ନୂଆଦିଲ୍ଲୀ,୧୧ ।୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ତ୍ରିପୁରା ଗସ୍ତ କରିଛନ୍ତି । ତ୍ରିପୁରା ବିଧାନସଭା ନିର୍ବାଚନ ପାଖେଇ ଆସୁଥିବା ବେଳେ ମୋଦିଙ୍କ ରାଲି ରାଜନୈତିକ ବାତାବରଣକୁ ଉଷ୍ମ କରି ଦେଇଛି । ମୋଦି ଧଲାଇର ଅଂବାସା ପହଞ୍ଚି ସେଠାରେ ବିଜୟ ସଂକଳ୍ପ ରାଲିକୁ ସମ୍ବୋଧିତ କରୁଛନ୍ତି । ଏହି ସମୟରେ ମୁଖ୍ୟମନ୍ତ୍ରୀ ମାଣିକ ଶାହା ବି ଉପସ୍ଥିତ ଅଛନ୍ତି । ପ୍ରଧାନମନ୍ତ୍ରୀ ମୋଦି ରାଲିକୁ ସମ୍ବୋଧିତ କରି କହିଛନ୍ତି , ଆଗରୁ ତ୍ରିପୁରାରେ ଗୋଟିଏ ଶବ୍ଦ ଶୁଣିବାକୁ ମିଳୁଥିଲା ‘ଚାନ୍ଦା’ । ଏମାନେ ୩ ଦଶକ ହେବ ଚାନ୍ଦା ନାଁରେ ଲୋକଙ୍କୁ ଲୁଟିବାର ଲାଇସେନ୍ସ ଦେଇ ରଖିଥିଲେ । ଆମେ ତ୍ରିପୁରା ଲୋକଙ୍କୁ ଚାନ୍ଦା ଚାନ୍ଦା କରୁଥିବା ଲୋକଙ୍କଠାରୁ ମୁକ୍ତ କରିଛୁ । ତ୍ରିପୁରାର ଗରିବ, ଯୁବକ, ମାଆ-ଭଉଣୀ, ଜନଜାତିଙ୍କ ପାଇଁ ଦଳ ନୂଆ ଲକ୍ଷ ସ୍ଥିର କଲା ଓ ଦଳ ଏହାକୁ ପୂରଣ କରିବାକୁ ସଂକଳ୍ପ ନେଲା । ତ୍ରିପୁରା ଲୋକେ ମନେରଖିବା ଉଚିତ ଯେ ଆପଣଙ୍କର ଗୋଟିଏ ଭୋଟର ଶକ୍ତିରେ ତ୍ରିପୁରା ବାମପନ୍ଥର କୁଶାସନରୁ ମୁକ୍ତ ହୋଇଛି ।
ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି, ତ୍ରିପୁରା ଉପରେ ମାଆ ତ୍ରିପୁରା ସୁନ୍ଦରୀଙ୍କ ଆଶୀର୍ବାଦ ରହିଛି । ଆମ ସରକାର ତ୍ରିପୁରାକୁ ତ୍ରି-ଶକ୍ତିରେ ଆଗକୁ ବଢାଉଛି । ଆଉ ସେହି ଶକ୍ତି ହେଉଛି ଆବାସ, ଆରୋଗ୍ୟ ଓ ଆମଦାନୀ । ଆବାସ, ଆରୋଗ୍ୟ ଓ ଆମଦାନୀ ତ୍ରିପୁରାର ଲୋକଙ୍କ ଜୀବନକୁ ସରଳ କରିଦେଇଛି । ପୂର୍ବରୁ ତ୍ରିପୁରାର ପୋଲିସ ଷ୍ଟେଶନରେ ସିପିଏମ କ୍ୟାଡରର କବଜା ଥିଲା, ହେଲେ ଏବେ ଭାଜପା ଶାସନରେ ରାଜ୍ୟରେ ଆଇନର ରାଜ ଚାଲିଛି । ଏବେ ରାଜ୍ୟରେ ମହିଳା ସଶକ୍ତିକରଣ ଅଛି ଓ ଲୋକଙ୍କ ଜୀବନଜାପନ ସହଜ ହୋଇଯାଇଛି ।
