ଆନନ୍ଦପୁର,୫।୧୧(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ଫକୀରମୋହନ ବସ୍ଷ୍ଟାଣ୍ଡକୁ ମଡେଲ ବସ୍ଷ୍ଟାଣ୍ଡରେ ପରିଣତ କରିବା ପାଇଁ ନିର୍ମାଣ କାର୍ଯ୍ୟ ଜାରି ରହିଛି। ଏ ନେଇ ପରିସରରେ ଥିବା ଏକ ବ୍ୟବସାୟ ପ୍ରତିଷ୍ଠାନକୁ ଶୁକ୍ରବାର ପ୍ରଶାସନ ଉଚ୍ଛେଦ କରିଛି। ମାତ୍ର ବିନା ଥଇଥାନରେ ଉଚ୍ଛେଦକୁ ନେଇ ବ୍ୟବସାୟୀ ଅସନ୍ତୋଷ ପ୍ରକାଶ କରିଛନ୍ତି।
ମୁତାବକ, ନିର୍ମାଣାଧୀନ ମଡେଲ ବସ୍ଷ୍ଟାଣ୍ଡ୍ ପରିସରରେ ରହିଥିବା ବହୁ ବ୍ୟବସାୟ ପ୍ରତିଷ୍ଠାନକୁ ପୂର୍ବରୁ ଉଚ୍ଛେଦ କରାଯାଇଛି। ମାତ୍ର ଖାତା ନଂ. ୧୨୭୯ ଓ ପ୍ଲଟ୍ ନଂ. ୪୯୯୪ରେ ଥିବା ପୌର ପରିଷଦର ଏକ ଗୃହକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଥିଲା। ଏ ନେଇ ପ୍ରତିଷ୍ଠାନ ଉଚ୍ଛେଦ ହୋଇ ନ ଥିଲା। ଗୁରୁବାର ସନ୍ଧ୍ୟାରେ ପୌର ପରିଷଦ ଚିଠି ନଂ. ୪୬୩୪/୩ ନଭେମ୍ବର୨୦୨୨ ରେ ପ୍ରତିଷ୍ଠାନ କାନ୍ଥରେ ନୋଟିସ୍ ଲଗାଇ ସ୍ଥାନକୁ ଖାଲି କରିବାକୁ କୁହାଯାଇଥିଲା। ଆନନ୍ଦପୁର ତହସିଲକୁ ମଧ୍ୟ ସୂଚନା ଦିଆଯାଇଥିଲା। ଶୁକ୍ରବାର ପୂର୍ବାହ୍ନରେ ଆନନ୍ଦପୁର ରାଜସ୍ବ ଅଧିକାରୀ ପ୍ରଦୀପ ପାଢ଼ୀ, ତହସିଲଦାର ମାନସ ତ୍ରିପାଠୀ, ପୌର ଅଧିକାରୀ ଲଳିତ ନାୟକ ଉପସ୍ଥିତ ରହି ହୋଟେଲ ପ୍ରତିଷ୍ଠାନକୁ ଉଚ୍ଛେଦ କରିଥିଲେ।
ବ୍ୟବସାୟୀ ସରୋଜ ସିହ୍ନା କହିଛନ୍ତି ଯେ, ମଡେଲ ବସ୍ଷ୍ଟାଣ୍ଡ୍ ପାଇଁ ଜମି ଚିହ୍ନଟ ପ୍ରକ୍ରିୟାରେ ତାଙ୍କ ହୋଟେଲ୍ ଚିହ୍ନଟ ହୋଇଥିଲା। ଏଥିପାଇଁ ସେ ଉଚ୍ଚ ନ୍ୟାୟାଳୟର ଦ୍ୱାରସ୍ଥ ହୋଇଥିଲେ। ଉଚ୍ଚ ନ୍ୟାୟାଳୟ ମାମଲାର ବିଚାର କରି ପ୍ରତିଷ୍ଠାନକୁ ଭାଙ୍ଗିବା ନେଇ ୧୫ ଦିନ ରହିତାଦେଶ ଦେଇଥିଲେ। ଏଥିସହ ବ୍ୟବସାୟୀଙ୍କୁ ଥଇଥାନ କରିବା ପାଇଁ ପୌର ପରିଷଦକୁ ନିର୍ଦ୍ଦେଶ ହୋଇଥିଲା। ଅବଧି ଶେଷ ହୋଇଥିଲେ ବି ଥଇଥାନ କରା ନ ଯାଇ ଉଚ୍ଛେଦ କରାଯାଇଛି ବୋଲି ବ୍ୟବସାୟୀ କହିଛନ୍ତି।
ଜିଲାପାଳଙ୍କ ନିର୍ଦ୍ଦେଶକ୍ରମେ ଉଚ୍ଛେଦ କରାଯାଇଥିବା ତହସିଲଦାର କହିଥିଲେ। ବ୍ୟବସାୟୀଙ୍କ ଥଇଥାନ ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରାଯାଇଥିବା ପୌର ଅଧିକାରୀ ନାୟକ ସୂଚନା ଦେଇଛନ୍ତି। ପୌର ଉପନଗରପାଳ ଦୁର୍ଗା ଚରଣ ଦଳେଇ ବ୍ୟବସାୟୀଙ୍କୁ ଆବଶ୍ୟକ ଥଇଥାନ କରିବାକୁ ପୌର ଅଧିକାରୀଙ୍କୁ କହିଥିଲେ। ଆନନ୍ଦପୁର ଏସ୍ଡିପିଓ ପ୍ରଶାନ୍ତ ବେହେରାଙ୍କ ନେତୃତ୍ୱରେ ଆନନ୍ଦପୁର ଥାନା ଅଧିକାରୀ ସୁଶାନ୍ତ ଦାଶ ପୋଲିସ ଫୋର୍ସ ସହିତ ଘଟଣାସ୍ଥଳରେ ଉପସ୍ଥିତ ରହିଥିଲେ।
