ଜଗତ୍ସିଂହପୁର, ୯ା୪ (ପ୍ରମୋଦ କୁମାର ନାୟକ):ଜଗତ୍ସିଂହପୁର ପୌରାଞ୍ଚଳରେ ଜନସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଅନେକ ସମୟରେ କୌଣସି ନା କୌଣସି ୱାର୍ଡରେ ଲୋକଙ୍କ ମୃତ୍ୟୁ ହେଉଛି। କିନ୍ତୁ ଶବଦାହ ପାଇଁ ଅନେକ ସମୟରେ ଅସୁବିଧା ହେଉଛି। ବିଶେଷକରି ବର୍ଷାଦିନେ ଲୋକେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି। ଏହି ସମସ୍ୟା ଦୂର ପାଇଁ ଜଗତ୍ସିଂହପୁର ପୌର ପରିଷଦ ପକ୍ଷରୁ ସହରର ୧୦ ନଂ. କେନାଲ ଆରପଟେ ଏକ ମଡେଲ ମଶାଣି ନିର୍ମାଣ କରିବାକୁ ୨୦୨୧ରେ ନିଷ୍ପତ୍ତି ହୋଇଥିଲା। ଏନେଇ ପାଖାପାଖି ୧ କୋଟି ଟଙ୍କା ବ୍ୟୟ ଅଟକଳ କରାଯାଇଥିଲା। କାମ ମଧ୍ୟ ଆରମ୍ଭ ହୋଇଥିଲା। କିନ୍ତୁ ମଶାଣିଟି ଏପର୍ଯ୍ୟନ୍ତ ପୂର୍ଣ୍ଣାଙ୍ଗ ହୋଇପାରି ନାହିଁ। ଫଳରେ ଏହା ଉଦ୍ଘାଟନ ହୋଇପାରୁନାହିଁ। ମଶାଣି ଆରମ୍ଭରେ ଲୋକଙ୍କ ଭିତରେ ଯେଉଁ ଖୁସି ଅନୁଭବ ହେଉଥିଲା ବିଳମ୍ବ କାରଣରୁ ତାହା ମଉଳିବାରେ ଲାଗିଲାଣି।
ଏ ସମ୍ପର୍କରେ ସ୍ଥାନୀୟ କେତେଜଣ ବୁଦ୍ଧିଜୀବୀ ପ୍ରତିକ୍ରିୟାରେ କହିଥିଲେ, ମଶାଣିଟି ପୂର୍ଣ୍ଣ କାର୍ଯ୍ୟକ୍ଷମ ହେଲେ ସହରରେ ଶବଦାହଜନିତ ସମସ୍ୟା ଦୂର ହୋଇଯିବ। ଏଠାରେ ସାଧାରଣ ବ୍ୟବହାର ଯଥା ଗାଧୁଆ ଘର, ବସ୍ତ୍ର ବଦଳାବଦଳି ଗୃହ, ଅପେକ୍ଷା ଗୃହ, ଶୌଚାଳୟ, ପାଦଚଲା ରାସ୍ତା ଆଦି ରହିବ। କେବଳ ଏତିକି ନୁହେଁ କେୟାର ଟେକର୍ ଗୃହ, ଲକ୍କର, ପୂଜା ସାମଗ୍ରୀ, କାଠ ଆଦି ରଖାଯିବା ପାଇଁ ମଧ୍ୟ ବ୍ୟବସ୍ଥା କରାଯିବ। ବିଶେଷକରି ଏହି ପରିସର ଯେପରି ପ୍ରାକୃତିକ ସୌନ୍ଦର୍ଯ୍ୟରେ ଭରପୂର ହୋଇପାରିବ ସେଥିପ୍ରତି ଧ୍ୟାନ ଦିଆଯିବ ବୋଲି କୁହାଯାଉଛି। ଜଗତ୍ସିଂହପୁର ପୌର ପରିଷଦ ପକ୍ଷରୁ ମିଳିଥିବା ସୂଚନା ଅନୁଯାୟୀ, ମଡେଲ ମଶାଣିଟି କଲେଜ ଛକ ପୋଲ ଆରପଟ (କଲଭର୍ଟ ନିକଟ) ପାଖାପାଖି ୧୦୦ ମିଟର କେନାଲ ବାମ ପାର୍ଶ୍ୱ ୧ ଏକର ଜମିରେ ନିର୍ମାଣ ଆପାତତଃ ସରିଛି। ଏହି ଜମି ଉଚ୍ଚ ନୀଚ ରହିଛି, ଗୋଟିଏ ପଟେ କେନାଲ ବନ୍ଧ ଓ ବିପରୀତ ଦିଗରେ ମୃତ ଅଳକା ନଦୀ ରହିଛି। ତେଣୁ ମାଟି ନ ଖସିବା ପାଇଁ ରିଟେନିଂ ୱାଲ୍ କରାଯିବା ଲକ୍ଷ୍ୟ ରଖାଯାଇଥିଲା। ଏ ବାବଦରେ ୯,୦୯,୧୨୪ ଟଙ୍କା ଖର୍ଚ୍ଚ ଆକଳନ ହୋଇଥିଲା। ଜମି ଚାରିପଟେ ପାଚେରି (କମ୍ପାଉଣ୍ଡ ୱାଲ୍) ନିର୍ମାଣ ପାଇଁ ୧୧,୫୯,୦୯୬ ଟଙ୍କା ଖର୍ଚ୍ଚ ବ୍ୟବସ୍ଥା ହୋଇଥିଲା। ତା’ପରେ ଏହି ପରିସରରେ ମଶାଣି ଗୃହ (ଶବଦାହ) ନିର୍ମାଣ ପାଇଁ ୧୨,୯୦,୪୨୩ ଟଙ୍କା ଖର୍ଚ୍ଚ ବରାଦ କରାଯାଇଥିଲା। ସାଧାରଣ ବ୍ୟବହାର ଉଦ୍ଦେଶ୍ୟରେ ହେବାକୁ ଥିବା ଗୃହରେ ୨୦,୯୧,୩୨୫, ଗାଧୁଆ ଓ ବଦଳାବଦଳି (ମହିଳା ଓ ପୁରୁଷ) ଗୃହ ବାବଦରେ ୨,୩୧,୫୭୭ ଟଙ୍କା ଖର୍ଚ୍ଚ ବ୍ୟବସ୍ଥା ହୋଇଥିଲା। ଏହା ଭିତରେ ସଂଯୋଗୀକରଣ ରାସ୍ତା (ଆପ୍ରୋଚ୍ ରୋଡ୍) ଓ ପାଦଚଲା ରାସ୍ତା ମଧ୍ୟ ହୋଇ ସାରିଲାଣି; ଯେଉଁ ବାବଦରେ ୫,୮୫,୪୧୫ ଟଙ୍କା ଖର୍ଚ୍ଚ କରାଯିବା ଲକ୍ଷ୍ୟ ରଖାଯାଇଥିଲା। ମଶାଣି ପରିସରକୁ ପ୍ରାକୃତିକ ବୈଶିଷ୍ଟ୍ୟ ପରିପୂର୍ଣ୍ଣ ସୁନ୍ଦର ଓ ମନୋରମ (ଲାଣ୍ଡସ୍କେପିଂ) କରିବା ପାଇଁ ୧୦,୮୧,୫୬୦ ଟଙ୍କା ବ୍ୟୟ ଅଟକଳ କରାଯାଇଥିଲା। ଏସବୁ ବାବଦରେ ମୋଟ ୮୧,୨୪,୪୯୮ ଟଙ୍କା ଖର୍ଚ୍ଚ ବରାଦ ହୋଇଥିଲା। ଏହାବାଦ୍ ମଶାଣି ଭିତର ଓ ବାହାରେ ବିଦ୍ୟୁତୀକରଣ ବାବଦରେ ୧,୯୧,୦୭୨ ଟଙ୍କା ଖର୍ଚ୍ଚ ହେବ। ଅନୁରୂପ ଭାବେ ପାଣି ଓ ସାନିଟାରୀ ଆଦି କାମ ପାଇଁ ମଶାଣି ଭିତରେ ୧,୬୨,୨୯୬ ଓ ବାହାରେ ୩,୭୦,୯୩୯ ଏହିପରି ମୋଟ ୫,୩୩,୨୩୫ ଟଙ୍କା ଖର୍ଚ୍ଚ କରାଯିବା ଅଟକଳ କରାଯାଇଛି। ମୋଟାମୋଟି ଭାବରେ ମଡେଲ ମଶାଣି ନିର୍ମାଣରେ ୯୯,୯୯,୦୦୦ଟଙ୍କା ଖର୍ଚ୍ଚ କରାଯିବା ସ୍ଥିର ହୋଇଛି। କାମ ଆପାତତଃ ସରିଲାଣି। ଆଉ କମ୍ ଦିନ ଭିତରେ ମଶାଣି କାର୍ଯ୍ୟକ୍ଷମ ହେବ ବୋଲି ପରିଷଦ କନିଷ୍ଠ ଯନ୍ତ୍ରୀ ବିଭୂତି ତ୍ରିପାଠୀ ପ୍ରତିକ୍ରିୟାରେ କହିଛନ୍ତି ।
