କେନ୍ଦୁଝର,୯ା୧୧(ସ୍ବ.ପ୍ର.): କେନ୍ଦୁଝର ଜିଲାରେ ହାତୀ ଉପଦ୍ରବ ବୃଦ୍ଧି ପାଉଥିବା ବେଳେ ବନ ବିଭାଗ ଲୋକଙ୍କ ଧନଜୀବନର ସୁରକ୍ଷା କରିବାରେ ବିଫଳ ହେଉଛି। ଅନ୍ୟପକ୍ଷରେ ହାତୀ ଉପଦ୍ରବ ବଢୁଥିବାରୁ ଲୋକମାନେ ଭୟ ଆତଙ୍କ ମଧ୍ୟରେ ରହୁଥିବା ବେଳେ ତେଣେ ହାତୀପଲ ଦେଖିବାକୁ ଲୋକଙ୍କ ମଧ୍ୟରେ ଉତ୍ସାହ ବଢୁଛି। ସହରାଞ୍ଚଳର ଲୋକମାନେ ମଧ୍ୟ ହାତୀମାନଙ୍କୁ ଦେଖିବାକୁ ଗ୍ରାମ ଓ ଜଙ୍ଗଲ ମୁହାଁ ହେଉଛନ୍ତି। ଫଳରେ ଲୋକଙ୍କ ସୁରକ୍ଷାକୁ ନେଇ ବନବିଭାଗର ଚିନ୍ତା ବଢ଼ିଯାଇଛି।
କେଉଁଠି ଦଳ ଦଳ ହାତୀଙ୍କୁ ଦେଖିବାକୁ ଲୋକଙ୍କ ଭିଡ଼ ଜମୁଛି ତ କେଉଁଠି ହାତୀମାନଙ୍କ ଜଳକ୍ରୀଡ଼ାର ମନରୋମ ଦୃଶ୍ୟ ଦେଖିବା ହାତ ଛଡ଼ା କରୁନାହାନ୍ତି। ଫଳରେ ଅନେକ ଅଞ୍ଚଳ ସତେ ଯେପରି ହାତୀ ସଫାରୀରେ ପରିଣତ ହୋଇଥିବା ମନେ ହେଉଛି। କିନ୍ତୁ ବନ ବିଭାଗ ହାତୀ ନିକଟକୁ ନ ଯିବା ପାଇଁ ବାରଣ କରୁଥିଲେ ହେଁ କେହି ମାନୁନାହାନ୍ତି। ଅନେକ ଅତି ନିକଟକୁ ଯାଇ ହାତୀମାନଙ୍କ ଫଟୋ ଉଠାଉଥିବା ବେଳେ କେତେକ ହାତୀ ସହ ସେଲ୍ଫି ଉଠାଉଥିବା ଦେଖିବାକୁ ମିଳୁଛି। ବେଳେ ଆଖପାଖ ଅଞ୍ଚଳର ଲୋକମାନେ ହାତୀମାନଙ୍କୁ ଦେଖିବା ପାଇଁ ଭିଡ଼ ଜମାଉଛନ୍ତି। ପାଟଣା ରେଞ୍ଜକୁ ପଶି ଆସିଥିବା ୨୪ ଟିକିଆ ହାତୀଙ୍କୁ ଘଉଡ଼ାଇବା ପାଇଁ ଲୋକମାନେ ରାତି ଅନିଦ୍ରା ହୋଇ ନିଜ ନିଜର ଫସଲ ଓ ଧନଜୀବନର ସୁରକ୍ଷା ପାଇଁ ଲାଗିରହିଛନ୍ତି। ଏହି ଦଳରେ ଛୁଆ ହାତୀ ରହିଥିବାରୁ ହାତୀମାନେ ସେମାନଙ୍କ ସୁରକ୍ଷା ପାଇଁ ଅନେକ ସମୟରେ ଅଧିକ ଉଗ୍ର ହୋଇ ପଡୁଛନ୍ତି। ଲୋକଙ୍କ ପାଟିତୁଣ୍ଡ, ପଥର ମାଡ଼ ଆଦିରେ ହାତୀମାନେ ଅସ୍ତବ୍ୟସ୍ତ ହୋଇ ଏଣେ ତେଣେ ଧାଉଁଛନ୍ତି। ଦିନ ରାତି ଧାଇଁ ବୁଲୁଥିବା ହାତୀମାନେ ଥକି ଯାଇ ବିଶ୍ରାମ ନେବା ପାଇଁ ସୁରକ୍ଷିତ ସ୍ଥାନ ଖୋଜୁଥିଲେ ହେଁ ଜନବସତି ଅଞ୍ଚଳ ଘେରା ରେ ରହିଯାଇଥିବାରୁ ବିଶ୍ରାମ ନେଇପାରୁନାହାନ୍ତି। ଏଣେ ଭୋକ ତେଣେ ଲୋକଙ୍କ ଘଉଡ଼ାରେ ହାତୀପଲ ବ୍ୟତିବ୍ୟସ୍ତ ହୋଇପଡୁଥିବାରୁ ବନବିଭାଗ ଏ ଦିଗରେ ପଦକ୍ଷେପ ନେବାକୁ ଦାବି ହେଉଛି।
