କହିଛନ୍ତି ଯେ ଦେଶରେ ଜୋଶୀମଠ ଭଳି ଘଟଣା ପାଇଁ ହିମାଳୟର ଦୁର୍ବଳତା, ଜନସଂଖ୍ୟା ବୃଦ୍ଧି ଏବଂ ଭିତ୍ତିଭୂମି ଦାୟୀ।
ଭାରତରେ ବନ୍ୟା ହେଉ କିମ୍ବା ବାଦଲ ଫଟା ବର୍ଷା କିମ୍ବା ଜୋଶୀମଠ ପରି ଘଟଣା, ଏହା ପଛରେ ମୁଖ୍ୟ କାରଣ ହେଉଛି ଜନସଂଖ୍ୟା ବୃଦ୍ଧି ଭିତ୍ତିଭୂମି ବିସ୍ତାର ଏବଂ ହିମାଳୟର ଭଙ୍ଗୁର ପ୍ରବଣତା। ସେ କହିଛନ୍ତି ଯେ ପରିବେଶ କାର୍ଯ୍ୟକର୍ତ୍ତା ଭାବରେ ଆମେ ବିକାଶ କାର୍ଯ୍ୟ ବନ୍ଦ ହେବାକୁ ଚାହୁଁନାହୁଁ କିନ୍ତୁ ଆମେ ଚାହୁଁ ଯେ ବିକାଶ କାର୍ଯ୍ୟ ଏପରି ଭାବରେ କରାଯିବା ଉଚିତ ଯାହା ଦ୍ୱାରା ପରିବେଶର କ୍ଷତି ନ ହେଉ।
ଇସ୍ରୋର ଉପଗ୍ରହ ଚିତ୍ରରୁ ଜଣାପଡିଛି ଯେ ଭୂସ୍ଖଳନ ଯୋଗୁ ଜୋଶୀମଠ ନିଜ ମୂଳ ସ୍ଥାନରୁ ୫.୪ ସେମି ସ୍ଥାନାନ୍ତର ହୋଇଛି। ବିଶ୍ୱାସ କରାଯାଏ ଯେ ଏହା ପଛର କାରଣ ହେଉଛି ହିମାଳୟ ଅଞ୍ଚଳରେ ଚାଲିଥିବା ଚାର ଧାମ ପ୍ରକଳ୍ପ କାର୍ଯ୍ୟ, ଯେଉଁଥିରେ ସରକାର ଚାର ଧାମରେ ପହଞ୍ଚିବା ପାଇଁ ଏକ ସର୍ବକାଳୀନ ପାଣିପାଗ ରାସ୍ତା ନିର୍ମାଣ କରୁଛନ୍ତି ଯାହାଦ୍ୱାରା ଉତ୍ତରାଖଣ୍ଡରେ ପର୍ଯ୍ୟଟକଙ୍କ ସଂଖ୍ୟା ବଢ଼ିପାରିବ। ଭଟ୍ଟନଗର କହିଛନ୍ତି ଯେ କେଦାରନାଥ ଘଟଣା ପରେ ବିପର୍ଯ୍ୟୟରେ ଭାରତର ତ୍ୱରିତ କାର୍ଯ୍ୟାନୁଷ୍ଠାନ ବୃଦ୍ଧି ପାଇଛି। ଆମେ ପୂର୍ବ ଅପେକ୍ଷା ଭଲ ସ୍ଥିତିରେ ଅଛୁ।
ହିମାଳୟ ଅଞ୍ଚଳରେ ଭିତ୍ତିଭୂମି ବିକାଶ, ପର୍ଯ୍ୟଟନ, କୃଷି ଏବଂ ଜଳ ବିଦ୍ୟୁତ ପ୍ରକଳ୍ପ ବୃଦ୍ଧି ଦ୍ୱାରା ଏଭଳି ପାଣିପାଗ ଘଟଣା ବୃଦ୍ଧି ପାଇଛି। ପରିବେଶରେ ପରିବର୍ତ୍ତନ ହେତୁ ଭାରତରେ ହଠାତ୍ ବର୍ଷା ଘଟଣା ବୃଦ୍ଧି ପାଇଛି। ବାଦଲ ଫଟା ବର୍ଷା ଘଟଣା ମଧ୍ୟ ବୃଦ୍ଧି ପାଇଛି। ଭଟ୍ଟନଗର କହିଛନ୍ତି ଯେ ସରକାର ଟ୍ଜନସାଧାରଣଙ୍କୁ ପରିବେଶ ବିଷୟରେ ଅବଗତ କରାଇବା ଆବଶ୍ୟକ। ବିଶ୍ୱ ତାପମାତ୍ରା ଯୋଗୁଁ ଭାରତରେ ଗ୍ଲେସିୟର ତରଳିବା ହାର ବୃଦ୍ଧି ପାଇଛି ଏବଂ ଏହାର ପ୍ରଭାବ ଯୋଗୁଁ ଭାରତରେ ବନ୍ୟା ପରିସ୍ଥିତି ଆଶଙ୍କା ବଢ଼ିବାର ଆଶଙ୍କା ମଧ୍ୟ ରହିଛି।
